Awařen Iweznen 10

1 Awařen iweznen n Suliman Ijj n mmis d amiɣis issfarraḥ babas, maca ijj n ubuhaři n mmis d wenni d amnus ameqqran n yemmas. 2 Tixubay n tuɛeffna war nneffɛent, maca tasegda tᵉttfekka zi řmewt. 3 SIDI war ittejji řeɛmar n imseggaden ad iḥeyyef, maca meẓri n iɛeffanen iɛarren i-t ɣar řaggʷaj. 4 Wi ixeddmen s ufus yarxun, ittawi-dd zzeřḍ, maca afus n yinni ittceṭṭaren ittawi-dd agřa. 5 Wenni iyarrwen deg unebdu d ijj n mmis ifehhmen, maca wenni itteṭṭṣen di tmeyra d ijj n mmis n řefḍiḥet. 6 Lbarakat aressant x uzeǧif n imseggaden, maca lɛunf issdurruy aqemmum n iɛeffanen. 7 Řidaret i umsegged ad dd-yawi lbaraka, maca isem n iɛeffanen ad yarṣuḍ. 8 Wenni d amiɣis deg wuř, ad iqbeř tiweṣṣa, maca wenni issawařen tubbuheřya s iyencicen nnes, ad iwḍa. 9 Wenni igguren di řeṣfayet, iggur di řaman, maca wenni igguren ibriden ifarɣen, ad ittwassen. 10 Wenni ittɣemmazen s tiṭṭawin, ittegg řeḥriq, wenni issawařen tubbuheřya s iyencicen nnes, ad iwḍa. 11 Aqemmum n umsegged d tařa n tudart, maca lɛunf issdurruy aqemmum n iɛeffanen. 12 Acrah tessekkara-dd imcubbecen, maca tayri tessdurruy marra ixeṭṭan. 13 X iyencicen n wenni ɣar iǧa řefhamet tᵉttwaf tiɣit, maca aɛmud i wenni war ɣar iǧi bu řeɛqeř. 14 Imiɣisen ttxemmaren tussna, maca aqemmum n ubuhaři ittades ɣar uhellek. 15 I bu-wagřa min iǧan nnes d tandint ijehden nnes, lebla n imezřaḍ d ahellek nsen. 16 Řɣiǧet n umsegged aqa-tt i tudart, řmunet n uɛeffan i ddenb. 17 Wenni iḥeṭṭan ttarbiyyet, aqa-t x webrid n tudart, maca wenni isemmḥen deg uwebbex, ad iweddar. 18 Wi itteffaren acrahi, ɣares iyencicen ssxarriqen, wi ittceqqafen aqa-t d abuhaři. 19 Ɣar waṭṭas n wawařen war iqqim uxeṭṭu ineqqeṣ, maca wenni imennɛen iyencicen nnes, aqa ittegg s řeɛqeř. 20 Nnuqart iqquren d iřes n umsegged, uř n iɛeffanen war isekkwin. 21 Iyencicen n imseggaden sseccan aṭṭas, maca ibuhařiyyen mmuten umi war ɣarsen bu wuř imten. 22 Lbaraka n SIDI tᵉttawi-dd agřa, arber n bnadem war dayes yarenni walu. 23 I ubuhaři tameggit n řefḍihet am yict n řuraret, maca i weryaz n řefhamet adebbar s tiɣit am man aya. 24 Min zi itteggʷed uɛeffan ad t iřqef, maca asitem n imseggaden ad yiři. 25 Mařa teɛdu-dd tḥaryaḍt, aɛeffan war ittɣimi, maca amsegged ad iqqim imten i řebda. 26 Am binu asemmam i teɣmas d ddexxan i tiṭṭawin, ammu i igga umeɛguz i yinni t issekken. 27 Tiggʷudi n SIDI tarenni deg ussan i tudart, maca iseggʷusa n iɛeffanen ttwassquḍḍeḍen. 28 Tarajit n imseggaden d řefraḥet, maca řayas n iɛeffanen ggur ad ifna. 29 Abrid n SIDI d lburj ijehden i wenni igguren nican, maca d ahellek i yinni itteggen řɣecc. 30 Amsegged ɛemmarṣ ad inhezz i řebda, maca iɛeffanen war zeddɣen di temmurt. 31 Aqemmum n umsegged ittawi-dd tiɣit s waṭṭas, maca ijj n yiřes iɛemmar s řexdaɛat ad ittwaqess. 32 Iyencicen n umsegged ssnen min yarḍan, maca aqemmum n uɛeffan issen řexdaɛat waha.