Ayub 7

1 Ma war din iǧi umenɣi ittxeṣṣa ad t immneɣ bnadem x temmurt, ma war ǧin wussan nnes am wussan n ucewwař? 2 Am mammec ittmeẓri imseɣ ɣar tiři, ammu ittraja ucewwař řmunet, 3 S uya dewřen iyuren ccuren s ubarreq d tasɣart inu u ǧyaři ccurent s tamara bḍan ayi tent. 4 Xmi ttezzřeɣ ttᵉṭṭṣeɣ, qqareɣ ‘Meřmi zemmareɣ ad kkareɣ, meřmi i ɣa teɛdu ǧiřet?’ Jjiwneɣ s řeḥweř ař d yeffu řḥař. 5 Arrimet inu tyarḍ deg ikeccawen u di teqcurin n ucař, tiřmect inu tqeṭṭa u tᵉttgeyyeḥ. 6 Deɣya x umekkuk n uxeyyaḍ ɛeddun wussan inu, ɛeddun břa řayas. 7 Ɛqeř, aqa tudart inu d asuḍi n nnefs waha u tiṭṭ inu war tẓarr ɛemmarṣ ɛad min iṣebḥen. 8 Tiṭṭ n wenni d ayi ittwařan, war d ayi tẓarr ɛad. Tiṭṭawin nnec ad xafi iřint, maca nnec war da ttiřiɣ ɛad. 9 Am mammec ittdurruq useynu, iɛeddu, ammu i ɣa ihwa di řaxart, war zzayes dd-ittgeɛɛid ɛad. 10 Ɛemmarṣ war dd-ittɛiqqib ɣar taddart nnes, ɛemmarṣ war xas itteɛqiř wemcan nnes. 11 Ammu i war tteqqneɣ aqemmum inu, ad ssiwřeɣ di řeḥṣaret n buḥbeř inu, ad cetciɣ di tarzugi n řeɛmar inu. 12 Ma necc d řebḥar niɣ d řhaycet, aqa Cek tessbedded xafi aɛessas? 13 Mařa nniɣ necc: ‘Tassut ad ayi tɛezza, qama inu ad xafi tessehwen acetci inu!’, 14 ammu id ayi tᵉttɣezzid s tirjiwin u s iweḥḥan tessaggʷaded ayi, 15 ařami idweř řeɛmar inu ittixḍar ajeyyef, ittixḍar řmewt x yeysan inu. 16 Necc ttɛiffiɣ man aya, war ttexseɣ ad ddareɣ i řebda. Arxu zzayi, maɣar ussan inu am asuḍi n nnefs waha. 17 Min iɛna bnadem aqa Cek tḥessbed t d ameqqran ammu, aqa teřhid akides s wuř nnec? 18 Aqa Cek tarezzfed ɣares qaɛ ateffu, tqeǧbed i-t qaɛ tazeḥziht? 19 Mecḥař ɛad war zzayi tᵉttekksed tiṭṭawin, war d ayi tarexxud ḥima ad ssɣeřyeɣ ikuffan inu? 20 Ma xḍiɣ? Min d ac i ɣa ggeɣ i Cek, i Cek a-y-aɛessas n bnadem? Mayemmi d ayi tessbedded d taḥjurt zzatek, u dewřeɣ d ddqeř i yixef inu? 21 Mayemmi war d ayi tɣeffared axeṭṭu inu, u war tɛeddud x řmuɛṣiyyet inu? Maɣar deɣya ad zzřeɣ di tɛejjajt u Cek ad xafi tarzud, maca war ttiřiɣ ɛad.