إِزهِّيذنْ 8

1 إِ ؤُمقّْرَانْ ن إِمغْنَاجنْ. س ثغْنِينْثْ ن ؤُجْتِّي، ورْيَازْ زِي جَاثْ. أَزهّذْ ن ذَاوُوذْ. 2 أَ سِيذِي، أَربِّي نّغْ، مَامّشْ إِجْهذْ يِيسمْ نّشْ خْ مَارَّا ثَامُّورْثْ، شكْ ذ ونِّي إِڭِّينْ لْعَاضَامَا نّشْ سنّجْ إِ إِجنْوَانْ. 3 زڭْ ؤُقمُّومْ ن إِحنْجِيرنْ ذ إِسيْمَانْ، ثڭِّيذْ ذْسَاسْ إِجْهذْ زِي سِّيبّثْ ن يِينِّي شكْ إِحصَّارنْ، حِيمَا أَذْ ثْبلّْعذْ أَبْرِيذْ خْ ڒعْذُو ؤُ خْ ونِّي يَارزُّونْ أَذْ إِخْڒفْ. 4 مَاڒَا ثْوَاڒِيغْ أَجنَّا، ڒْْخذْمثْ ن إِضوْضَانْ نّشْ، ثَازِيرِي ذ يثْرَانْ، إِنِّي ثڭِّيذْ، 5 مِينْ إِعْنَا خنِّي بْنَاذمْ، أَقَا شكْ ثْخَارّْصذْ ذَايسْ، مِّيسْ ن بْنَاذمْ، أَقَا شكْ ثْخزَّارذْ غَارسْ؟ 6 شكْ ثَارِّيذْ ث مْغِيرْ شْوَايْثْ وَاهَا قلّْ إِ أَربِّي، ثوْشِيذْ أَسْ تَّاجْ ن ؤُعُودْجِي ذ ڒْعزّْ. 7 شكْ ثَارِّيذْ ث أَذْ إِحْكمْ خْ ثْمڭَّا ن إِفَاسّنْ نّشْ، ثسَّارْسذْ مَارَّا سْوَادَّايْ إِ إِضَارنْ نّسْ: 8 ؤُدْجِي ذ إِفُونَاسنْ، مَارَّا إِنَا، ؤُڒَا ذ ڒْمَاڒْ ن ييَّارْ، 9 إِجْضَاضْ ن ؤُجنَّا ذ إِسڒْمَانْ ن ڒبْحَارْ، مَارَّا مِينْ إِتّْشُوقَانْ إِبْرِيذنْ ن ڒبْحُورْ. 10 أَ سِيذِي، سِيذِيثْنغْ، مَامّشْ إِجْهذْ يِيسمْ نّشْ ذِي مَارَّا ثَامُّورْثْ!