يَاشُووَا 12

1 إِنَا ذ إِجدْجِيذنْ ن ثمُّورْثْ، إِنِّي خْغڒْبنْ أَيْثْ ن إِسْرَائِيل ؤُشَا خنِّي طّْفنْ نِيثْنِي ثَامُّورْثْ نْسنْ ذ ڒْوَارْثْ، أَغِيرِينْ إِ لْ-ؤُرْذُونْ زِي مَانِيسْ إِ ذ ثْنقَّارْ ثْفُوشْثْ، زِي ثغْزَارْثْ ن أَرْنُونْ أَڒْ إِذُورَارْ ن حِيرْمُونْ ذ مَارَّا ڒوْضَا ذِي شَّارْقْ. 2 غَارْ ؤُمزْوَارُو نْسنْ، سِيحُونْ، أَجدْجِيذْ ن إِمُورِييّنْ، ونِّي ثُوغَا إِزدّْغنْ ذِي حَاشْبُونْ، نتَّا إِحْكمْ خْ جّْوَايهْ زِي عَارُوعِيرْ إِ إِدْجَانْ غَارْ ثْمَا ن ثغْزَارْثْ ن أَرْنُونْ، أَڒْ ڒْوسْطْ ن ثغْزَارْثْ، ؤُ خْ وزْينْ ن جِيلْعَاذْ أَڒْ ثِيغْزَارْثْ ن يَابُّوقْ، أَقَا-ث ذ أَيْمِيرْ ن أَيْثْ ن عَامُّونْ، 3 ؤُ خْ ڒوْضَا أَڒْ ڒبْحَارْ ن كِينَّارُوثْ ذِي شَّارْقْ ؤُ أَڒْ ڒبْحَارْ ن ڒوْضَا، ڒبْحَارْ أَمدْجَاحْ، ذِي شَّارْقْ، أَبْرِيذْ ن بَايْثْ-يَاشِيمُوثْ، ؤُ زِي لْجَانُوبْ أَڒْ سْوَادَّايْ إِ ثيْسَارِينْ ن فِيسْجَا. 4 خنِّي ثَامُّورْثْ ن عُوجْ، أَجدْجِيذْ ن بَاشَانْ، ونِّي إِدْجَانْ زِي مِينْ إِقِّيمنْ زڭْ إِرَافَاوِييّنْ، جْوَاهڒْ إِ ثُوغَا إِزدّْغنْ ذِي عَاشْثَارُوثْ ذ إِذْرَاعِي. 5 نتَّا إِحْكمْ خْ إِذُورَارْ ن حِيرْمُونْ، خْ سَالْخَا ؤُ خْ مَارَّا بَاشَانْ أَڒْ ويْمِيرْ ن إِجَاشُورِييّنْ ذ إِمَاعْكِييّنْ ؤُ خْ وزْينْ ن جِيلْعَاذْ أَڒْ ثَامُّورْثْ ن سِيحُونْ، أَجدْجِيذْ ن حَاشْبُونْ. 6 مُوسَا، أَمْسخَّارْ ن سِيذِي، أَكْ-ذ أَيْثْ ن إِسْرَائِيل، وْثِينْ ثنْ ؤُ مُوسَا، أَمْسخَّارْ ن سِيذِي، ثُوغَا إِوْشَا ثَامُّورْثْ نِّي ذ ڒْوَارْثْ إِ إِرُوبِينِييّنْ ذ إِجَاذِييّنْ ؤُ إِ وزْينْ ن ثقْبِيتْشْ ن مَانَاسَّا. 7 إِنَا ذ إِجدْجِيذنْ ن ثمُّورْثْ إِنِّي خْ إِغْڒبْ يَاشُووَا ذ أَيْثْ ن إِسْرَائِيل، غَارْ ؤُجمَّاضْ ن لْ-ؤُرْذُونْ ذِي لْغَارْبْ، زِي بَاعْلْ-جَاذْ ذِي ثيْسَارْثْ ن لُوبْنَانْ أَڒْ أَذْرَارْ أَقشَّارْ ونِّي إِسّْڭعّْذنْ غَارْ سَاعِيرْ. ؤُشَا يَاشُووَا إِوْشَا إِ-ت ذ ڒْوَارْثْ إِ ثْقبَّاڒْ ن إِسْرَائِيل عْلَاحْسَابْ ثِيرْبِيعِينْ نْسنْ، 8 ذِي ثمُّورْثْ ن إِذُورَارْ ؤُ ذِي ثمُّورْثْ إِوَاطَانْ ؤُ ذِي ڒوْضَا ؤُ ذِي ثيْسَارِينْ ؤُ ذِي ڒخْڒَا ؤُ ذِي ثمُّورْثْ ن لْجَانُوبْ: إِحِيتِّييّنْ، إِمُورِييّنْ، أَيْثْ ن كنْعَانْ، إِفَارِيزِييّنْ، إِحِيوِييّنْ ذ إِيابُوسِييّنْ. 9 أَجدْجِيذْ ن أَرِيحَا: ذ إِجّْ. أَجدْجِيذْ ن عَايْ إِ إِدْجَانْ غَارْ ؤُغزْذِيسْ ن بَايْثْ-إِلْ: ذ إِجّْ. 10 أَجدْجِيذْ ن ؤُرْشَالِيمْ: ذ إِجّْ. أَجدْجِيذْ ن حَابْرُونْ: ذ إِجّْ. 11 أَجدْجِيذْ ن يَارْمُوثْ: ذ إِجّْ. أَجدْجِيذْ ن لَاخِيشْ: ذ إِجّْ. 12 أَجدْجِيذْ ن عَاجْلُونْ: ذ إِجّْ. أَجدْجِيذْ ن جَازَارْ: ذ إِجّْ. 13 أَجدْجِيذْ ن ذَابِيرْ: ذ إِجّْ. أَجدْجِيذْ ن جَاذَارْ: ذ إِجّْ. 14 أَجدْجِيذْ ن حُورْمَا: ذ إِجّْ. أَجدْجِيذْ ن عَارَاذْ: ذ إِجّْ. 15 أَجدْجِيذْ ن لِيبْنَا: ذ إِجّْ. أَجدْجِيذْ ن عَاذُولَّامْ: ذ إِجّْ. 16 أَجدْجِيذْ ن مَاقِّيذَا: ذ إِجّْ. أَجدْجِيذْ ن بَايْثْ-إِلْ: ذ إِجّْ. 17 أَجدْجِيذْ ن ثَافُّوحْ: ذ إِجّْ. أَجدْجِيذْ ن حَافَارْ: ذ إِجّْ. 18 أَجدْجِيذْ ن أَفِيقْ: ذ إِجّْ. أَجدْجِيذْ ن لَاشَّارُونْ: ذ إِجّْ. 19 أَجدْجِيذْ ن مَاذُونْ: ذ إِجّْ. أَجدْجِيذْ ن حَاصُورْ: ذ إِجّْ. 20 أَجدْجِيذْ ن شِيمْرُونْ-مَارَا’ؤُنْ: ذ إِجّْ. أَجدْجِيذْ ن أَكْشَافْ: ذ إِجّْ. 21 أَجدْجِيذْ ن ثَاعْنَاكْ: ذ إِجّْ. أَجدْجِيذْ ن مَاجِيدُّو: ذ إِجّْ. 22 أَجدْجِيذْ ن قَاذَاشْ: ذ إِجّْ. أَجدْجِيذْ ن يُوقْنَاعَامْ غَارْ كَارْمَالْ: ذ إِجّْ. 23 أَجدْجِيذْ ن ذُورْ خْ ثِيوْرِيرِينْ غَارْ ذُورْ: ذ إِجّْ. أَجدْجِيذْ ن جُويِيمْ ذِي جِيلْجَالْ: ذ إِجّْ. 24 أَجدْجِيذْ ن ثِيرْصَا: ذ إِجّْ. مَارَّا إِجدْجِيذنْ-أَ أَقَا أَثنْ ذِي وَاحِيثْ ؤُ-ثْڒَاثِينْ.