Ayub 31

1 Necc ggiɣ řɛahd ak-d tiṭṭawin inu, mammec i ɣa xzareɣ xenni di teɛzarect? 2 Maɣar min iǧan xenni tasɣart n Arebbi zi sennej, niɣ tasɣart n řwart n Umzemmar x kuřci zeg ijenwan yuɛřan? 3 Ma war iǧi aḍeyyeɛ ikkar-dd i uɛeffan, arẓiyyet i yinni itteggen řmuɛṣiyyet? 4 Ma war ittwiři Netta ibriden inu, ma war iḥesseb Netta řqedd n marra iṣuraf inu? 5 Mařa tuɣa uyureɣ di řexdeɛ, niɣ iqeǧeq uḍar inu ɣar řɣecc, 6 ejj SIDI ad ayi iwzen xenni di řmizanat iseggden, ařami i ɣa issen Arebbi řeṣfayet inu. 7 Mařa iṣuraf inu ffɣen zeg webrid, uř inu iḍfar tiṭṭawin inu uca xenni iřṣeq řɛib deg ifassen inu, 8 xenni ad zarɛeɣ necc, maca ijjen nneɣni ad icc, u min ɣari dd-iɣemmayen ad ittwaqřeɛ! 9 Mařa uř inu ittwaɣwa ɣar ict n temɣart, niɣ tuɣa ttḥamiɣ ɣar tewwart n wajjar inu, 10 ejj xenni tamɣart inu ad teḥri imendi i yijjen nneɣni, jjem inneɣni ad xas aḍaren. 11 Maɣar aya d řefḍiḥet, d ict n ljarima i xas i ɣa wten řquḍat. 12 Maɣar aya d timessi tᵉttett ař ahellek, tqeǧeɛ marra řɣiǧet inu. 13 Mařa ssḥeqqareɣ řḥeqq n ismeɣ inu d tayya inu, řami tuɣa ttemcubbucen akidi, 14 min i ɣa ggeɣ xenni mařa SIDI ikkar, mařa Netta iqeǧeb ayi, min xas dd ɣa yarreɣ xenni? 15 Wenni d ayi iggin deg uɛeddis n yemma, ma war t iggi uřa d netta? Ma war iǧi d Ijj wenni d aneɣ dd-ixeřqen deg uɛeddis n yemmatneɣ? 16 Mařa qemmḥeɣ ameẓri n imezřaḍ niɣ ssruɣ tiṭṭawin n tajjač, 17 mařa necc mɣir cciɣ ařeqquz n weɣrum inu, am war zzayes icci uyujiř, 18 - maɣar zi temẓi iyma netta ɣari am iyma ɣar babas, zeg uɛeddis n yemma nedheɣ tt - 19 mařa ẓriɣ ijjen ittwahellek minzi war ɣares iǧi warruḍ, niɣ minzi war din iǧi dduri i umezřuḍ, 20 mařa ɛemmarṣ war d ayi barkent tejɛinnatin nnes, minzi igga ad issiḥma ixef nnes s waǧas n tḍuft n izmaren inu, 21 mařa afus inu ihudd x uyujiř, minzi ẓriɣ aqa din twiza i necc ɣar tewwart n tendint, 22 ejj xenni ad ayi tewḍa teɣruḍt inu zeg ijiman, ad ayi yarẓ uɣiř inu zeg yiɣes! 23 Maɣar ad xafi dd-iwḍa unexřiɛ ameqqran, ict n řmuṣibet zi ɣar Arebbi, war zemmareɣ ad ggeɣ walu zzat i Uɛuǧi nnes. 24 Mařa ggiɣ ureɣ d atecři inu, niɣ nniɣ i wureɣ iɣřan aṭṭas: ‘Cek d řaman inu!’, 25 mařa farḥeɣ umi imɣar wagřa inu, umi afus inu iṭṭef aṭṭas d agřa, 26 mařa ẓriɣ tafawt n tfuct xmi tᵉttwesseg, niɣ taziri xmi teggur di tissiqt nnes, 27 uca ittwaɣwa wuř inu s tnuffra, uca aqemmum inu, issudem i-t ufus inu, 28 xenni iři uřa d man aya d řmuɛṣiyyet ad tt wcen i řquḍat, maɣar xenni ad nkareɣ Arebbi nni iǧan sennej. 29 Mařa farḥeɣ i arẓiyyet n wenni d ayi icarrhen, farḥeɣ umi t iřqef řɣar! 30 Necc maca war jjiɣ aneɣ inu ad ixḍa, umi kkwareɣ řeɛmar nnes s nneɛřet! 31 Mařa iryazen nni iǧan deg uqiḍun inu war qqaren: ‘Man wen war ittwassjiwnen zeg yinni iksin zeg weysum nnes?’ 32 Uřa d ijj n řbarrani war issens di barra x webrid, maɣar i umsebrid arzmeɣ tiwwura inu. 33 Mařa necc, am Adam, dřiɣ axeṭṭu inu, umi ssnuffareɣ řmuɛṣiyyet inu deg weḥsin inu, 34 minzi ggʷedeɣ zi řɣaci ameqqran, niɣ issnexřeɛ ayi useḥqar n řwacun inu, ařami qqimeɣ sseɣdeɣ, war ffiɣeɣ ɛad zi tewwart ɣar barra … 35 Mři ɣari ijjen wenni d ayi ɣa isřen. Xzar, acemmiɛ inu - Amzemmar x kuřci ad xafi dd-yarr - uřa d adlis ittwannḍen nni t yura weryaz nni kidi ittemcubbucen. 36 Meɛlik ufiɣ ma war t arebbuɣ x tɣarḍt inu, ad t qqneɣ i uzeǧif inu am yijj n ttaj. 37 Iwa, ad as iniɣ řqedd n iṣuraf inu, ad ɣares dd-qarrbeɣ am yijj n řḥakem. 38 Mařa řeɛraṣi inu isɣuy xafi, iɛeyyaden nnes ad run ak-d wayawya marra, 39 mařa cciɣ ṣṣabet nnes nhřa axeǧeṣ, niɣ ggiɣ řeɛmar n ixemmasen nnes iḍřeq i buḥbeř, 40 ejj xenni ad iɣmi cbarq ak-d isennanen deg wemcan n yirden, uřa d řeɛcub yarṣuden deg wemcan n imendi. Aqa da i qḍan wawařen n Ayub.