إِزهِّيذنْ 140

1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ. 2 فكّْ أَيِي زِي بْنَاذمْ ذ أَعفَّانْ، أَ سِيذِي، حْضَا أَيِي زڭْ ورْيَازْ ن لْعُونْفْ، 3 زڭْ يِينِّي إِتّْخَارَّاصنْ ذڭْ وُوڒْ نْسنْ ذِي ڒْغَارْ، ؤُ سّكَّارنْ إِمنْغَانْ ذِي مَارَّا ؤُسَّانْ. 4 نِيثْنِي سّْقضْعنْ إِڒْسَاونْ نْسنْ أَمْ يِيجّْ ن ؤُفِيغَارْ، سّمْ إِحْمَا أَقَا-ث سَاذُو إِينْشِيشنْ نْسنْ. سِيلَاهْ. 5 حْضَا خَافِي، أَ سِيذِي، زڭْ إِفَاسّنْ ن إِعفَّاننْ، حْضَا أَيِي زڭْ إِرْيَازنْ ن لْعُونْفْ، إِنِّي يَارزُّونْ أَذْ أَيِيغضْڒنْ غَارْ ثمُّورْثْ. 6 أَيْثْ ن بُو-نّْفَاخثْ سّْنُوفَّارنْ خَافِي إِجّْ ن ڒْفخْ، تّْبزَّاعنْ ثِيسغْوِينْ أَمْ يِيشْثْ ن ثْرَاشَّا غَارْ ؤُغزْذِيسْ ن ؤُمسْرَاقْ، أَقَا تّڭّنْ أَيِي ثِيخفْشِينْ. سِيلَاهْ. 7 نشّْ نِّيغْ إِ سِيذِي: “شكْ ذ أَربِّي إِنُو!” سڒْ، أَ سِيذِي، غَارْ ثْمِيجَّا ن ثُوثْرَا إِنُو. 8 أَ سِيذِي، سِيذِي إِنُو، جّهْذْ ن ؤُسنْجمْ إِنُو، ذڒْ أَزدْجِيفْ إِنُو ذڭْ وَاسّْ ن ڒْْحسّْ ن ڒسْنَاحْ. 9 أَ سِيذِي، وَارْ تّجِّي أَعفَّانْ أَذْ يَارّْ مژْرِي. وَارْ تّڭّْ تَّاسِيعْ إِ ونْوَايْ نّسْ إِعفّْننْ، أَڒَامِي غَا سّْعُودْجنْ إِخفْ نْسنْ. سِيلَاهْ. 10 خْ ؤُزدْجِيفْ ن مَارَّا إِنِّي ذ أَيِي د-إِنّْضنْ، إِڒِي أَذْ ثنْ إِذڒْ ؤُشقّفْ ن إِينْشِيشنْ نْسنْ، 11 أجّْ أَذْ خَاسنْ كبّنْ ڒفْحمْ، إِڒِي نتَّا أَذْ ثنْ إِغْضرْ ذِي ثْمسِّي، ذِي ڒْحمْڒَاثْ يُودْجْغنْ، حِيمَا وَارْ تّكَّارنْ عَاذْ. 12 أجّْ أَرْيَازْ إِ إِشقّْفنْ س يِيڒسْ وَارْ إِتّْغِيمِي إِبدّْ خْ ثمُّورْثْ، أجّْ أَذْ إِعَارْنْ ڒْغَارْ ذغْيَا أَرْيَازْ بُو-ڒخْشُونثْ. 13 نشّْ سّْنغْ، أَقَا سِيذِي أَذْ إِسّقْفڒْ دّعْوثْ ن ڒْمُوسَاكِينْ، ڒْحقّْ ن إِمزْڒَاضْ. 14 س ثِيذتّْ، إِمْسڭَّاذنْ أَذْ قَاذَانْ إِسمْ نّشْ، إِنِّي إِڭُّورنْ نِيشَانْ أَذْ قِّيمنْ زَّاثْ إِ وُوذمْ نّشْ.