إِزهِّيذنْ 118

1 غَارْ بدُّو … قَاذَامْ سِيذِي، مَاغَارْ نتَّا ذ أَصبْحَانْ، مَاغَارْ ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا. 2 أجّْ إِسْرَائِيل أَذْ يِينِي: “ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا." 3 أجّْ ثَادَّارْثْ ن هَارُونْ أَذْ ثِينِي “ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا." 4 أجّْ إِنِّي إِتّڭّْوذنْ سِيذِي أَذْ إِنِينْ: “ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا." 5 ذڭْ وبْرِيذْ … ذِي ڒحْصَارثْ ڒَاغِيغْ غَارْ سِيذِي. سِيذِي يَارَّا-د خَافِي، إِوْشَا أَيِي تَّاسِيعْ. 6 سِيذِي أَقَا-ث أَكِيذِي، وَارْ تّڭّْوذغْ شَا، مَاغَارْ مِينْ إِزمَّارْ بْنَاذمْ أَذْ أَيِي إِڭّْ؟ 7 سِيذِي أَقَا-ث أَكِيذِي جَارْ يِينِّي ذ أَيِي إِوْشِينْ أَفُوسْ. نشّْ أَذْ خزَّارغْ غَارْ سْوَادَّايْ خْ يِينِّي ذ أَيِي إِشَارّْهنْ. 8 إِحْڒَا أَذْ أَروْڒغْ غَارْ سِيذِي خْ ؤُثشْڒِي خْ بْنَاذمْ. 9 إِحْڒَا أَذْ أَروْڒغْ غَارْ سِيذِي خْ ؤُثشْڒِي خْ ثَارْوَا ن ثَاصِيڒثْ. 10 مَارَّا ڒڭْنُوسْ نّْضنْ أَيِي-د، نشّْغضْڒغْ ثنْ س يِيسمْ ن سِيذِي. 11 نّْضنْ أَيِي-د، وَاهْ، قُووَّارنْ أَيِي. نشّْغضْڒغْ ثنْ س يِيسمْ ن سِيذِي. 12 نِيثْنِي نّْضنْ أَيِي أَمْ ثْزِيزْوَا، أَقَا أَمْ ثْمسِّي ن إِسنَّاننْ خسْينْ. نشّْغضْڒغْ ثنْ س يِيسمْ ن سِيذِي. 13 شكْ ثْعَارْنذْ أَيِي س ڒقْسَاحثْ أَڒَامِي عْڒَاحَاڒْ وْضِيغْ، مَاشَا سِيذِي إِوْشَا أَيِي أَفُوسْ. 14 سِيذِي ذ جّهْذْ إِنُو ذ أَزهّذْ إِنُو، نتَّا إِذْوڒْ أَيِي ذ أَسنْجمْ. 15 ذڭْ إِقِيضَانْ ن إِمْسڭَّاذنْ إِتّْوَاسڒْ ڒْْحسّْ ن ؤُسْڒِيوْڒوْ ذ ؤُسنْجمْ. أَفُوسْ أَفُوسِي ن سِيذِي إِڭَّا س جّهْذْ. 16 أَفُوسْ أَفُوسِي ن سِيذِي إِتّْوَاسّْڭعّذْ، أَفُوسْ أَفُوسِي ن سِيذِي إِڭَّا س ومْحَاضْ. 17 نشّْ وَارْ تّْمتِّيغْ شَا، أَذْ دَّارغْ، أَذْ بَارّْحغْ ثِيمڭَّا ن سِيذِي. 18 سِيذِي إِوبّخْ أَيِي أَطَّاسْ، مَاشَا وَارْ ذ أَيِي إِوْشِي إِ ڒْموْثْ. 19 غَارْ وَاذَافْ … أَرْزْممْ أَيِي ثِيوُّورَا ن ثْسڭْذَا، أَذْ زَّايْسنْثْ أَذْفغْ، أَذْ قَاذِيغْ سِيذِي. 20 إِنِّي يَارحّْبنْ زڭْ يِينِّي إِتَّاذْفنْ قَّارنْ … ثَا ذ ثَاوَّارْثْ ن سِيذِي، إِمْسڭَّاذنْ أَذْ زَّايسْ أَذْفنْ. 21 نشّْ أَذْ أَشْ قَاذِيغْ ؤُمِي ذ أَيِي ثسْڒِيذْ، ثْذوْڒذْ أَيِي ذ أَسنْجمْ. 22 أَژْرُو إِ وَارْ خْسنْ إِبنَّاينْ، إِذْوڒْ ذ إِخفْ ن ثغْمَارْثْ. 23 وَا يُوسَا-د زِي سِيذِي ؤُ مَانْ أَيَا ذ ڒعْجبْ ذِي ثِيطَّاوِينْ نّغْ. 24 وَا ذ أَسّْ إِ إِڭَّا سِيذِي، أجّْ أَنغْ أَذْ نَارْشقْ ؤُ أَذْ ذَايسْ نْفَارْحْ. 25 أَ سِيذِي، أَوِي-د أَسنْجمْ، أَ سِيذِي، أَوِي-د أَفْڒَاحْ. 26 لْبَارَاكَا إِ ونِّي د غَا يَاسنْ س يِيسمْ ن سِيذِي! نشِّينْ أَذْ كنِّيوْ نْبَاركْ زِي ثَادَّارْثْ ن سِيذِي. 27 أَربِّي ذ سِيذِي نِّي ذ أَنغْ إِڭِّينْ ثَافَاوْثْ. قْنمْ ثَاغَارْصْثْ ن ڒْعِيذْ س إِسغْوَانْ غَارْ وَاشَّاونْ ن ؤُعَالْطَارْ، ڒْمذْبحْ ن وشْمَاضْ. 28 إِنِّي إِتَّاذْفنْ قَّارنْ … شكْ ذ أَربِّي إِنُو، س ؤُيَا أَذْ شكْ قَاذِيغْ، أَ أَربِّي إِنُو، أَذْ شكْ سّْعُودْجغْ. 29 مَارَّا جْمِيعْ … قَاذَامْ سِيذِي، مَاغَارْ نتَّا إِصْبحْ، مَاغَارْ ثَامخْسِيوْثْ نّسْ إِشوَّارنْ ثتّْغِيمَا إِ ڒبْذَا.