إِزهِّيذنْ 20

1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ. 2 أَذْ خَاكْ د-يَارّْ سِيذِي ذڭْ وَاسّْ ن ڒحْصَارثْ، أَذْ شكْ إِسِّيزْذغْ إِسمْ ن أَربِّي ن يَاعْقُوبْ ذڭْ ومْشَانْ يُوعْڒَانْ إِفَارْينْ. 3 أَذْ أَشْ إِوْشْ أَفُوسْ زِي زَّاوشْثْ إِقدّْسنْ، أَذْ شكْ د-إِعَاونْ زِي صِيهْيُونْ. 4 أَذْ شكْ يِيذَارْ ذِي ثوْهِيبِينْ ن ڒْغِيدْجثْ نّشْ، أَذْ ثِيڒِي ثْغَارْصْثْ ن وشْمَاضْ نّشْ أَمْ ثَاذُونْثْ إِ نتَّا. سِيلَاهْ. 5 أَذْ أَشْ إِوْشْ عْلَاحْسَابْ مِينْ إِمّژْرِي وُوڒْ نّشْ، أجّْ إِ-ث أَذْ إِكمّڒْ مَارَّا إِنْوَاينْ نّشْ. 6 نشِّينْ أَذْ نسْڒِيوْڒوْ خْ ؤُسنْجمْ س ؤُفُوسْ نّشْ، أَذْ نسُّوعْڒَا إِبَانْذُوثنْ ذڭْ يِيسمْ ن أَربِّي نّغْ. أَذْ إِسّْجِيونْ سِيذِي مَارَّا مژْرِي نّشْ. 7 ڒخُّو سّْنغْ، أَقَا سِيذِي أَذْ يَاوِي أَسنْجمْ إِ ؤُمذْهُونْ نّسْ. نتَّا أَذْ ث-إِ-د-يَارّْ زڭْ إِجنْوَانْ ن زَّاوشْثْ نّسْ إِقدّْسنْ، س ثْمڭَّا ثِيمقّْرَانِينْ ن ؤُسنْجمْ س ؤُفُوسْ أَفُوسِي نّسْ. 8 إِنَا تّْخَارَّاصنْ ذڭْ إِكَارُّوثنْ ؤُ إِنَا ذڭْ إِيْسَانْ، مَاشَا نشِّينْ أَذْ نْخَارّصْ ذڭْ إِسمْ ن سِيذِي، أَربِّي نّغْ. 9 نِيثْنِي ؤُضَارنْ ؤُشَا وْضَانْ، نشِّينْ نكَّارْ ؤُ نقِّيمْ نْبدّْ. 10 أَ سِيذِي، أَوِي-د أَسنْجمْ! أجّْ أَذْ أَنغْ د-يَارّْ ؤُجدْجِيذْ ذڭْ وَاسّْ إِ ذِي نْڒَاغَا.