إِزهِّيذنْ 17

1 ثَاژَادْجِيثْ ن ذَاوُوذْ. أَ سِيذِي، سڒْ غَارْ ثْسڭْذَا، أڭّْ ڒْبَاڒْ إِ ؤُغُويِّي إِنُو، أوْشْ أَمزُّوغْ خْمِي تّْژَادْجِيغْ س إِينْشِيشنْ وَارْ زَّايْسنْ د-إِتّكّْ شَا ڒْغشّْ. 2 أجّْ ڒْحقّْ إِنُو أَذْ إِفّغْ زِي زَّاثْ إِ وُوذمْ نّشْ، أجّْ ثِيطَّاوِينْ نّشْ أَذْ خزَّارنْثْ غَارْ مِينْ إِدْجَانْ إِسڭّْذنْ. 3 شكْ ثْقدْجْبذْ ؤُڒْ إِنُو، ثَارْزُوذْ ذَايسْ سْ دْجِيڒثْ. ثْجَارّْبذْ أَيِي، مَاشَا وَارْ ثُوفِيذْ وَالُو. مَاڒَا نْوِيغْ أَذْ خَارّْصغْ ذِي شَا وَارْ إِحْڒِي، وَارْ إِتّفِّيغْ زڭْ إِينْشِيذنْ إِنُو. 4 خْ مِينْ تّڭّنْ إِوْذَانْ، أَقَا نشّْ حْضِيغْ إِخفْ إِنُو زِي ثبْرِيذِينْ ن أَيْثْ ن بُو-ڒخْشُونثْ، عْلَاحْسَابْ أَوَاڒْ زڭْ إِينْشِيشنْ نّشْ. 5 أڭّْ إِصُورَافْ إِنُو ذِي جُّورَّاثْ ن إِضَارنْ نّشْ، حِيمَا وَارْ فَارّْغنْ إِضَارنْ إِنُو. 6 نشّْ ڒَاغِيغْ خَاكْ، مِينْزِي شكْ أَذْ خَافِي د-ثَارّذْ، أَ أَربِّي، أوْشْ أَيِي أَمزُّوغْ، سڒْ إِ مِينْ غَا إِنِيغْ. 7 سْشنْ ڒعْجَايبْ ن ثْمخْسِيوْثْ نّشْ إِشوَّارنْ، شكْ ذ ونِّي إِسّنْجَامنْ إِنِّي غَاركْ يَاركّْوَاڒنْ، شكْ ذ ونِّي ثنْ إِسّنْجَامنْ زڭْ يِينِّي إِتّْغوّْغنْ س ؤُفُوسْ نّشْ أَفُوسِي. 8 حْضَا أَيِي أَمْ مُومُّو ن ثِيطّْ نّشْ، سْنُوفَّارْ أَيِي ذِي ثِيڒِي ن وَافْرِيونْ نّشْ 9 زڭْ إِعفَّاننْ إِنِّي إِخْسنْ أَذْ ذَايِي حْصَارنْ، إِنِّي ذ ڒْعذْيَانْ ن ڒعْمَارْ إِنُو، إِنِّي ذ أَيِي إِتّْقُووَّارنْ. 10 نِيثْنِي بلّْعنْ ؤُڒْ نْسنْ س ثَاذُونْثْ نْسنْ، س ؤُقمُّومْ نْسنْ سَّاوَاڒنْ س نّْفَاخثْ. 11 ڒخُّو قُووَّارنْ عَاذْ إِ إِصُورَافْ نّغْ، ثِيطَّاوِينْ نْسنْ مُّوقّْڒنْثْ مَاحنْذْ أَذْ أَيِي نْضَارنْ غَارْ ثمُّورْثْ. 12 نتَّا يَارْوسْ ذڭْ ويْرَاذْ نِّي إِمژّْرنْ مَاحنْذْ أَذْ إِمزّقْ ثَايْمَارْثْ نّسْ، ذڭْ إِجّْ ن ويْرَاذْ ذ أَمژْيَانْ إِ إِقِّيمنْ ذڭْ إِمُوشَانْ إِنُّوفَّارنْ. 13 كَّارْ، أَ سِيذِي، رُوحْ مْسَاڭَارْ أَكِيذسْ، غْضڒْ-إِ-ث غَارْ ثمُّورْثْ. فكّْ ڒعْمَارْ إِنُو س سِّيفْ نّشْ زڭْ ؤُعفَّانْ، 14 س ؤُفُوسْ نّشْ زڭْ إِرْيَازنْ، أَ سِيذِي، زڭْ إِرْيَازنْ ن دُّونشْثْ-أَ نِّي غَارْسنْ ثُوذَارْثْ-أَ ذ ثَاسْغَارْثْ نْسنْ، إِنِّي زِي ثتّْعمَّارذْ أَعذِّيسْ نْسنْ س ڒكْنُوزْ إِنُوفَّارنْ، ؤُڒَا ذ إِحنْجِيرنْ نْسنْ تّْوَايَاوَاننْ، تّجَّانْ مِينْ إِشطّنْ إِ ثَارْوَا نْسنْ. 15 نشّْ أَذْ ژَترغْ ؤُذمْ نّشْ ذِي ثْسڭْذَا، أَذْ ذوْڒغْ جِّيوْنغْ س وَادُّوذْ نّشْ خْمِي د غَا فَاقغْ.