إِزهِّيذنْ 5

1 إِ ؤُمقّْرَانْ ن إِمغْنَاجنْ. أَكْ-ذ ثمْجَا. أَزهّذْ ن ذَاوُوذْ. 2 أَ سِيذِي، سڒْ إِ مِينْ غَا إِنِيغْ، فهْمثْ إِ ؤُنِيخْسسْ إِنُو. 3 حكَّارْ إِ ثْمِيجَّا ن ثُوثْرَا إِنُو، أَ أَجدْجِيذْ إِنُو ذ أَربِّي إِنُو، أَقَا إِ شكْ ؤُمِي تّْژَادْجِيغْ. 4 غَارْ ثُوفُّوثْ، أَ سِيذِي، ثسْڒِيذْ شكْ إِ ثْمِيجَّا إِنُو، غَارْ ثُوفُّوثْ نّْقڒْبغْ-د غَاركْ، ؤُشَا قِّيمغْ تّْرَاجِيغْ شكْ. 5 شكْ وَارْ ثدْجِيذْ شَا ذ أَربِّي نِّي إِتّخْسنْ ثُوعفّْنَا، بْنَاذمْ أَعفَّانْ وَارْ غَاركْ إِتِّيفْ أَغِيمِي. 6 إِبُوحَاڒِييّنْ وَارْ تّْغِيمِينْ تّْبدَّانْ زَّاثْ إِ ثِيطَّاوِينْ نّشْ، شكْ ثْشَارّْهذْ مَارَّا إِنِّي إِتّڭّنْ ڒْغَارْ. 7 أَذْ ثْهلّْكذْ أَيْثْ ن بُو-إِخَارِّيقنْ، سِيذِي إِتّْعِيفَّا أَرْيَازْ ن إِذَامّنْ ذ ڒْغشّْ. 8 مَاشَا س ڒمْغَارثْ ن ثْمخْسِيوْثْ نّشْ إِشوَّارنْ أَذْ أَذْفغْ غَارْ ثَادَّارْثْ نّشْ، أَذْ سجْذغْ غَارْ زَّاوشْثْ نّشْ ثَامقّْرَانْثْ س ثِيڭّْوُوذِي زَّايكْ. 9 أَ سِيذِي، سُويُورْ أَيِي خْ وبْرِيذْ ن ثْسڭْذَا نّشْ، ذِي طّْوعْ ن يِينِّي إِ ذ أَيِي إِحصَّارنْ، سڭّمْ أَبْرِيذْ نّشْ زَّاثْ إِ وُوذمْ إِنُو. 10 مِينْزِي ذڭْ ؤُقمُّومْ نْسنْ وَارْ ذِينْ بُو ڒَامَانْ، جُّوفْ نْسنْ ذ أَخيّبْ، ثْمِيجَّا نْسنْ ذ أَنْضڒْ يَارزْمنْ، أَربُّونْ ثْخَانْشثْ س يِيڒسْ نْسنْ. 11 خْڒفْ زَّايْسنْ، أَ أَربِّي، أجّْ إِ-ثنْ أَذْ وْضَانْ س ڒشْوَارْ ن يِيخفْ نْسنْ، أَژّڒْ خَاسنْ ذِي سِّيبّثْ ن وَاطَّاسْ ن إِخطَّانْ نْسنْ، مِينْزِي نِيثْنِيغوّْغنْ خَاكْ. 12 مَارَّا إِنِّي غَاركْ يَاركّْوَاڒنْ أَذْ فَارْحنْ، أَذْ سْڒِيوڒْونْ إِ ڒبْذَا. شكْ ثْفَارْيذْ خَاسنْ! أَقَا إِنِّي إِتّخْسنْ إِسمْ نّشْ أَذْ نڭْزنْ س ڒفْرَاحثْ إِ غَارْسنْ ذَايكْ. 13 مِينْزِي شكْ، أَ سِيذِي، أَذْ ثْبَارْكذْ أَمْسڭَّاذْ، أَذْ أَسْ ثْقُووَّارذْ س ؤُحِينِّي أَمْ س ثْسدَّارْثْ ن ؤُسڒْقِي ثَامقّْرَانْثْ.