Ayub 24

1 Mayemmi war ttwassnuffarent řmijařat n uxeǧeṣ s ufus n wenni iǧan d Amzemmar x kuřci, mayemmi war ttwiřin inni t issnen ussan nnes n nneqmet? 2 Nitni ssmuṭṭuyen řehdud, ttacaren taḥimart uca arekkwsen tt. 3 Aɣyuř n iyujiřen ssaggʷajen t, ttḥewwsen afunas n tajjač. 4 Nitni ɛarrnen imezřaḍ zeg webrid. Inni ittwaḥṣaren di temmurt ttnuffaren jmiɛ. 5 Xzar, aqa aten am yiɣyař n řexřa. Tteffɣen ɣar řxedmet nsen, arezzun taneymart. Řexřa iwca as macca i iḥenjiren nsen. 6 Deg iyyar ḥettcen řeḥtic nnes, řeqqḍen deg umarjeɛ n uḍiř n iɛeffanen. 7 Ssɛeddun ǧiřet d iɛaryanen, nhřa arruḍ, war ɣarsen bu dduri di teṣmeḍ. 8 Zeg wenẓar iccaten zeg idurar ttuffen, ttcebbaren di jjarf maɣar war ɣarsen adurri. 9 Zeg iffan n yemmatsen ttekksen ayujiř, uca ttᵉṭṭfen aḍman zeg umezřuḍ. 10 Gguren d iɛaryanen, nhřa arruḍ, am ǧuẓen arebbun icuwwafen n imendi. 11 Jar řeḥyuḍ ttɛessaren zzect, ɛeffsen x tsirt n uḍir, maca ttɣiman ffuden. 12 Zi tendint itteffeɣ-dd řḥess n useɣnef n yeryazen, řeɛmar n yinni issuffɣen buḥbeř isɣuyyu deg ujenna. Waxxa amenni Arebbi war iḥeṭṭi min war iḥřin. 13 Inneɣni d imɣewwɣen x tfawt, war ssinen ibriden nnes, war ttɣimin di tibridin nnes. 14 Qbeř dd-tusa tfawt, ittekkar uqettař, ineqq řmeskin d umezřuḍ u di ǧiřet igga am uxewwan. 15 Tiṭṭ n uzennay tḥeṭṭa taǧest. Iqqar: ‘Uřa d ict n tiṭṭ war d ayi tḥeṭṭi!’ Iřeḥḥef i uɣembub nnes. 16 Di taǧest ttadfen ɣar tudrin. S wass ttnuffaren, war ssinen walu x tfawt. 17 Maɣar tuffut tban asen-dd am tiři n řmewt, maɣar ssnen inexřiɛen n tiři n řmewt. 18 Netta d afsus am ukuffu x wudem n waman i yeǧa. Tettwanɛeř tesɣart nsen x temmurt. War itteṭṭef ɛad abrid ɣar imarjaɛen n uḍiř. 19 Řaẓaɣ d řeḥmu qeṭṭan x waman n wedfeř, ammu i tᵉttekkes řaxart uřa d inni ixḍan. 20 Aɛeddis n yemmas ad t ittu, ikeccawen ad zzayes arren meẓri. Ɛemmarṣ war t ttidaren ɛad. Ittwarẓ řɣecc am ict n tfrewt n ukeccuḍ, 21 ammu uřa d wenni itteggen řɣar di temɣart břa tarwa, di tenni war ittirwen, uřa d wenni itteggen min war iḥřin ak-d tajjač. 22 S jjehd nnes issbedda inni ɣar teǧa ṣṣulṭa. Ibedd wanita, maca war issin nican aqa tudart nnes di řaman. 23 Netta iwca as řaman, ařami ɣares dd-tudef ttiqqet, ɛad tiṭṭawin nnes aqa atent x webrid nsen. 24 Ttwassuɛřan i yijj n řḥař d aquḍaḍ, xenni war ǧin ɛad. Ad hwan, ad ttwakksen am marra iwdan, am ixfawen n uɣedduy n yirden ad ttwaqessen. 25 Ma war iǧi amenni? Man wen i d ayi ɣa iṭṭfen ixarriqen, man wen i ɣa issebḍeř řhard inu?