أَيُوبْ 16

1 خَاسْ ؤُشَا يَارَّا-د أَيُوبْ، إِنَّا: 2 مَانَاوْيَا سْڒِيغْ أَسْ أَطَّاسْ، كنِّيوْ مَارَّا إِذْومْ ثسّْبطّْڒمْ أَيِي أَفوّجْ. 3 مَا أَذْ قْضَانْ وَاوَاڒنْ إِخْوَانْ؟ نِيغْ مِينْ شكْ إِعَارّْننْ عَاذْ أَذْ د-ثَارّذْ أَوَاڒْ؟ 4 ؤُڒَا ذ نشّْ زمَّارغْ أَذْ سِّيوْڒغْ أَمْ كنِّيوْ، مَاڒَا أَقَا كنِّيوْ ذڭْ ومْشَانْ إِنُو. إِڒِي أَذْ مُوذغْ أَوَاڒنْ خَاومْ ؤُ أَذْ خَاومْ هزّغْ أَزدْجِيفْ إِنُو. 5 أَذْ كنِّيوْ سّْمحْضغْ س ؤُقمُّومْ إِنُو ؤُ أَفوّجْ ن إِينْشِيشنْ إِنُو أَذْ أَومْ يَاوِي ڒفْسَاسثْ. 6 مَاڒَا سِّيوْڒغْ، وَارْ خَافِي إِتّجِّي ڒحْڒِيقْ إِنُو ؤُ مَاڒَا سّغْذغْ، مَا أَذْ خَافِي إِحيّذْ؟ 7 ڒخُّو إِسِّيحڒْ أَيِي نتَّا، ثسَّارْجْفذْ شكْ مَارَّا ثَاوَاشُونْثْ إِنُو. 8 شكْ ثسّْذُورُويذْ أَيِي س ثقْشُورْثْ ن ثڒْمشْثْ، ثنِّي ذ ثَاشهَّاذْثْ خَافِي، ؤُشَا ثكَّارْ خَافِي أَرِّيمثْ إِنُو ثَامُوسْرِيوْثْ، ثتّْشثْشَا زَّايِي ذڭْ ؤُغمْبُوبْ إِنُو. 9 أَغْضَابْ نّسْ إِمزّقْ، إِضفَّارْ أَيِي-د. نتَّا إِتّْغزَّا غَارِي ثِيغْمَاسْ. أَغْرِيمْ إِنُو إِسّْقطَّاعْ-د غَارِي ثِيطَّاوِينْ. 10 نِيثْنِي تّْشَارَّاڭنْ أَقمُّومْ نْسنْ خَافِي، شَّاثنْ أَيِي س ڒْحڭْرَا غَارْ ؤُقَابْسِي، تّكَّارنْ خَافِي تّْمُوننْ. 11 إِسلّمْ أَيِي أَربِّي إِ يِيجّْ ن مِّيسْ ن ڒْمُوعْصِييّثْ، إِعَارّنْ أَيِي ذڭْ ؤُفُوسْ ن إِعفَّاننْ. 12 ثُوغَا أَيِي ذِي ڒْهُوذْنثْ، مَاشَا نتَّا يَارْژَا أَيِي، إِشبَّارْ أَيِي ذڭْ إِجِيمَانْ، إِڒْبزْ أَيِي. إِسّْبدّْ أَيِي ذ ثَاحْجُورْثْ إِ يِيخفْ نّسْ. 13 إِمْجبَّاذنْ نّسْ ن ڒْقوْسْ نّْضنْ أَيِي-د، نتَّا إِسّْنُوقُّوبْ أَيِي ثِيژَّاڒْ بْڒَا أَهَاوڒْ، إِتّْزدْجَاعْ غَارْ ثمُّورْثْ إِژِي إِنُو، 14 يَارژَّا أَيِي ثَارژِّيثْ أَوَارْنِي إِ ثْرژِّيثْ نّغْنِي، إِعْرفْ-د خَافِي أَمْ بُو-ثغْرُوضْثْ. 15 خيّْضغْ ثَاخَانْشثْ ن وشْضَانْ إِ ثڒْمشْثْ إِنُو، إِشّْ إِنُو سّْوسّْخغْ ذِي ثْعجَّاشْثْ. 16 أَغمْبُوبْ إِنُو إِزْوغْ زڭْ إِمطَّاونْ، ثِيڒِي نْ ڒْموْثْ أَقَا-ت خْ وَابْڒِيونْ إِنُو، 17 وَاخَّا وَارْ يَارْسِي لْعُونْفْ خْ إِفَاسّنْ إِنُو ؤُ ثَاژَادْجِيثْ إِنُو ثصْفَا. 18 ؤُهْ ثَامُّورْثْ، وَارْ دَّاڒْ إِذَامّنْ إِنُو، وَارْ تّجِّي إِغُويَّانْ إِنُو أَذْ أَفنْ أَمْشَانْ إِ أَرَّاحثْ! 19 خْزَارْ، ؤُڒَا ذ ڒخُّو، أَشهَّاذْ إِنُو ذڭْ ؤُجنَّا، أَمْشَافعْ إِنُو خْ ڒڭْعُوذِي. 20 إِمدُّوكَّاڒْ إِنُو ذ يِينِّي زَّايِي إِسْثْهزَّانْ، مَاشَا ثتّْرُو ثِيطّْ إِنُو غَارْ أَربِّي. 21 أجّْ-إِ-ث أَذْ إِوّثْ دّعْوثْ خْ ورْيَازْ غَارْ أَربِّي، أَمْ إِجّْ ن مِّيسْ ن بْنَاذمْ خْ ؤُمدُّوكّڒْ نّسْ. 22 مَاغَارْ ذْرُوسْ ن إِسڭّْوُوسَا إِ-د غَا يَاسنْ عَاذْ، قْبڒْ إِ غَا ؤُيُورغْ أَبْرِيذْ وَارْ زَّايسْ تّْعِيقِّيبغْ.