إِزهِّيذنْ 81

1 إِ ؤُمقّْرَانْ ن إِمغْنَاجنْ. س ثغْنِينْثْ ن ؤُجِيتِّي، أَرْيَازْ زِي جَاثْ. ن أَسَافْ. 2 سْڒِيوْڒمْ إِ أَربِّي، جّهْذْ نّغْ، ذُوقّْزمْ س ؤُسْڒِيوْڒوْ إِ أَربِّي ن يَاعْقُوبْ. 3 سْڭعّْذمْ إِشْثْ ن يزْڒِي ن ؤُصبّحْ، أَوِي أَبنْذِيرْ، ڒْْڭَامْبْرِي مِيژِيذْ ذ لهَارْبَا. 4 سُوضمْ ذڭْ ؤُيِيشّْ ن إِشَارِّي غَارْ ؤُبذِّي ن ؤُيُورْ، غَارْ ثْزِيرِي إِقفْڒنْ، غَارْ وَاسّْ ن ڒْعِيذْ نّغْ. 5 مَاغَارْ ثَا ذ ثَاوْصيّثْ إِ إِسْرَائِيل، إِشْثْ ن لْفَارِيضَا ن أَربِّي ن يَاعْقُوبْ. 6 إِڭَّا إِ-ت ذ شّْهَاذثْ ذِي يُوسُوفْ، ڒَْامِي د-إِفّغْ ضِيدّْ إِ ثمُّورْثْ ن مِيصْرَا. أَقَا سْڒِيغْ إِجّْ ن يِيڒسْ وَارْ ذ أَسْ فهْمغْ. 7 ثَاغْرُوضْثْ نّسْ فكّغْ ت زِي دّْقڒْ، إِفَاسّنْ نّسْ أَرْخُونْ زِي ثْسُودْجثْ إِ ثُوغَا يَاربُّو. 8 شكْ ثْڒَاغِيذْ ذِي ڒحْصَارثْ ؤُ نشّْ فكّغْ شكْ زَّايسْ. نشّْ أَرِّيغْ-د خَاكْ أَمْ تّْنُوفَّارغْ ذڭْ وَاجَّاجْ، غَارْ وَامَانْ ن مَارِيبَا قدْجْبغْ شكْ. سِيلَاهْ. 9 سڒْ، ڒْڭنْسْ إِنُو، خنِّي نشّْ أَذْ شهْذغْ ذِي ڒْوسْطْ نّشْ، أَ إِسْرَائِيل، مَاڒَا خنِّي ثُوغَا ثخْسذْ أَذْ غَارِي د-ثسْڒذْ. 10 وَارْ غَاركْ إِتِّيڒِي إِجّْ ن أَربِّي ذ أَغْرِيبْ، وَارْ سجذْ ؤُڒَا إِ يِيجّْ ن أَربِّي إِ وَارْ ثسِّينذْ. 11 نشّْ ذ سِيذِي، أَربِّي نّشْ، ونِّي شكْ د-إِسُّوفّْغنْ زِي مِيصْرَا. أَرْزمْ أَقمُّونْ نّشْ ؤُ نشّْ أَذْ ث شُّورغْ. 12 مَاشَا ڒْڭنْسْ إِنُو وَارْ إِسْڒِي شَا غَارْ ثْمِيجَّا إِنُو، إِسْرَائِيل وَارْ ذ أَيِي إِخْسْ. 13 س ؤُينِّي جِّيغْ ثنْ إِ وُوڒْ نْسنْ إِقسْحنْ، أَڒَامِي إِ غَا ؤُيُورنْ ذِي ڒشْوَارْ ن ؤُزدْجِيفْ نْسنْ. 14 مْڒِي د-إِسْڒَا غَارِي ڒْڭنْسْ إِنُو، مْڒِي إِسْرَائِيل إِخْسْ أَذْ يُويُورْ ذڭْ إِبْرِيذنْ إِنُو! 15 خنِّي مَامّشْ ذغْيَا إِڒِي قْضِيغْ خْ ڒْعذْيَانْ نْسنْ، أَرِّيغْ أَفُوسْ إِنُو ضِيدّْ إِ يِينِّي ثنْ إِحصَّارنْ. 16 إِنِّي إِشَارّْهنْ سِيذِي أَذْ غَارسْ د-ذوْڒنْ تّْمُورُوذنْ ذدْجنْ، ڒْْوقْثْ ن ؤُخدْجصْ نْسنْ أَذْ يِيڒِي إِ ڒبْذَا. 17 إِڒِي أَقَا إِوْشَا أَسْ مَاشَّا زِي لمْلِيحْ ن يِيرْذنْ، وَاهْ، إِڒِي س ثَامّنْثْ زِي جَّارْفْ أَقَا نشّْ سّْجِّيوْنغْ شكْ.