إِزهِّيذنْ 147

1 هَالِّيلُو-يَاهْ، مَاغَارْ أَزهّذْ إِ أَربِّي نّغْ ذ أَصبْحَانْ، مِينْزِي إِتَّاسْ-د أَكِيذسْ أَذْ أَسْ نْصبّحْ. 2 سِيذِي إِبنَّا ؤُرْشَالِيمْ، إِسّْمُونْ إِمّنعْرَاقْ ن إِسْرَائِيل. 3 نتَّا إِسّْڭنْفَا إِنِّي غَارْسنْ ؤُڒْ يَارْژنْ، إِتّْشدَّا إِيزِّيمنْ نْسنْ إِتّقْسنْ. 4 إِحسّبْ قدَّا ن إِثْرَانْ، إِتّْڒَاغَا ثنْ مَارَّا س يِيسمْ. 5 سِيذِيثْنغْ ذ أَمقّْرَانْ ؤُ جّهْذْ نّسْ إِمْغَارْ. ڒعْقڒْ نّسْ وَارْ غَارسْ بُو ڒعْبَارْ. 6 سِيذِي إِتّْسنّذْ إِمْوَاضْعنْ، إِسّْهكّْوَا إِعفَّاننْ أَڒْ ثَامُّورْثْ. 7 قَاذَامْ سِيذِي س ؤُغنّجْ، زهّْذمْ إِ أَربِّي نّغْ س ڒْڭَامْبْرِي. 8 نتَّا ذ ونِّي إِدَّاڒنْ أَجنَّا س إِسيْنُوثنْ، ذ ونِّي إِسّوْجَاذنْ أَنْژَارْ إِ ثمُّورْثْ، ذ ونِّي إِسّْغمَّاينْ أَرْبِيعْ خْ إِذُورَارْ. 9 ذ ونِّي إِتِّيشنْ إِ ڒْمَاڒْ مَاشَّا نّسْ، ؤُڒَا إِ ثَارْوَا ن إِبَاغْڒِيونْ خْمِي غَا سْغُوينْ. 10 نتَّا وَارْ يَارطِّي س جّهْذْ ن ؤُيِيسْ، إِضَارنْ ن ورْيَازْ وَارْ ذ أَسْ تّعْجِيبنْ. 11 يَارطَّا أَسْ إِ سِيذِي إِنِّي ث إِتّڭّْوذنْ، إِنِّي إِسِّيثْمنْ ذِي ثْمخْسِيوْثْ نّسْ إِشوَّارنْ. 12 أَ ؤُرْشَالِيمْ، صبّحْ إِ سِيذِي، أَ صِيهْيُونْ، صبّحْ إِ أَربِّي نّمْ. 13 مَاغَارْ نتَّا إِسّمْحذْ زّكْرُونَاثْ ن ثوُّورَا نّشْ، إِبَاركْ إِحنْجِيرنْ نّشْ ذِي ڒْوسْثْ نّشْ، 14 نتَّا إِوْشَا ڒهْنَا إِ إِيْمِيرنْ نّشْ، إِسّْجِيونْ إِ شكْ س مِينْ إِصبْحنْ قَاعْ ن يِيرْذنْ. 15 نتَّا إِسّكَّا ثِيوَاڒِينْ نّسْ غَارْ ثمُّورْثْ، أَوَاڒْ نّسْ إِتَّازّڒْ أَطَّاسْ. 16 إِتِّيشْ أَذْفڒْ أَمْ ثْضُوفْثْ، إِزُّوزَارَا نّْذَا إِڭرْسنْ أَمْ يِيغّضْ. 17 إِسّكَّا أَذْفڒْ نّسْ ذ إِبْقُوقنْ، وِي إِزمَّارنْ أَذْ إِقِّيمْ إِبدّْ زَّاثْ إِ ثسْمُوضِي نّسْ؟ 18 إِسّكَّا أَوَاڒْ نّسْ ؤُشَا إِتَّارَّا إِ-ثنْ أَذْ فسْينْ، نتَّا إِتّجَّا أَسمِّيضْ نّسْ إِتّْسُوضْ، خنِّي تُّوشْرُورنْ وَامَانْ. 19 نتَّا إِبَارّحْ إِ يَاعْقُوبْ أَوَاڒنْ نّسْ، إِ إِسْرَائِيل ثِيوصَّا نّسْ ذ لْفَارَايِيضْ نّسْ. 20 ؤُڒَا إِ يِيجّْ ن ڒْڭنْسْ نّغْنِي وَارْ ذ أَسْ إِڭِّي أَمُّو، نِيثْنِي وَارْ سِّيننْ شَا لْفَارَايِيضْ نّسْ. هَالِّيلُو-يَاهْ!