إِزهِّيذنْ 36

1 إِ ؤُمقّْرَانْ ن إِمغْنَاجنْ. زڭْ ؤُمْسخَّارْ ن سِيذِي. ن ذَاوُوذْ. 2 إِسَّاوَاڒْ ؤُخطُّو ن ؤُعفَّانْ ذَاخڒْ ذڭْ وُوڒْ إِنُو: “وَارْ غَارسْ ثِيڭّْوُوذِي ن أَربِّي زَّاثْ إِ ثِيطَّاوِينْ نّسْ." 3 مِينْزِي أَخطُّو-يَا إِسّْحِينَّابْ إِ-ث ذِي ثِيطَّاوِينْ نّسْ، أَقَا يُوفَا ڒْمُوعْصِييّثْ نّسْ ثَارَّا إِ-ث-إِ-د غَارْ وشْرَاهْ. 4 أَوَاڒنْ ن ؤُقمُّومْ نّسْ أَقَا أَثنْ ذ ڒْغشّْ ذ وشْمَاثْ، نتَّا إِسّْبدّْ حِيمَا أَذْ يَارْزُو ڒفْهَامثْ حِيمَا أَذْ إِڭّْ ڒْخَارْ. 5 إِتّْخمّمْ ذِي ڒْغشّْ ذِي قَامَا نّسْ، إِڭُّورْ أَذْ إِبدّْ ذڭْ إِجّْ ن وبْرِيذْ وَارْ إِصبْحنْ. ڒْغَارْ وَارْ ث إِتّْمنْضِيرْ. 6 أَ سِيذِي، ثَامخْسِيوْثْ نّشْ إِشوَّارنْ ثتَّاكّْوَاضْ أَڒْ ذَاخڒْ ن إِجنْوَانْ، ڒَْامَانْ نّشْ أَڒْ إِسيْنُوثنْ. 7 ثَاسڭْذَا نّشْ ثڭَّا أَمْ يِيذُورَارْ ن أَربِّي، ڒحْكَامَاثْ نّشْ أَمْ وَامَانْ إِهوْڒنْ. سِيذِي إِسّنْجَامْ بْنَاذمْ ذ ڒْمَاڒْ. 8 مشْحَاڒْ ثِيغْڒَا ثْمخْسِيوْثْ نّشْ إِشوَّارنْ، أَ أَربِّي! س ؤُينِّي أَركّْوَاڒنْ غَاركْ ثَارْوَا ن بْنَاذمْ، غَارْ ثِيڒِي ن وَافْرِيونْ نّشْ. 9 تّْوَاسْجَاوْننْ س ؤُفيّضْ س ثَاذُونْثْ ن ثَادَّارْثْ نّشْ، إِغْزَارْ س نّْعَامِي نّشْ ثوْشذْ أَسنْ مَاحنْذْ أَذْ زَّايسْ سْونْ. 10 مَاغَارْ غَاركْ إِ إِدْجَا ڒْعُونْصَارْ ن ثُوذَارْثْ، ذِي ثْفَاوْثْ نّشْ أَقَا نتّْوَاڒَا ثَافَاوْثْ. 11 سْوِيژّضْ ثَامخْسِيوْثْ نّشْ إِشوَّارنْ خْ يِينِّي إِ شكْ إِسّْننْ، ثَاسڭْذَا نّشْ خْ يِينِّي إِ غَارْ إِدْجَا وُوڒْ إِسڭّْمنْ. 12 وَارْ تّجِّي أَذْ خَافِي د-يَاسْ ؤُضَارْ ن أَيْثْ ن بُو-نّْفَاخثْ، وَارْ تّجِّي أَفُوسْ ن إِعفَّاننْ أَذْ أَيِي د-يَارّْ أَذْ ثلّْعغْ مَانِي مَا. 13 أَقَا ذِينْ إِ وْضَانْ، إِنِّي إِتّڭّنْ ڒْمُوعْصِييّثْ، تّْوَاغضْڒنْ غَارْ ثمُّورْثْ، وَارْ زمَّارنْ عَاذْ أَذْ كَّارنْ عَاوذْ.