أَوَاڒنْ إِوزْننْ 28

1 إِعفَّاننْ تّْرَاكّْوَاڒنْ وَاخَّا وَارْ ذِينِّي وِي إِ-ثنْ إِضَافَّارنْ، مَاشَا إِمْسڭَّاذنْ ذَايْسنْ ثَارْيَاسْثْ أَمْ ن إِجّْ ن وَايْرَاذْ. 2 زِي سِّيبّثْ ن ؤُعذِّي ن ثمُّورْثْ أَقَا ذِينْ أَطَّاسْ ن ڒْحُوكَّامْ نّسْ، مَاشَا س إِجّْ ن بْنَاذمْ س ڒعْقڒْ ذ ثُوسّْنَا، أَذْ ثقِّيمْ صُّولْطَا ثْبدّْ إِ يِيجّْ ن ڒْوقْثْ ذ أَزِيرَارْ. 3 أَرْيَازْ أَمزْڒُوضْ نِّي إِتّْزيَّارنْ خْ إِمَارْخَا، أَمْ ونْژَارْ إِتَّاوْينْ مَارَّا، أَڒْ وَارْ إِتّْغِيمِي عَاذْ وغْرُومْ. 4 إِنِّي إِتّجَّانْ شَّارِيعَا سّمْغَارَانْ أَعفَّانْ، مَاشَا إِنِّي إِحطَّانْ شَّارِيعَا تّْمنْغَانْ أَكِيذْسنْ. 5 إِرْيَازنْ إِعفَّاننْ وَارْ فهّْمنْ ڒْحقّْ، مَاشَا إِنِّي يَارزُّونْ سِيذِي، فهّْمنْ إِ كُوڒْشِي. 6 إِحْڒَا ؤُمزْڒُوضْ نِّي إِڭُّورنْ إِصْفَا، خْ ونِّي إِڭُّورنْ إِفَارْغْ ذِي ثْنَاينْ ن إِبْرِيذنْ، وَاخَّا نتَّا غَارسْ أَڭْڒَا. 7 ونِّي إِحطَّانْ شَّارِيعَا، ذ إِجّْ ن مِّيسْ إِفهّمْ، مَاشَا ونِّي ذ أَمدُّوكّڒْ ن إِملْهَافْ، يَارَّا بَابَاسْ أَذْ إِسضْحَا. 8 ونِّي إِسّمْغَارَانْ أَڭْڒَا نّسْ س أَرِّيبَا ذ وَارْبحْ، إِسّْمُونَا أَيَا إِ ونِّي إِتّْحِينَّانْ خْ إِمزْڒَاضْ. 9 ونِّي إِسّْحيَّاذنْ أَمزُّوغْ نّسْ زڭْ ؤُسدْجِي ن شَّارِيعَا، عَاذْ ثَاژَادْجِيثْ نّسْ ذ نّْعِي. 10 ونِّي إِتَّارَّانْ إِنِّي إِڭُّورنْ نِيشَانْ أَذْ ودَّارنْ خْ إِجّْ ن وبْرِيذْ أَعفَّانْ، نتَّا سِيمَانْثْ نّسْ أَذْ إِوْضَا ذِي ثسْرَافْثْ نّسْ، مَاشَا إِنِّي إِ ذِي ثدْجَا ڒكْمَارثْ أَذْ وَارْثنْ مِينْ إِصبْحنْ. 11 بُو-وَاڭْڒَا إِتّڭّْ إِخفْ نّسْ ذ أَمِيغِيسْ ذِي ثِيطَّاوِينْ نّسْ، مَاشَا إِجّْ ن ؤُمزْڒُوضْ نِّي ذِي ثدْجَا ڒفْهَامثْ، يَارْڭبْ خَاسْ. 12 مَاڒَا أَذْ سْڒِيوْڒِيونْ إِمْسڭَّاذنْ س ڒفْرَاحثْ، أَقَا ذِينْ أَعُودْجِي أَمقّْرَانْ، مَاشَا مَاڒَا كَّارنْ-د إِعفَّاننْ، أَذْ إِسّْنُوفَّارْ بْنَاذمْ إِخفْ نّسْ. 13 ونِّي إِدَّاڒنْ إِخطَّانْ نّسْ، وَارْ إِتّفْڒِيحْ، مَاشَا ونِّي زَّايْسنْ إِنعّْمنْ ؤُ إِتّْحيَّاذْ خَاسنْ، أَذْ يَافْ أَرّحْمثْ. 14 سّعْذْ ن بْنَاذمْ نِّي إِتّْوقَّارنْ بْڒَا أَبذِّي، مَاشَا ونِّي إِسّقْسَاحنْ ؤُڒْ نّسْ، أَذْ إِوْضَا ذِي ڒْغَارْ. 15 أَمْ إِجّْ ن ويْرَاذْ إِتَّارُّوجْذُوذنْ، أَمْ إِجّْ ن دُّوبْ إِتّْڒَاژَانْ إِتَّازّْڒنْ زِي سَّا غَارْ ذِيهَا، أَمُّو إِ إِدْجَا إِجّْ نْ ڒْحَاكمْ أَعفَّانْ خْ إِجّْ ن ڒْڭنْسْ أَمزْڒُوضْ. 16 ڒْحَاكمْ نِّي بْڒَا ڒفْهَامثْ، أَقَا-ث ذ ڒْحَاكمْ خْ وَاطَّاسْ ن ورْبَاحْ س ؤُبعّجْ، مَاشَا ونِّي إِشَارّْهنْ أَرْبحْ، أَذْ إِزُّوڭَّارْثْ ؤُسَّانْ نّسْ. 17 إِجّْ ن بْنَاذمْ إِتّْوَاحْصَارنْ ؤُمِي إِسِّيزّڒْ إِذَامّنْ ن شَا ن يِيجّنْ، أَذْ يَارْوڒْ غَارْ وحْفُورْ ن ونْضڒْ ن يِيخفْ نّسْ. وَارْ تّجِّي حذْ أَذْ ث إِسّْبدّْ! 18 ونِّي إِڭُّورنْ أَبْرِيذْ نّسْ ذِي ڒصْفَايثْ، أَذْ إِنْجمْ، مَاشَا ونِّي إِڭُّورنْ إِفَارْغْ ذِي ثْنَاينْ ن إِبْرِيذنْ، وَارْ إِتّْعطَّارْ أَذْ إِوْضَا. 19 ونِّي إِشَارّْزنْ ثَامُّورْثْ نّسْ، أَذْ إِجَّاونْ س وغْرُومْ، مَاشَا ونِّي إِضفَّارنْ أَرْيَازْ إِخْوَانْ، أَذْ إِجَّاونْ زّڒْضْ. 20 أَرْيَازْ إِ ذِي إِدْجَا ڒَامَانْ أَطَّاسْ أَذْ إِكْسِي أَطَّاسْ ن لْبَارَاكَاثْ، مَاشَا ونِّي إِتّْقدْجِيقنْ حِيمَا أَذْ إِڭّْ أَڭْڒَا، وَارْ إِتّْوِيحْسِيبْ ذ أَمزْذَاڭْ. 21 أَسْفَارْزْ ن وُوذْمَاونْ وَارْ إِشْنِي شَا، مَاغَارْ إِ يِيجّْ ن ؤُڒقُّوزْ ن وغْرُومْ إِزمَّارْ شَا ن ورْيَازْ أَذْ إِخْضَا. 22 أَرْيَازْ س ثِيطّْ ثَاعفَّانْثْ إِتّْقدْجِيقْ غَارْ وَاڭْڒَا، مَاشَا نتَّا وَارْ إِسِّينْ أَقَا ڒخْسسْ أَذْ غَارسْ د-يَاسْ. 23 ونِّي إِتّْعَاقَابنْ إِجّْ ن بْنَاذمْ، أَقَا غَارْ ؤُنڭَّارْ أَذْ يَافْ أَرْضَا كْثَارْ خْ ونِّي إِسّْشَانَانْ ثَاژْيُوضِي س يِيڒسْ نّسْ. 24 ونِّي إِتّْكشَّاضنْ بَابَاسْ نِيغْ يمَّاسْ ؤُشَا إِقَّارْ: “وَارْ إِدْجِي ذ دّنْبْ!"، أَقَا-ث ذ أَشْرِيشْ ن إِجّْ ن بُو-ڒَْاخَارْثْ. 25 ونِّي ذِي إِدْجَا نّْفَاخثْ، إِسّكَّارَا-د أَمْشُوبّشْ، مَاشَا ونِّي إِتّْشَاڒَانْ خْ سِيذِي، أَذْ إِذْوڒْ لَابَاسْ خَاسْ. 26 ونِّي إِتّْشَاڒَانْ خْ وُوڒْ نّسْ، أَقَا ذ أَبُوهَاڒِي، مَاشَا ونِّي إِڭُّورنْ أَبْرِيذْ نّسْ ذِي ثِيغِيثْ، أَذْ إِنْجمْ. 27 ونِّي إِتِّيشنْ إِ إِمزْڒَاضْ، وَارْ ذَايسْ إِتِّيڒِي بُو ڒغْبنْ، مَاشَا ونِّي إِتّقّْننْ ثِيطَّاوِينْ نّسْ، أَذْ إِتّْوَانْعڒْ أَطَّاسْ. 28 مَاڒَا كَّارنْ-د إِعفَّاننْ، خنِّي إِتّْنُوفَّارْ بْنَاذمْ، مَاشَا مَاڒَا تّْوَاهلّْكنْ نِيثْنِي، أَذْ مَّارنْينْ إِمْسڭَّاذنْ.