Di Řexřa 34

1 Issiweř SIDI ak-d Musa, inna: 2 “Umur ayt n Israil uca ini asen: ‘Xmi ɣa tadfem tammurt n Kenɛan, xenni ta d tammurt i d awem ɣa yiřin d řwart, tammurt n Kenɛan ak-d iymiren nnes ad tiři ammu: 3 Jjihet n ljanub ad ɣarwem tiři zi řexřa n Ṣin ař aymir n Idum uca aymir n ljanub ad ɣarwem yiři zi ṭṭarf aneggaru n Řebḥar Ameǧaḥ di ccarq 4 uca aymir ad imeyyeř zi ljanub ɣar Tsunta n Tɣarḍmiwin uca ad iɛdu ɣar Ṣin uca ṭṭrufa nnes ad dd-awḍen jjihet n ljanub n Qadac-Barniɛ uca ad iɛdu ɣar Ḥaṣar-Addar uca ad iẓwa ɣar Aṣmun. 5 Ad inneḍ weymir zi Aṣmun ɣar Teɣzart n Miṣra uca ṭṭrufa nnes ad awḍen ař řebḥar. 6 Uca aymir n řɣarb ad awem yiři Řebḥar Ameqqran. Wa ad awem yiři d aymir n řɣarb." 7 Wa ad awem yiři d aymir n ccamal: ad t tarcmem i yixef nwem zeg Řebḥar Ameqqran ař adrar n Hur. 8 Zeg wedrar n Hur ad t tarcmem ař mani ɣa tawḍed ɣar Ḥamat uca ṭṭrufa n weymir ad awḍen ař Ṣadad. 9 Ad yeɛdu weymir ař Zifrun uca ṭṭrufa nnes ad awḍen ař Ḥaṣar-Ɛinan. Wa ad awem yiři d aymir n ccamal. 10 Ad tarcmem aymir nwem n ccarq zi Ḥaṣar-Ɛinan ɣar Cafam 11 uca ad dd-ihwa weymir zi Cfam ař Ribla, ccarq n Ɛayn. Xenni ad dd-ihwa weymir ɛad ktar uca ad imun ak-d tma n ccarq n Řebḥar n Kinnarat. 12 Xenni ad dd-ihwa weymir ɣar L’Urdun uca ṭṭrufa nnes ad awḍen ař Řebḥar Ameǧaḥ. Ta ad awem tiři d tammurt ak-d iymiren nnes i d as dd-innḍen." 13 Uca Musa yumur ayt n Israil, inna: “Ta d tammurt nni i ɣa tebḍam jar awem s tqedduḥt, tenni x yumur SIDI ad temmewc i tesɛa n tqebbař u i wezyen n teqbič n Manassa. 14 Minzi taqbič n ayt n Rubin tᵉttwasettef ɛlaḥsab taddart n ibabaten nsen u taqbič n Jad tᵉttwasettef ɛlaḥṣab taddart n ibabaten nsen, aqa nitni ṭṭfen ɛad tasɣart nsen, u azyen n teqbič n Manassa tᵉṭṭef uřa d nettat tasɣart nnes n řwart. 15 Tnayen n tqebbař d wezyen aqa ṭṭfent řwart nsent ɣar ujemmaḍ n L’Urdun, zi Ariḥa ɣar ccarq ɣar manis dd-tneqqar tfuct." 16 Issiweř SIDI ak-d Musa, inna: 17 “Ina d ismawen n yeryazen inni i ɣa ibḍan tammurt jar awem: Akehhan Aliɛazar d Yacuwa, mmis n Nun. 18 Ad teksim ɛawed ijj n řḥakem zi kuř taqbič maḥend ad tebḍam tammurt. 19 Ina d ismawen n yeryazen: i teqbič n Yahuda, Kalib, mmis n Yafunni 20 i teqbič n ayt n Cimɛun, Cimuwil, mmis n Ɛammihud, 21 i teqbič n Binyamin, Ilidad, mmis n Kaslun, 22 i teqbič n ayt n Dan, řḥakem Buqqi, mmis n Yujli, 23 i teqbič n ayt n Yusuf: i teqbič n ayt n Manassa, řḥakem Ḥanniyil, mmis n Ifud, 24 i teqbič n ayt n Ifrayim, řḥakem Qimuyil, mmis n Cifṭan, 25 i teqbič n ayt n Zabulun, řḥakem Iliṣafan, mmis n Farnax, 26 i teqbič n ayt n Issakar, řḥakem Falṭiyil, mmis n Ɛazzan, 27 i teqbič n ayt n Acir, řḥakem Axihud, mmis n Calumi, 28 i teqbič n ayt n Naftali, řḥakem Fadahyil, mmis n Ɛammihud." 29 Ina d inni x yumur SIDI ad bḍan řwart i ayt n Israil di temmurt n Kenɛan.