Ḥizqiyal 32

1 Deg useggʷas wiss tenɛac, deg uyur wiss tenɛac, deg wass amezwaru n uyur imsar belli yusa-dd ɣari wawař n SIDI, inna: 2 “A mmis n bnadem, sgeɛɛed ijj n yezři n wecḍan x firɛun, ajeǧid n Miṣra, uca ini as: ‘Tuɣa cek am weyrad d ameẓyan jar řegnus u tuɣa cek am řhaycet di řebḥur. Tɣeḍřed ixef nnec deg iɣezran, tessenhezzed aman s iḍaren nnec uca tessefsad iɣezran nsen.’ 3 Ammu i iqqar Sidi inu, SIDI: ‘Necc ad xak sswiẓẓḍeɣ tracca inu, s yijj n wegraw n řegnus aṭṭas. Nitni ad cek ssiřyen ak-d tracca inu. 4 Necc ad cek jjeɣ di temmurt, ad cek nḍareɣ x wudem n yeyyar. Ad xak sszedɣeɣ marra ijḍaḍ n ujenna uca ad zzayek ssjiwneɣ imuddaren zi marra tammurt. 5 Ad ggeɣ weysum nnec x idurar uca ad ccureɣ tiɣzurin s řegɛudi n warrayem nnec. 6 Necc ad ssesweɣ tammurt ař idurar, s ufeyyeḍ n idammen nnec, uca tiɣezratin ad ccurent zzayek.’ 7 ‘Necc ad ssduryeɣ ajenna xmi cek ɣa ssxesyeɣ. Ad ssbarrecneɣ itran nnes, ad ssduryeɣ tafuct s iseynuten, uca taziri war ttejji ɛad ad tarɣa tfawt nnes. 8 Marra tifawin yareqqen deg ujenna ad tent ssbarrecneɣ di ṭṭweɛ nnec uca ad ssekkeɣ taǧest x temmurt nnec!’, ammu i iqqar Sidi inu, SIDI. 9 ‘Necc ad ɣezziɣ uř n waṭṭas n řegnus, umi i ɣa yawyeɣ řexbar n treẓẓit nnec ɣar řegnus, ɣar temmura i war tent tessined ca. 10 Necc ad ssnexřɛeɣ aṭṭas n řegnus di ssibbet nnec u acuwwaf n ijeǧiden nsen ad geɛɛden zeg warjef di ṭṭweɛ nnec, xmi ɣa ssenhezzeɣ ssif inu ssa d ssa zzat i wudmawen nsen. Nitni ad arjijen řebda, kuř ijj di ssibbet n tudart nnes, deg wass n uweṭṭu nnec.’ 11 Minzi ammu i iqqar Sidi inu, SIDI: ‘Ssif n ujeǧid n Babil ad xak yemmars. 12 S řesyuf n ayt n bu-teɣruḍt ad ɣeḍřeɣ řɣaci nnec inhewřen. Aqa-ten řegnus iqesḥen aṭṭas marra, nitni ad qḍan x nnfaxet n Miṣra uca marra řɣaci nnes inhewřen ad ittwateḥḥa. 13 Necc ad qḍiɣ x imuddaren nnes inni iǧan ɣar waṭṭas n waman, uřa d ijj n uḍar n bnadem ad ten issarwi ɛawed uca uřa d ict n tecḍect n řmař ad ten tessarwi ɛad.’ 14 ‘Xenni ad ssehwiɣ aman nsen ařami i ɣa ṣfan u Necc ad ggeɣ iɣezran nsen ad ssizzřen am zzect!’ … ammu i iqqar Sidi inu, SIDI … 15 ‘… Ařami ggiɣ tammurt n Miṣra d areddeǧ uca ad tiři temmurt tᵉttwareddeǧ, teḥfa zi marra min dayes, ařami wteɣ marra inni dayes izeddɣen, xenni ad ssnen belli Necc d SIDI.’" 16 “Wa d izři n wecḍan uca ad t ɣennjen am yezři n wecḍan, yessitsent n temmura ad t ɣennjent am yezři n wecḍan, ad t ɣennjent am yezři n wecḍan x Miṣra u x marra řɣaci nnes inhewřen!, ammu i iqqar Sidi inu, SIDI.” Iẓri n wecḍan ɣar wenḍeř n firɛun ak-d ubarru nnes 17 Deg useggʷas wiss tenɛac, deg uyur wiss tenɛac, deg wass wiss xemmesṭac n uyur imsar belli yusa-dd ɣari wawař n SIDI, inna: 18 “A mmis n bnadem, wwet agejdur x řɣaci inhewřen n Miṣra. Ejj i-t ad ihwa, Miṣra ak-d yessis n řegnus ijehden, di řaǧaɣ n temmurt, ak-d yinni ihwan deg weḥfur n wenḍeř. 19 Ma cek iɛizzen x man mma? Hwa, ejj ad cek ssarsen ak-d yinni war ittwaxetnen. 20 Ad wḍan di řwesṭ n yinni ittwanɣen s ssif. Aqa immewc ssif. Jarr Miṣra zeg webrid ak-d marra řɣaci nnes inhewřen. 21 Inni ɣar teǧa ṣṣulṭa aṭṭas zeg ayt n bu-teɣruḍt ad ssiwřen akides u ak-d yinni t iɛawanen zi řwesṭ n řaxart. Hwan nitni, aqa zzřen dinni, inni war ittwaxetnen, inni ittwanɣen s ssif.’ 22 ‘Diha iǧa Accur ak-d marra agraw nnes, nnḍen as-dd imeḍřan nnes. Marra nitni ttwanɣen, wḍan s ssif. 23 Imeḍřan nnes aqa aten di tɣemmar n weḥfur n wenḍeř u agraw nnes aqa-t deg wenneḍ n wenḍeř nnes. Marra nitni ttwassnuqqben, wḍan s ssif, inni tuɣa issaggʷaden di temmurt n yinni iddaren.’ 24 ‘Diha Ɛilam d marra řɣaci nnes inhewřen deg wenneḍ n wenḍeř nnes. Marra nitni ttwassnuqqben, wḍan s ssif, hwan břa axtan di řaǧaɣ n temmurt, inni tuɣa issaggʷaden di temmurt n yinni iddaren. Nitni iwyen řefḍiḥet nsen akidsen, ak-d yinni ihekkwan deg weḥfur n wenḍeř. 25 Ggin as ijj n wemcan n arraḥet di řwest n yinni ittwanɣen, ɣar marra řɣaci nnes inhewřen. Imeḍřan nnes nnḍen as-dd. Marra nitni war ittwaxetnen, wḍan s ssif, minzi tuɣa ssaggʷaden iwdan di temmurt n yinni iddaren. Nitni iwyen řefḍiḥet nsen akidsen, jmiɛ ak-d yinni ihekkwan deg weḥfur n wenḍeř. Aqa netta ittwassars di řwest n yinni ittwanɣen.’ 26 Diha Macix-Tubal d marra řɣaci nnes inhewřen. Nnḍen as-dd imeḍřan nnes. Marra nitni war ttwaxetnen, ttwassnuqqben s ssif, maɣar nitni tuɣa ssaggʷaden iwdan di temmurt n yinni iddaren. 27 Inni iwḍan zeg yinni war ittwaxetnen war zziřen ak-d ayt n bu-teɣruḍt nni ihwan ɣar řaxart ak-d řesnaḥ nsen n umenɣi. Mmarsen řesyuf nsen sadu izeǧifen nsen uca řmuɛṣiyyet nsen aqa-tt x yeysan nsen, waxxa tuɣa nitni d tiggʷudi i ayt n bu-teɣruḍt di temmurt n yinni iddaren. 28 Uřa d cek ad tiřid tarẓed di řwesṭ n yinni war ittwaxetnen uca ad tezzřed ak-d yinni ittwassnuqben s ssif.’ 29 ‘Diha Idum, ijeǧiden nnes d marra řḥukkam nnes, inni i din ittwaggen s marra ṣṣulta nsen ak-d yinni ittwassnuqqben s ssif. Zzřen dinni ak-d yinni war ittwaxetnen u ak-d yinni ihwan deg weḥfur n wenḍeř.’ 30 ‘Diha ayt n bu-ṣṣulṭa zi ccmal, marra nitni, u marra ayt n Ṣidun, inni ihwan ak-d yinni ittwanɣen. Aqa ttseḍḥan dinni, waxxa tuɣa ssaggʷaden iwdan s teryast nsen n ayt n bu-teɣruḍt. Aqa zzřen dinni břa axtan ak-d yinni ittwanɣen s ssif uca arebbun řefḍiḥet nsen ak-d yinni ihwan deg weḥfur n wenḍeř.’ 31 ‘Firɛun ad ten iẓar uca ad ittwassfewwej zi marra řɣaci nnes inhewřen, inni ittwassnuqqben s ssif, Firɛun d marra řɛeskar nnes,’ ammu i iqqar Sidi inu, SIDI, 32 ‘minzi Necc jjiɣ t ad issiggʷed inni di temmurt n yinni iddaren. Netta ad immars di řwesṭ n yinni war ittwaxetnen, ɣar yinni ittwassnuqqben s ssif, Firɛun d marra řɣaci nnes inhewřen,’ ammu i iqqar Sidi inu, SIDI."