Awařen Iweznen 21

1 Uř n ujeǧid am tɣezratin n waman deg ufus n SIDI. Netta ineddeh i-t, mani ma ixs Netta. 2 Marra ibriden n bnadem nican di tiṭṭawin nnes, maca SIDI ittqeǧab uřawen. 3 Timegga n tsegda d řḥeqq, d tina i SIDI ḥsen zi tewhibt n tɣarṣt. 4 Nnfaxet n tiṭṭawin d uř aɛeffar, arber n iɛeffanen d ddenb. 5 Ixemmimen n wenni imeḥḍen ttawyen mɣir ɣar ufeyyeḍ, maca marra wenni ittqeǧiqen aṭṭas ittawi ɣar řeḥwej waha. 6 Asmuni n wagřa s yiřes issxarriqen, ammu i teǧa twarrit n nnefs iɛeddun deɣya n yinni yarezzun řmewt. 7 Lɛunf n iɛeffanen ittjarra i-ten, maɣar ttagin ad ggen min iseggmen. 8 Abrid n bu-umarwas ittefriɣ, maca amezdag ittegg min iǧan nican. 9 Iḥřa ad tzedɣed deg ict teɣmart n tzeqqa, x tzeddiɣt ak-d ict n temɣart ittemcubbucen deg ict n taddart tcarc. 10 Řeɛmar n iɛeffanen ittmeẓri di řɣar, amqarreb nnes war ɣares ittif arḍa di tiṭṭawin nnes. 11 Mařa ittwaxeǧeṣ umestehziy, iddakkwař wenni war ɣares bu řefhamet d amiɣis, mařa ssřemden amiɣis, ikessi netta tussna. 12 Ijj n Umsegged ittbeqqec mliḥ taddart n uɛeffan, iɣeṭṭeř iɛeffanen di arẓiyyet. 13 Wenni ittbellaɛen amezzuɣ nnes ɣar iɣuyyan n umezřuḍ, uřa d netta ad isɣuy maca war xas dd-ttarran. 14 Ṣṣedqet di tnuffra teṣřeḥḥu weɣḍab, tarzeft immewcen deg weḥsin n warruḍ teṣřeḥḥu axeyyeq imɣaren. 15 Aqa d řefraḥet i umsegged maḥend ad igg min iǧan nican, maca d aceřwaw i yinni itteggen řɣecc. 16 Bnadem nni itteffɣen zeg webrid n řeɛqeř, ad yareyyeḥ deg wegraw n řexyařat n imettan. 17 Wenni ittexsen afarraj, ad iḥwaj, wenni ittexsen binu d zzect, war iddikkwiř d bu wagřa. 18 Aɛeffan d ddeyyet i imseggaden, u aɣeddar ad dd-yiři deg wemcan n yinni igguren nican. 19 Iḥřa ad tzedɣed di temmurt ixřan, x tazeddiɣt ak-d ict n temɣart ittemcubbucen u itteqqsen. 20 Ijj n řkenz ittwaḥwajen d zzect aqa aten di tzeddiɣt n imiɣisen, maca bnadem abuhaři iṣarreḍ i-t. 21 Wenni yarezzun x tsegda d tmexsiwt icewwaren, ittaf tudart d tsegda d ccan. 22 Amiɣis ittgeɛɛad x tendint n ayt n bu-teɣřuḍt, iɣeṭṭeř jjehd n ttiqet nsen di temmurt. 23 Wenni iḥeṭṭan aqemmum d yiřes nnes, iḥeṭṭa řeɛmar nnes zi řeḥṣarat. 24 Wenni d bu-nnfaxet iffuccḥen ttřaɣan as ‘amestehziy’, netta ittegg s nnfaxet břa řeqyas. 25 Ccehwet n umeɛguz tneqq i-t, maɣar ifassen nnes ugin ad xedmen. Awařen iwezznen n Suliman - tasɣart 1d 26 Ass imun ittcehha timesřayin n ucehhi, maca amsegged ad iwc, war ittɣimi ittᵉṭṭef di ca i yixef nnes. 27 Taɣarṣt n uɛeffan d nnɛi, mahu mařa nitni ad tt awyen s unekkwi iɣeccen. 28 Acehhad issxarriqen ad ittwahellek, maca aryaz nni ittesřan, ad issiweř tidett řebda. 29 Aryaz aɛeffan issejhed ixef nnes ak-d wudem nnes, maca wenni igguren nican issemten ibriden nnes. 30 War teǧi tiɣit uřa d řefhamet, war din iǧi bu ucawar qibač i SIDI. 31 Ayis ad as ḥezzmen i wass n umenɣi, maca řeɣřeb ɣar SIDI.