1 Imezruyen 27

1 Ina d ayt n Israil ak-d řqedd nsen, izeǧifen x ibabaten n řaǧat, uřa d imeqqranen x wařef u x mya ak-d imeḥḍayen nsen, inni tuɣa ittsexxaren i ujeǧid di marra timesřayin n terbiɛin, am zi jjihet n man wen i dd-ittasen, am zi jjihet n man wen ittraḥen, u man aya zeg uyur ař uyur nneɣni di marra iyuren n useggʷas. Ict n terbiɛt dayes arebɛa u-ɛicrin-ařef n yeryazen. 2 Yasubɛam, mmis n Zabdiyil, tuɣa x terbiɛt tamezwarut i uyur wiss amezwaru. Tarbiɛt nnes dayes arebɛa u-ɛicrin-ařef n yeryazen. 3 Netta tuɣa zeg warrawen n Fariṣ. Netta d akumandar ameqqran x marra ikumandaren n řɛeskarat deg uyur amezwaru. 4 Duday, Axuxi, tuɣa x terbiɛt n uyur wiss tnayen. Miqlut d ameḥḍay n terbiɛt nnes. Tarbiɛt nnes dayes arebɛa u-ɛicrin-ařef n yeryazen. 5 Banaya, mmis n Yahuyadaɛ, akehhan ameqqran tuɣa d akumandar wiss třata n řɛeskar i uyur wiss třata. Tarbiɛt nnes dayes arebɛa u-ɛicrin-ařef n yeryazen. 6 Banaya wa tuɣa d bu-teɣruḍt n třatin u netta tuɣa x třatin. Mmis Ɛammizabad tuɣa x terbiɛt nnes. 7 Ɛasa’il, mmis n Yuwab, d wiss arebɛa i uyur wiss arebɛa u mmis Zabadya tuɣa awarni as. Tarbiɛt nnes dayes arebɛa u-ɛicrin-ařef n yeryazen. 8 Camḥut, Ayazraḥi, akumandar, tuɣa x terbiɛt wiss xemsa i uyur wiss xemsa. Tarbiɛt nnes dayes arebɛa u-ɛicrin-ařef n yeryazen. 9 Ɛira, mmis n Ɛiqqis, Atiqquɛi, tuɣa d wiss setta i uyur wiss setta. Tarbiɛt nnes dayes arebɛa u-ɛicrin-ařef n yeryazen. 10 Ḥaliṣ, Afalituni, zeg warrawen n Ifrayim, tuɣa d wiss sebɛa i uyur wiss sebɛa. Tarbiɛt nnes dayes arebɛa u-ɛicrin-ařef n yeryazen. 11 Sibkay, Aḥucati, n Izaraḥiyyen, tuɣa d wiss tmenya i uyur wiss tmenya. Tarbiɛt nnes dayes arebɛa u-ɛicrin-ařef n yeryazen. 12 Abiɛazar, Aɛanatuti, n ayt n Binyamin, tuɣa d wiss tesɛa i uyur wiss tesɛa. Tarbiɛt nnes dayes arebɛa u-ɛicrin-ařef n yeryazen. 13 Maharay, Anaṭufati, i Izaraḥiyyen, tuɣa d wiss ɛecra i uyur wiss ɛecra. Tarbiɛt nnes dayes arebɛa u-ɛicrin-ařef n yeryazen. 14 Banaya, Afarɛatuni, zeg warrawen n Ifrayim, tuɣa d wiss ḥiṭac i uyur wiss ḥiṭac. Tarbiɛt nnes dayes arebɛa u-ɛicrin-ařef n yeryazen. 15 Xalday, Anaṭufati, i dd-iqqarṣen zi Ɛutniyil, tuɣa d wiss tenɛac i uyur tenɛac. Tarbiɛt nnes dayes arebɛa u-ɛicrin-ařef n yeryazen. Imeqqranen n tqebbař 16 Ina bedden x tqebbař n Israil: I Irubiniyyen tuɣa Iliɛazar, mmis n Zikri, d řḥakem. I Icamɛuniyyen: Cafaṭya, mmis n Maɛka. 17 I Lawi: Ḥacabya, mmis n Qamuwil. I Harun: Ṣaduq. 18 I Yahuda: Ilihu, zeg aytmas n Dawud. I Issakar: Ɛumri, mmis n Mixayil. 19 I Zabulun: Yicmaɛya, mmis n Ɛubadya. I Naftali: Yarimut, mmis n Ɛazaryil. 20 I warrawen n Ifrayim: Ḥuciɛa, mmis n Ɛazarya. I wezyen n teqbič n Manassa: Yuwil, mmis n Fadaya. 21 I wezyen n teqbič n Manassa di Jilɛad: Jaddu, mmis n Zakariyya. I Binyamin: Yaɛisiyil, mmis n Abnir. 22 I Dan: Ɛazaryil, mmis n Yaruḥam. Ina tuɣa d řḥukkam n tqebbař n Israil. 23 Dawud war iksi ca řqedd n yinni ɣar iǧa ɛicrin n iseggʷusa d swadday, maɣar SIDI tuɣa inna aqa Netta ad yarr Israil deg waṭṭas am yitran n ujenna. 24 Yuwab, mmis n Ṣaruya, tuɣa ibda ad iḥseb řgens, maca war t ikemmeř umi dd-yusa uduqqez d ameqqran n weɣḍab x Israil. S uyenni war ittwagg řqedd deg wedlis n imezruyen n ujeǧid Dawud. Iwkiřen n ujeǧid 25 Ɛazmawet, mmis n Ɛadiyil, tuɣa x ixxamen n txubay n ujeǧid. Yunatan, mmis n Ɛuzziya, tuɣa x ixxamen n txubay n temmurt, di tneddam, di dcurat u di lburjat. 26 Ɛazri, mmis n Kalub, tuɣa iṭṭef acbar x mammec ggin řxedmet deg iyyar ḥima ad carzen acař. 27 Cimɛi, Aramati, tuɣa iṭṭef acbar x imarjaɛen n uḍiř. Zabdi, Acifmi, tuɣa x zzad n binu nni iǧan deg imarjaɛen n uḍiř. 28 Baɛl-Ḥanan, Ajadiri, tuɣa iṭṭef acbar x iḥwicen n zzitun u x izemmuren nni iǧan di Temmurt Iwaṭan. Yuwac tuɣa x zzad n zzect. 29 Ciṭray, Acaruni, tuɣa iṭṭef acbar x ifunasen d tfunasin, inni ihedda di řewḍa n Carun. Cafat, mmis n Ɛalay, tuɣa x ifunasen d tfunasin di řewḍat n teɣzurt. 30 Ubil, Asmaɛili, tuɣa iṭṭef acbar x iřeɣman. Yaḥadya, Amirunuti, tuɣa x tiɣyař. 31 Yaziz, Ahajri, tuɣa iṭṭef acbar x wuǧi. Nitni marra tuɣa aten d imeḥḍayen x wagřa nni iǧan n ujeǧid Dawud. 32 Yunatan, ɛemmis n Dawud, tuɣa d amcawar, ijj n bnadem d amiɣis. Netta tuɣa ɛawed d amarir. Yaḥiyil, mmis n Ḥakmuni, tuɣa ɣar warrawen n ujeǧid, yarebba i-ten. 33 Axitufil tuɣa d amcawar n ujeǧid, u Ḥucay, Ayarki, tuɣa d ameddukkeř n ujeǧid. 34 Yahuyadaɛ, mmis n Banaya, d Abyatar tuɣa aten awarni i Axitufil. Yu’ab tuɣa-t d akumandar n řɛeskar n ujeǧid.