Mixa 5

1 “U cek, Bayt-Laḥm Ifrata, waxxa cek d ameẓyan ařami war tzemmared ad tiřid jar řuřuf n Yahuda, aqa zzayek i dd ɣa iffeɣ Netta i Necc, maḥend ad yiři d Řḥakem x Israil. Abani nnes aqa-t zi mecḥař uya, zeg wussan n řebda. 2 S uya Netta ad ten isellem ař řweqt nni, aqa tenni i ɣa yarwen, aqa turuw-dd. Xenni ad dd-idweř řbaqi n yaytmas, jmiɛ ak-d ayt n Israil. 3 Netta ad ibedd dinni uca ad yarwes di jjehd n SIDI, di řuɛřa n Yisem n SIDI, AREBBI nnes. Nitni ad zedɣen dinni, maɣar Netta ad yiři d ameqqran ař ineggura n temmurt. 4 Wanita ad yiři d Řehna.” “Xmi dd ɣa yas Accur ɣar temmurt nneɣ, u xmi dd ɣa yadef ɣar řeqṣur nneɣ, xenni ad as nesseřqa sebɛa n imeksawen d tmenya n ayt n jjehd zi midden. 5 Nitni ad ḥḍan x temmurt n Accur s ssif u tammurt n Nimrud di tewwura nnes. Ammu Netta ad aneɣ issenjem zeg ufus n Accur, xmi dd ɣa yas wanita ɣar temmurt nneɣ u xmi dd ɣa yadef ɣar wudem n temmurt nneɣ.” Řbaqi n Yaɛqub 6 “Řbaqi n Yaɛqub ad yiři di řwesṭ n řegnus amecnaw nnda n SIDI, amecnaw tiddumin x wefsu aziza, wenni war ixezzaren ɣar uřa d ijj n weryaz u war ittrijin tarwa n bnadem. 7 Řbaqi n Yaɛqub ad yiři jar řegnus, di řwesṭ n řegnus, amecnaw ayrad jar řmař n yezɣar, amecnaw ayrad d ameẓyan jar tḥimriwin n wuǧi, wenni, xmi ɣa iɛdu, iɛeffes u ittcarrag uca war din uřa d ijj i ɣa ifekken. 8 Afus nnec ad yiři ittwassgeɛɛed sennej i yinni i cek iḥeṣṣaren, uca marra řɛedyan nnec ad ttwamḥan." 9 “Ad imsar deg wass nni, ammu i iqqar SIDI, aqa Necc ad teḥḥiɣ iysan nnec zi řwesṭ nnec u ad sshellkeɣ ikarruten nnec. 10 Ad mḥiɣ tineddam zi temmurt nnec, ad hedmeɣ marra lqelɛat nnec. 11 Necc ad qeḍɛeɣ taseḥḥart nnec zeg ufus nnem u war ɣarek ttiřin ɛad ibezgawen. 12 Řexyařat nnem ineqcen d imayḍuten nnec iqeddsen ad ten mḥiɣ zi řwest nnec, ḥima war tᵉttbendaqed ɛad i řxedmet n ifassen nnec. 13 u tirebbin nnec n cwarti ad tent teḥḥiɣ zi řwesṭ nnec. Maca ad hedmeɣ řɛedyan nnec 14 uca ad ntaqmeɣ s weɣḍab u s wesɛar x řegnus nni war ittexsen ad sřen."