Ayub 5

1 Řaɣa maca! Ma din ca n yijjen i xak dd ɣa yarren? Ɣar man zeg imqeddasen i ɣa tsewḍed? 2 Minzi axeyyeq ineqq abuhaři, u tusmi tneqq aqubbani. 3 Ẓriɣ ijj n ubuhaři iḍřeq i weẓwar, maca x ict n řɣefřet tuɣa ittxeṣṣa ad neɛřeɣ tazeddiɣt nnes. 4 Iggʷejen iḥenjiren nnes x usenjem, ttwaddzen ɣar tewwart n tendint uca war tuɣi din wi ten i ɣa ifekken, 5 umi icca umehyuf ṣṣabet nnes - wah, wanita issuffeɣ i-t-i-dd ɛad zeg isennanen - u isarḍ uxewwan agřa nsen. 6 Maɣar war iǧi zi tɛejjajt i zi dd-ittekk řɣar u zi temmurt war dd-tɣemmi tamara, 7 maca bnadem d wenni dd-ittwaxeřqen i tamara, am geɛɛdent tceɛɛařin n tmessi maḥend ad ḍwint. 8 Mři ufiɣ ad arzuɣ ɣar Arebbi, ad ssiwḍeɣ tamesřact inu ɣar AREBBI, 9 wenni itteggen timesřayin timeqqranin, war din wi tent i ɣa ifehmen, ittegg lmuɛjizat i war izemmar ad ttwaḥesbent. 10 Issakkʷaḍ anẓar x wudem n temmurt, uca issekka aman x wudem n iyyaren, 11 ḥima ad issgeɛɛed imwaḍɛen, uca inni iceḍnen ad ten ssuɛřan ɣar řaman. 12 Netta issbeṭṭeř ixarriṣen n iḥraymiyyen, ařami ifassen nsen war zemmaren ad ggen walu. 13 Imiɣisen imenneɛ i-ten di teḥraymect nsen, ittwassbeṭṭeř ccwar n iḥraymiyyen. 14 Deg uziř mmsagaren ak-d taǧest uca di ṭṭḥa n uziř ttfafan am ttfafan di ǧiřet. 15 Netta issenjam zi ssif i dd-itteffɣen zeg uqemmum nsen, uřa d amezřuḍ zeg ufus n wenni ijehden. 16 Ammu i yeǧa řayas i umezřuḍ uca ddeǧ ad ibelleɛ aqemmum nnes. 17 Xzar, sseɛd n weryaz wenni iseggem Arebbi. S uya war tesseḥqiri ca ttarbiyyet n Umzemmar x kuřci! 18 Maɣar Netta issyezzim ayi s ijj n uyezzim itteqqsen uca xenni ittcedda, iccat uca xenni ifassen nnes ssgenfan. 19 Di setta n řeḥṣarat ad cek ifekk, di tenni wiss sebɛa war cek iřeqqef řɣar. 20 Di řaẓ ad cek issenjem zi řmewt, deg umenɣi zi tiyyita n ssif. 21 Ad tiřid di řaman zzat i urekkuḍ n yiřes, war tᵉtteggʷeded ca zeg wareddeǧ mařa yusa-dd. 22 X wareddeǧ d řaẓ tzemmared ad tḍeḥced, zi řewḥuc n řexřa n temmurt war tᵉtteggʷeded, 23 maɣar tqeḍɛed řɛahd ak-d iẓra n yeyyar, xenni řewḥuc n řexřa ad kidek ddaren di řehna. 24 Ad targbed aqa řehna d aqiḍun nnec, ad tbeqqced tazeddiɣt nnec, ad tafed war cek ittxeṣṣi walu. 25 Cek ad tessned aqa arraw nnec aṭṭas, u ddurryet nnec am wefsu aziza n temmurt. 26 Ad tadfed ɣar wenḍeř di tewsar, am mammec ssgeɛɛden ijj n uɛurric n tqebbiḍin n imendi ɣar unedrar di řḥař nnes. 27 Xzar, man aya, aqa neccin narzu dayes, ammu i teǧa! Seř ɣares, ssen i-t deg yixef nnec!