إِزهِّيذنْ 145

1 إِزْڒِي ن ؤُصبّحْ ن ذَاوُوذْ. أَلِيفْ. أَ، أَربِّي إِنُو، أَجدْجِيذْ، نشّْ أَذْ شكْ سّْعُودْجغْ، أَذْ بَارْكغْ إِسمْ نّشْ إِ ڒبْذَا قَاعْ. 2 بِيثْ. كُوڒْ أَسّْ أَذْ شكْ بَارْكغْ، أَذْ سّمْغَارغْ إِسمْ نّشْ إِ ڒبْذَا قَاعْ. 3 ڭِيملْ. سِيذِي ذ أَمقّْرَانْ، إِسّْذِيهدْجْ أَسمْغَارْ أَطَّاسْ، ڒمْغَارثْ نّسْ وَارْ ذَايسْ بُو ثَارزُّوثْ. 4 ذَالِيثْ. جِّيڒْ أَوَارْنِي جِّيڒْ أَذْ إِسّمْغَارْ ڒخْذَايمْ نّشْ، أَذْ بَارّْحنْ س ثْمڭَّا نّشْ ثِيمقّْرَانِينْ. 5 هِي. نشّْ أَذْ سِّيوْڒغْ خْ ثِيسِّيقْثْ ن ؤُعُودْجِي ن لْعَاضَامَا نّشْ، خْ ڒخْبَارْ ن لْمُوعْجِيزَاثْ نّشْ. 6 وَاوْ. نِيثْنِي أَذْ سِّيوْڒنْ خْ جّْهذْ ن ثْمڭَّا نّشْ إِسَّاڭّْوَاذنْ، نشّْ أَذْ بَارّْحغْ س ڒمْغَارثْ نّشْ. 7 زَايِينْ. ڒِيذَارثْ ن ثْشُونِي نّشْ إِفيّْضنْ أَذْ ت ڭّنْ ذ إِجّْ ن ڒْعُونْصَارْ إِتّْشُورْشُورْ، أَذْ سْڒِيوْڒِيونْ إِ ثْسڭْذَا نّشْ. 8 خِيثْ. سِيذِي ذ أَرْحِيمْ ذ أَحْنِينْ، غَارسْ تَّاسِيعْ ن ڒْخَاضَارْ ذ وَاطَّاسْ ن ثْمخْسِيوْثْ إِشوَّارنْ. 9 ثِيث. سِيذِي ذ أَصبْحَانْ إِ مَارَّا، أَرّحْمثْ نّسْ أَقَا-ت ثِيوَا مَارَّا ثِيمڭَّا نّسْ. 10 يُوذْ. مَارَّا ثِيمڭَّا نّشْ، أَ سِيذِي، أَذْ شكْ قَاذِينْثْ، إِمْثِيقَّانْ نّشْ أَذْ شكْ بَارْكنْ. 11 كَافْ. نِيثْنِي أَذْ سِّيوْڒنْ خْ ؤُعُودْجِي ن ثْڭلْذِيثْ نّشْ، أَذْ سِّيوْڒنْ خْ ثِيمڭَّا نّشْ ثِيمقّْرَانِينْ، 12 لَامِيذْ. حِيمَا أَذْ بَارّْحنْ س ثْمڭَّا نّسْ ثِيمقّْرَانِينْ إِ ثَارْوَا ن بْنَاذمْ، س ؤُعُودْجِي ن لْعَاضَامَا ن ثْڭلْذِيثْ نّسْ. 13 مِيمْ. ثَاڭلْذِيثْ نّشْ ذ إِشْثْ ن ثْڭلْذِيثْ إِ ڒبْذَا، ڒحْكَامثْ نّشْ أَذْ ثِيڒِي خْ كُوڒْ جِّيڒْ. 14 سَامِيخْ. سِيذِي إِتّْسنّذْ مَارَّا إِنِّي إِوْضَانْ، إِتّْسڭّمْ مَارَّا إِنِّي إِقْوِيسنْ. 15 عَايِينْ. مَارَّا ثِيطَّاوِينْ تّْرَاجَانْثْ شكْ، شكْ ثتِّيشذْ أَسنْ مَاشَّا ذِي ڒْوقْثْ نّسْ إِتّْوَاڭّنْ. 16 بِي. شكْ ثَارزّْمذْ أَفُوسْ نّشْ، ثسّْيَاوَانذْ مَارَّا مِينْ إِدَّارنْ أَكْ-ذ مِينْ إِخْسْ ڒْخَاضَارْ نْسنْ. 17 ثْسَاذِي. سِيذِي أَقَا-ث نِيشَانْ ذِي مَارَّا إِبْرِيذنْ نّسْ، إِتّڭّْ س ثْمخْسِيوْثْ إِشوَّارنْ ذِي مَارَّا ثِيمڭَّا نّسْ. 18 قُوفْ. سِيذِي يُوذسْ إِ مَارَّا إِنِّي خَاسْ إِتّْڒَاغَانْ، مَارَّا إِنِّي خَاسْ إِتّْڒَاغَانْ ذِي ثِيذتّْ. 19 رِيخْ. نتَّا إِڭَّا س ڒْخَاضَارْ إِ مَارَّا إِنِّي ث إِتّڭّْوْذنْ، إِتّسْڒَا إِغُويَّانْ نْسنْ ؤُ إِسّنْجَامْ إِ-ثنْ. 20 شِينْ. سِيذِي إِحطَّا خْ مَارَّا إِنِّي ث إِتّخْسنْ، مَاشَا مَارَّا إِعفَّاننْ إِتّحَّا إِ-ثنْ. 21 ثَافْ. أَقمُّومْ إِنُو أَذْ إِسِّيوڒْ خْ ؤُصبّحْ ن سِيذِي، مَارَّا دَّاثْ أَذْ إِبَاركْ إِسمْ نّسْ إِقدّْسنْ، إِ ڒبْذَا قَاعْ.