Izřan s Igejduren 5

1 Ɛqeř, a SIDI, x min i d aneɣ imsaren, xzar-dd u wařa řḥegra nneɣ. 2 Tewḍa tesɣart n řwart nneɣ i ibarraniyyen, uřa d tudrin nneɣ ruḥent tt ɣar midden. 3 Neccin nedweř d iyujiřen břa babatneɣ, tiyemmatin nneɣ dewřent am tijjař. 4 Aman nneɣ nsess i-ten s tmenyat, akeccuḍ nneɣ nettxeǧaṣ xas. 5 Ḍeffaren aneɣ x yiri nneɣ, neccin nemmut s řweḥřan, maca war d aneɣ jjin arraḥet. 6 Aqa nsarreḥ afus ɣar Miṣra, ɣar Accur, maḥend ad nejjiwen aɣrum. 7 Ibabaten nneɣ xḍan, war ǧin ɛad. U neccin narebbu řmuɛṣiyyet nsen. 8 Imsexxaren ddebbaran xaneɣ, uřa d ijj war d aneɣ issenfekki zeg ifassen nsen. 9 Neccin nsebbeř tudart nneɣ maḥend ad dd-nawi aɣrum nneɣ, zi ssibbet n ssif di řexřa. 10 Tiřmect nneɣ tᵉtteḥduduq am tefqunt, zi řḥaduq n tmessi n řaẓ. 11 Ssxargen timɣarin di Ṣihyun, uřa d tiɛzariyyin di tneddam n Yahuda. 12 Řḥukkam yuyřen ten s ifassen n yixef nsen, iwessura war ten weqqaren ɛad. 13 Iryazen ijehden qaɛ arebbun iẓra n tsirt, u iḥudriyyen ttneqraḍen sadu řeḥmeř n ukeccuḍ. 14 Imɣaren ssbedden aɣimi di tewwura n tendint, iḥudriyyen ssbedden zeg uzenzun nsen x ifiřan. 15 Tweddar řefraḥet n wuř nneɣ, ccḍiḥ nneɣ s nnubtat idweř d acḍan. 16 Iwḍa aneɣ tajj x uzeǧif nneɣ. Uct xaneɣ, maɣar neccin nexḍa. 17 S uyenni ihřec wuř nneɣ aṭṭas, s uyenni bbarecnent tiṭṭawin nneɣ, 18 zi ssibbet n wedrar n Ṣihyun nni ittwaxarrben, mani ttawyen ttarran iceɛbawen. 19 Cek, a SIDI, ad teqqimed i řebda, řkursi igellden nnec aqa-t zi jjiř ař jjiř. 20 Mayemmi texsed Cek ad aneɣ tᵉttud i řebda? Mayemmi i dayneɣ tsemḥed qaɛ anect uya n wussan? 21 A SIDI, arr aneɣ-dd ɣarek, xenni ad ɣarek dd-nedweř. Arr aneɣ-dd ussan nneɣ d jdid am zic. 22 Maɣar ma s tidett tenḍared aneɣ kuřci? Ma teffugmed xaneɣ ammu qaɛ?