أَوَاڒنْ إِوزْننْ 20

1 بِينُو ذ إِجّْ ن ؤُمسْثهْزِييْ، شّْرَابْ ذ بُو-سّْضعْ، كُوڒْ إِجّنْ ونِّي زَّايسْ إِ غَا إِودَّارنْ، عمَّارْصْ وَارْ إِذِّيكّْوِيڒْ ذ أَمِيغِيسْ. 2 أَهُوذِّي ن ؤُجدْجِيذْ أَمْ زّْهِيرْ ن وَايْرَاذْ: ونِّي ث إِسّعَارنْ، إِخطَّا أَكْ-ذ ڒعْمَارْ نّسْ. 3 أَسْمَاحْ ذڭْ ؤُمْشُوبّشْ أَقَا ذ شَّانْ إِ ورْيَازْ، مَاشَا كُوڒْ أَبُوهَاڒِي أَذْ إِدُّوقّزْ. 4 زِي ڒْوقْثْ ن ڒخْرِيفْ وَارْ إِشَارّزْ ؤُمعْڭُوزْ، خنِّي أَذْ إِتَّارْ ذِي ڒْوقْثْ ن ثْميْرَا، مَاشَا وَارْ إِتِّيفْ وَالُو. 5 إِخَارِّيصنْ ذڭْ وُوڒْ ن بْنَاذمْ أَمَانْ يُودْجْغنْ، مَاشَا إِجّْ ن ورْيَازْ س ڒفْهَامثْ إِسّنْ أَذْ ثنْ يَايمْ. 6 أَطَّاسْ ن إِوْذَانْ تّْڒَاغَانْ خْ شَا ن إِجّنْ ‘أَمدُّوكّڒْ نْسنْ ذ أَمْثِيقِّي’، مَاشَا أَرْيَازْ ذ أَمْثِيقِّي، مَانْ ونْ ث إِ غَا يَافنْ؟ 7 أَمْسڭّذْ إِڭُّورْ ذِي ڒصْفَايثْ نّسْ، سّعْذْ ن إِحنْجِيرنْ نّسْ إِ إِتّجَّا أَوَارْنِي أَسْ. 8 إِجّْ ن ؤُجدْجِيذْ نِّي إِتّْغِيمَانْ خْ ڒْكُورْسِي ن شّْرعْ، إِتّْصفَّا مَارَّا ڒْغَارْ س ثِيطَّاوِينْ نّسْ. 9 وِي إِزمَّارنْ أَذْ يِينِي: “نشّْ سِّيزذْڭغْ ؤُڒْ إِنُو، نشّْ إِزْذِيڭغْ زِي دّْنُوبْ إِنُو!"؟ 10 إِجّْ ن ڒوْزنْ ذ إِجّْ ن ڒوْزنْ نّغْنِي، إِجّْ ن إِفَا ذ إِجّْ ن إِفَا نّغْنِي، أَقَا أَثنْ س ثْنَاينْ إِذْسنْ ذ نّْعِي إِ سِيذِي. 11 أَحُوذْرِي إِسّْشَانَا ذِي ثْمڭَّا نّسْ، مَا ڒْخذْمثْ نّسْ ثصْفَا نِيغْ أَقَا نِيشَانْ إِ ثدْجَا. 12 أَمزُّوغْ إِتّسْڒَانْ ذ ثِيطّْ إِتّْوَاڒَانْ، سِيذِي إِڭَّا إِ-ثنْ س ثْنَاينْ إِذْسنْ. 13 وَارْ تّخْسْ إِضصْ مَاحنْذْ وَارْ ثذِّيكّْوِيڒذْ ذ أَمزْڒُوضْ، أَرْزمْ ثِيطَّاوِينْ نّشْ، سْيِيونْ إِخفْ نّشْ س وغْرُومْ. 14 ‘وَارْ إِحْڒِي، وَارْ إِحْڒِي!’، إِقَّارْ ؤُمْسوّقْ، مَاشَا مَاڒَا يُويُورْ، أَمُّو إِ إِتّْشنّعْ إِخفْ نّسْ. 15 ؤُرغْ إِدْجَا، ؤُڒَا ذ أَطَّاسْ ن ڒْمَارْجَانْ، مَاشَا إِينْشِيشنْ شُّورنْ س ثُوسّْنَا ذ إِشْثْ ن ڒْقشْعثْ إِغْڒَانْ أَطَّاسْ. 16 مَاڒَا إِجّنْ إِدَّاكّْوَاڒْ ذ أَضْمَانْ إِ يِيجّْ ن ؤُبَارَّانِي، خنِّي كْسِي أَرُّوضْ نّسْ ؤُ كْسِي ث ذ دِّييّثْ إِ يِينِّي وَارْ إِتّْوَاسّْننْ. 17 ذ أَمِيژِيذْ إِ بْنَاذمْ أَغْرُومْ نِّي إِطّفْ س إِخَارِّيقنْ، أَوَارْنِي أَسْ أَذْ إِشُّورْ ؤُقمُّومْ نّسْ س إِقَايَاسنْ. 18 إِخمِّيمنْ تّكْمِيڒنْ س ؤُشَاوَارْ، خْ ؤُينِّي نْذهْ أَمنْغِي س ؤُذبَّارْ. 19 ونِّي إِڭُّورنْ ذَا ذ ذِيهَا س ثخْبَارْجِيثْ، إِتّْعَارَّا مِينْ إِنُّوفَّارنْ، وَارْ ثْسبّبْ أَكْ-ذ ونِّي إِسّْحِينِّيبنْ س إِينْشِيشنْ نّسْ إِصبْهنْ. 20 ونِّي إِ غَا إِنعْڒنْ خْ بَابَاسْ ذ يمَّاسْ، ڒفْنَارْ نّسْ أَذْ إِتّْوَاسّخْسِي ذِي ثَادْجسْثْ ثَابَارْشَانْثْ. 21 مَاڒَا ثَاسْغَارْثْ ثتّْوَاكْسبْ ذغْيَا س ثَازْڒَا ذڭْ ؤُمزْوَارُو، وَارْ د-ثِيوضْ ذ لْبَارَاكَا غَارْ ؤُنڭَّارْ. 22 وَارْ قَّارْ: “نشّْ أَذْ خڒْفغْ ڒْغَارْ!” مَاشَا ثْشڒْ خْ سِيذِي ؤُ نتَّا أَذْ شكْ إِسّنْجمْ. 23 إِجّْ ن ڒوْزنْ ذ إِجّْ ن ڒوْزنْ نّغْنِي، أَقَا أَثنْ ذ نّْعِي إِ سِيذِي، ڒْْمِيزَانَاثْ إِغشّنْ وَارْ دْجِينْ شَا مْلِيحْ. 24 إِصُورَافْ ن إِجّْ ن ورْيَازْ أَقَا أَثنْ ن سِيذِي، خنِّي مَامّشْ غَا يڭّْ بْنَاذمْ أَذْ إِسّنْ أَبْرِيذْ نّسْ؟ 25 أَقَا-ث ذ ڒْفخْ إِ بْنَاذمْ إِ غَا إِڒَاغَانْ س ؤُقدْجقْ ‘أَمْقدّسْ’، ؤُ عَاذْ أَوَارْنِي لْوُوعُوذْ نّسْ إِ إِڭَّا أَذْ إِخَارّصْ. 26 إِجّْ ن ؤُجدْجِيذْ أَمِيغِيسْ إِتّْصفَّا إِعفَّاننْ، إِتّجَّا ثَاجَارَّارْثْ ن ثڒْوِيحْثْ إِتّحْڒُودْجُوضنْ إِ ؤُسَارْوثْ أَذْ خَاسنْ إِعْقبْ. 27 ثْوَارِّيثْ ن نّفْسْ ن بُوحْبڒْ ن بْنَاذمْ ذ ڒفْنَارْ ن سِيذِي نِّي يَارزُّونْ ذِي ذَاخڒْ ن إِخَّامنْ ن ؤُعذِّيسْ. 28 ثَامخْسِيوْثْ إِشوَّارنْ ذ ڒَامَانْ حطَّانْ أَجدْجِيذْ، ؤُ ڒْعَارْشْ نّسْ إِسّجْهذْ إِ-ث س ثْمخْسِيوْثْ إِشوَّارنْ. 29 ثَالْوِيزْثْ ن إِحُوذْرِييّنْ ذ جّهْذْ نْسنْ، ؤُ لْعَاضَامَا ن إِوسُّورَا ذ أَشُوَّافْ إِشَابنْ. 30 إِيزِّيمنْ إِتَّازّْڒنْ س إِذَامّنْ سِّيزْذِيڭنْ بْنَاذمْ زِي ڒْغَارْ، ؤُ ثِييِّيثَا صفَّانْثْ ؤُڒَا ذ ثَاكْرِيشْثْ.