إِزهِّيذنْ 60

1 إِ ؤُمقّْرَانْ ن إِمغْنَاجنْ. س ثغْنِينْثْ ن ‘ثَالِيلّشْثْ ذ أَشهَّاذْ’. ثِيرَا إِنقْشنْ ن ذَاوُوذْ إِ ؤُسڒْمذْ. 2 خْ ڒَامِي ثُوغَا إِتّْمنْغَا أَكْ-ذ إِمزْذَاغْ ن أَرَامْ-نَاهْرَايْنْ، أَقَا-ت ذ مِيسُوپُوثَامْيَا، ؤُ أَكْ-ذ أَيْثْ ن أَرَامْ زِي صُوبَا، ؤُمِي د-إِذْوڒْ يُووَابْ، إِوْثَا أَيْثْ ن إِذُومْ ذِي ثغْزُورْثْ ن ثْمدْجَاحْثْ،عشْرَا أَڒَافْ ن يرْيَازنْ. 3 أَ أَربِّي، شكْ ثنْضَارضْ أَنغْ، ثَارْژِيذْ أَنغْ. ثُوغَا ثسْعَارذْ أَطَّاسْ! سْبدّْ أَنغْ عَاوذْ! 4 شكْ ثسّنْهزّذْ ثَامُّورْثْ، ثْفدْجْقذْ ت. سْڭنْفَا ثِيرژَّا نّسْ، مَاغَارْ أَقَا ثتّنْهزَّا. 5 شكْ ثسّشْنذْ إِخفْ نّشْ إِ ڒْڭنْسْ نّشْ س ڒقْسَاحثْ. شكْ ثوْشِيذْ أَنغْ أَذْ نْسُو شّْرَابْ إِسّْذوَّاخنْ. 6 إِنِّي شكْ إِتّڭّْوذنْ، ثڭِّيذْ أَسنْ ثَاعدْجَانْثْ إِ غَارْ تّْرَاكّْوَاڒنْ زِي فْڒِيثْشَاثْ ن ڒْقوْسْ. سِيلَاهْ. 7 حِيمَا إِمْعِيزّنْ نّشْ أَذْ تّْوَافكّنْ، أَوِي أَسنْجمْ س ؤُفُوسْ أَفُوسِي نّشْ ؤُ أَرّْ-د خَانغْ. 8 أَربِّي ثُوغَا إِسَّاوَاڒْ ذِي زَّاوشْثْ نّسْ إِقدّْسنْ، س ؤُينِّي أَذْ نڭْزغْ س ڒفْرَاحثْ. نشّْ أَذْ بْضِيغْ شَاكِيمْ، أَذْعبَّارغْ ثَاغْزُورْثْ ن سُوكُّوثْ. 9 جِيلْعَاذْ إِنُو، مَانَاسَّا إِنُو، إِفْرَايِيمْ ذ أَسڒْقِي إِجهْذنْ ن ؤُزدْجِيفْ إِنُو، يَاهُوذَا ذ أَمْڭوّذْ إِنُو. 10 مُوآبَ ذ سَّارِيجْ إِنُو إِ ؤُسِيرْذْ، خْ إِذُومْ أَذْ نْضَارغْ سَانْذَالِييَاثْ إِنُو، نشّْ أَذْ دُّوقْزغْ س ؤُسْڒِيوْڒوْ خْ ثمُّورْثْ ن فِيلِيشِيثْ. 11 وِي ذ أَيِي إِ غَا إِنذْهنْ ذِي ثنْذِينْثْ إِفَارْينْ؟ وِي ذ أَيِي غَا إِڭوّْذنْ غَارْ إِذُومْ؟ 12 مَا وَارْ ذ أَنغْ ثنْضَارذْ، أَ، أَربِّي، ؤُ أَكْ-ذ ڒْعسْكَارَاثْ نّغْ مَا وَارْ أَكِيذْسنْ د-ثفِّيغذْ عَاذْ، أَ أَربِّي؟ 13 أوْشْ أَنغْ أَفُوسْ حِيمَا أَذْ أَنغْ ثسّْنجْمذْ زِي ڒحْصَارثْ، مَاغَارْ أَسنْجمْ س ؤُفُوسْ ن يِيجّْ ن بْنَاذمْ أَقَا-ث بَاطڒْ. 14 أَكْ-ذ أَربِّي أَذْ نڭّْ س ومْحَاذْ، نتَّا أَذْ إِعْفسْ خْ يِينِّي ذ أَنغْ إِحصَّارنْ.