إِزهِّيذنْ 54

1 إِ ؤُمقّْرَانْ ن إِمغْنَاجنْ. أَكْ-ذ ؤُزنْزُونْ خْ إِفِيڒَانْ. أَخمِّي ن ذَاوُوذْ. 2 ڒَْامِي د-ؤُسِينْ إِزِيفِييّنْ، نَّانْ أَسْ إِ شَاوُولْ: “مَا وَارْ إِسّْنُوفَّارْ ذَاوُوذْ إِخفْ نّسْ غَارْنغْ؟" 3 سنْجمْ أَيِي، أَ أَربِّي، س يِيسمْ نّشْ، أَغْ أَيِي ثَاسْغَارْثْ س ثْزمَّارْ نّشْ إِجهْذنْ. 4 أَ أَربِّي، سڒْ إِ ثْژَادْجِيثْ إِنُو، سْحسّْ إِ وَاوَاڒنْ ن ؤُقمُّومْ إِنُو. 5 مَاغَارْ إِبَارَّانِييّنْ كَّارنْ أَكِيذِي، أَيْثْ ن بُو-ڒخْشُونثْ أَرزُّونْ أَذْ أَيِي نْغنْ. وَارْ تّڭّنْ شَا أَربِّي زَّاثْ إِ ثِيطَّاوِينْ نْسنْ. سِيلَاهْ. 6 خْزَارْ، أَربِّي ذ أَمْعَاونْ إِنُو. سِيذِي إِنُو أَقَا-ث جَارْ يِينِّي ذ أَيِي إِسنّْذنْ. 7 نتَّا أَذْ إِخدْجصْ ڒْغَارْ إِ يِينِّي ذ أَيِي إِحصَّارنْ. قْضَا خَاسنْ ذِي ڒَامَانْ نّشْ. 8 س ڒْخَاضَارْ أَذْ أَشْ د-أَوْيغْ ثِيغَارْصَا، أَذْ قَاذِيغْ إِسمْ نّشْ، أَ سِيذِي، مَاغَارْ نتَّا ذ أَصبْحَانْ، 9 مَاغَارْ نتَّا إِفكّْ أَيِي زِي مَارَّا ڒحْصَارثْ، ؤُشَا يَارَّا أَيِي-د أَذْ خزَّارغْ خْ ڒْعذْيَانْ إِنُو سْوَادَّايْ.