Di Řexřa 6

1 Issiweř SIDI ak-d Musa, inna: 2 “Siweř ak-d ayt n Israil uca ini asen: ‘Mařa ijj n weryaz niɣ ict n temɣart i iwejden maḥend ad iwc awař n ttaj n ucuwwaf n lwaɛd, maḥend ad iɛzeř ixef nnes s ttaj nni i SIDI, 3 xenni ad iggʷej x binu d ccrab. War isess řxeǧ zi binu niɣ řxeǧ zi ccrab u war isess aman n uḍiř, u war ittett zeg uḍiř azeyza niɣ zeg uḍiř yuẓɣen. 4 Marra ussan n ttaj nnes n weɛzař war ittett ca min dd-iffɣen zi tzayart, zeg uɛeqqa nnes ař taqcurt nnes.’" 5 “Marra ussan n wawař i dd ttasen ak-d ttaj nnes n weɛzař war ittekk řmus x uzeǧif nnes ař ɣa kemmřen wussan nni iɛzeř i SIDI uca ad yiři iqeddes uca ad yejj iɛeyyacen n ucuwwaf n uzeǧif nnes ad mɣaren. 6 Marra ussan i issḥuzz i SIDI, war dd-ittqarrib ca ɣar řeɛmar n ijj n umettin. 7 War issxemmij ixef nnes x babas niɣ x yemmas niɣ x umas niɣ x učmas mařa gguren ad mmten, minzi ttaj n weɛzař n AREBBI nnes aqa-tt x uzeǧif nnes." 8 “Marra ussan n ttaj nnes n weɛzař ad yiři iqeddes i SIDI. 9 Mařa wenni ittmettan ad immet deɣya deg wermac n wabřiwen uca issexmej azeǧif nnes s ttaj nnes n weɛzař, xenni ad iḥeff azeǧif nnes deg wass n usizdeg nnes. Deg wass wiss sebɛa ittxeṣṣa ad t iḥeff. 10 Deg wass wiss tmenya ad yawi tnayen n tejlilliḥin niɣ tnayen n iḍbiren ɣar ukehhan ɣar wadaf n Uqiḍun n Umsagar. 11 Akehhan ad issewjed ict d taɣarṣt n ddenb d ict d taɣarṣt n wecmaḍ uca ad t isseṣřeḥ, minzi netta aqa ixḍa di ssibbet n umettin. Netta ad issqeddes azeǧif nnes ɛawed deg wass nni 12 uca twařa nneɣni ad ineyyec netta ussan n ttaj nnes n weɛzař i SIDI uca ad iqeddem ijj n izmar n ijj n useggʷas d taɣarṣt n umarwas. Ussan iɛdun ad iřin wḍan minzi aqa tᵉttwassexmej ttaj nnes n weɛzař." 13 “Wa d azerf n wenni yarebbun ttaj n weɛzař: deg wass min di ttwakemmřen wussan n ttaj nnes n weɛzař, ad t awyen ɣar wadaf n Uqiḍun n Umsagar. 14 Xenni ad dd-issqarreb tawhibt nnes ɣar SIDI, ijj n izmar icnan qaɛ n ijj n useggʷas am tɣarṣt n wecmaḍ d ict n texsi icnan qaɛ n ijj n useggʷas am tɣarṣt n ddenb d ijj n icarri icnan qaɛ am tɣarṣt n řehna 15 d ict n tsuǧet ak-d weɣrum břa antun d řemsemnat n waren azdad ixeǧḍen s zzect d teřfaf n weɣrum břa antun ttwadehnent s zzect uřa d tawhibt nnes n řɣiǧet d tewhibin nnes n useyyeb." 16 “Akehhan ad yawi man aya zzat i wudem n SIDI uca ad issewjed taɣarṣt nnes n ddenb d tɣarṣt nnes n wecmaḍ. 17 Ad issewjed icarri am tɣarṣt n řehna i SIDI uřa d tasuǧet ak-d tecnifin břa antun uca akehhan ad issewjed ɛawed tawhibt n řɣiǧet nnes d tewhibin n useyyeb nnes." 18 “Xenni wenni yarebbun ttaj n weɛzař ad iḥeff azeǧif n ttaj nnes n weɛzař ɣar wadaf n Uqiḍun n Umsagar uca ad iksi acuwwaf n uzeǧif n ttaj nnes n weɛzař uca ad yegg aya x tmessi i iǧan sadu tɣarṣt n řehna. 19 Xenni ad iksi ukehhan tameṣṣaḍt n zzat yenggʷan n icarri d ict n temsemment břa antun zi tsuǧet d ict n teřfeft břa antun uca ad tent issars x ifassen n wenni yarebbun ttaj n weɛzař awarni ma iḥeff ttaj nnes n weɛzař. 20 Akehhan ad tent issenhezz zi ssa ɣar da zzat i wudem n SIDI. Aqa-tt d ict n tmesřact tamqeddast i ukehhan, ak-d idmaren n wenhezzi u ak-d ucekrud n tewhibt ittwassgeɛɛden. Awarni aya iɛeddeř i wenni yarebbun ttaj n weɛzař maḥend ad isu binu." 21 “Wa d azerf n wenni yarebbun ttaj n weɛzař, wenni tuɣa iwaɛden i SIDI tawhibt nnes di ssibbet n ttaj n weɛzař nnes, barra min izemmar ufus nnes ɛad ad issiweḍ. Ittxeṣṣa as ad yegg ɛlaḥsab awař i iwcin, ɛlaḥsab azerf n ttaj n weɛzař nnes.” Lbaraka s ufus n ikehhanen 22 Issiweř SIDI ak-d Musa, inna: 23 “Siweř ak-d Harun d warraw nnes uca ini: ‘Ammu ad tbarkem ayt n Israil uca ad asen tinim: 24 SIDI ad ac ibarek uca ad cek iḥḍa! 25 SIDI ad yarr udem nnes ad xak yegg tfawt uca ad xak iḥinn. 26 SIDI ad ɣarek dd-inneqřeb udem nnes uca ad ac iwc řehna!’ 27 Ad ssiwḍen Isem inu x ayt n Israil u Necc ad ten barkeɣ.’"