حِيزْقِييَالْ 27

1 يُوسَا-د غَارِي وَاوَاڒْ ن سِيذِي، إِنَّا: 2 “شكْ، أَ مِّيسْ ن بْنَاذمْ، سْڭعّذْ إِجّْ ن وژْرِي ن وشْضَانْ، خْ صُورْ. 3 إِنِي إِ صُورْ، ثَانْذِينْثْ إِ ذِينْ إِزدّْغنْ غَارْ ثوُّورَا ن ڒبْحَارْ، ثَانْذِينْثْ نِّي إِتّْسبَّابنْ أَكْ-ذ ڒڭْنُوسْ نِّي إِزدّْغنْ ذِي ثڭْزِيرِينْ أَطَّاسْ: ‘أَمُّو إِ إِقَّارْ سِيذِي إِنُو، سِيذِي: أَ صُورْ، شمْ ثقَّارذْ: نشّْ أَقَا أَيِي نِيشَانْ ذڭْ وَاژْرِي!’ 4 إِسغْوَانْ ن ؤُيڒْزِيمْ نّمْ أَقَا أَثنْ ذڭْ وُوڒْ ن ڒبْحُورْ، إِنِّي شمْ إِبْنَانْ أَقَا ڭِّينْ أَژْرِي نّمْ نِيشَانْ. 5 مَارَّا ثِيڒْوِيحِينْ ن ثْفڒْوِينْ ن ثْغَارُّوبَا نّمْ ڭِّينْ ثنْثْ إِ شمْ ذِي ثْنَاينْ زِي ثْشجُّورَا ن ؤُمرْزِي، إِوْينْ ثِيشجُّورَا ن ثنْڭلْثْ زِي لُوبْنَانْ، مَاحنْذْ أَذْ أَمْ ڭّنْ ثِيحنْيَا إِ ڒْبَاشَّاثْ. 6 زِي ثْشجُّورَا ن ڒْبدْجُوضْ ن بَاشَانْ ڭِّينْ ڒمْقَاذفْ نّمْ، ڒْبَانْكُووَاثْ نّمْ إِ إِقدَّافنْ أَقَا أَثنْثْ زِي ڒْعَاجْ إِتّْوَاڭّْ ذڭْ ؤُكشُّوذْ ن ثنْڭلْثْ، إِوْينْ ث زِي ثڭْزِيرِينْ ن أَيْثْ ن كِيتِّيمْ. 7 ڒْْبَاشّْ نّمْ ثُوغَا-ث س ڒقْطنْ أَزْذَاذْ زِي مِيصْرَا، خيّْضنْ ث س وَاطَّاسْ ن ثِينْثَاثْ. ڒْْبَاشّْ ثُوغَا إِ شمْ ذ ثَاعدْجَانْثْ، ثَاسْقِيفْثْ ن ؤُقِيضُونْ نّمْ ثُوغَا-ت زڭْ ؤُفِيڒُو ؤُذهْمَانِي ذ أَرْجُووَانِي زِي ثڭْزِيرِينْ ن إِلِيشَا. 8 إِمزْذَاغْ ن صِيذُونْ ؤُ ن أَرْوَاذْ ثُوغَا أَثنْ ذ إِقدَّافنْ نّمْ. إِمِيغِيسنْ نّمْ، أَ صُورْ، نِّي ذَايمْ إِدْجَانْ، ثُوغَا أَثنْ ذ إِندَّاهنْ نّمْ. 9 إِوسُّورَا ن جُوبَايْلْ ذ إِمِيغِيسنْ نّسْ ثُوغَا أَثنْ ذَايمْ، عدّْڒنْ مَارَّا ثِيزَّا نّمْ. مَارَّا ثِيغَارُّوبَا نْ ڒبْحَارْ ذ إِبحْرِييّنْ نْسنْ ؤُسِينْ-د غَارمْ حِيمَا أَذْ كِيذمْ سبّْأبنْ. 10 أَيْثْ ن لْفُورْصْ، ن لُوذْ ؤُ ن فُوطْ ثُوغَا أَثنْ ذِي ڒْعسْكَارْ نّمْ، إِرْيَازنْ إِعسْكَارِييّنْ. ؤُيْڒنْ ذَايمْ ثَاسدَّارْثْ نْسنْ ذ لْكَاسْكْ نْسنْ ؤُشَا وْشِينْ أَمْ ڒْعزّْ. 11 أَيْثْ ن أَرْوَاذْ ذ ڒْعسْكَارْ نّمْ ثُوغَا أَثنْ خْ ڒحْيُوضْ نّمْ ؤُشَا إِڭَامَّاذِييّنْ، أَيْثْ ن بُو-ثرْيَاسْثْ نّمْ، بدّنْ خْ سُّومْعَاثْ نّمْ. ثِيسدَّارِييّنْ نْسنْ إِقسْحنْ ن ؤُسڒْقِي إِ ثُوغَا ؤُيْڒنْثْ ذڭْ ونّضْ خْ ڒحْيُوضْ، أَرْنِينْثْ ذڭْ وَاژْرِي نّمْ أَطَّاسْ. 12 ثَارْشِيسْ ثُوغَا ثتّْسبَّابْ أَكِيذمْ إِ سِّيبّثْ ن ؤُفيّضْ ن عْڒَامْ كُوڒْ إِڭڒْوَانْ. نِيثْنِي وْشِينْ أَمْ نُّوقَارْثْ، ؤُزَّاڒْ، أَسْثَانْيُو ذ ڒخْفِيفْ ذِي طّْوعْ ن سّڒْعثْ نِّي ذ أَسنْ ثزّنْزذْ. 13 يَاوَانْ ذ ثُوبَالْ ذ مَاشِيخْ ثُوغَا أَثنْ ذ إِسبَّابنْ نّمْ. نِيثْنِي وْشِينْ أَمْ ڒعْمُورْ ن إِوْذَانْ ذ ڒقْشُوعْ ن نّْحَاسْ ذِي طّْوعْ ن سّڒْعثْ نّمْ. 14 زِي ثَادَّارْثْ ن إِجدْجِيذنْ ن ثُوجَارْمَا وْشِينْ أَمْ يِييْسَانْ ذ إِمْنَاينْ ذ إِسرْذَانْ ذِي طّْوعْ ن سّڒْعثْ نِّي ذ أَسنْ ثزّنْزذْ. 15 أَرَّاوْ ن ذَاذَانْ ثُوغَا أَثنْ ذ إِسبَّابنْ ذِي طّْوعْ نّمْ. أَطَّاسْ ن ثڭْزِيرِينْ ثُوغَا خْسنْثْ أَذْ طّْفنْثْ سّڒْعثْ زڭْ ؤُفُوسْ نّمْ. ثِيغْمَاسْ ثِيمقّْرَانِينْ ن ڒْفِيڒْ ذ ؤُكشُّوضْ ن وبْنُوسْ أَرِّينْثْ أَمْ ثنْثْ-إِ-د ذ أَرِّيغَالُوثنْ. 16 أَرَامْ ثُوغَا إِتّْسبَّابْ أَكِيذمْ خْ وَاطَّاسْ ن ڒقْشُوعْ إِ ثْصنّْعذْ. نِيثْنِي وْشِينْ أَمْ كَارْبُونْكلْ ذ أَجُورْوَانِي ذ لْبُورْضَا س ثِينْثَاثْ إِفَارْزنْ ذ ڒقْطنْ أَزْذَاذْ ذ ڒْمَارْجَانْ ذ ڒعْقَاقْ إِزڭّْوَاغنْ ذِي طّْوعْ ن سّڒْعثْ نِّي ذ أَسنْ ثْقدّْمذْ. 17 يَاهُوذَا ذ ثمُّورْثْ ن إِسْرَائِيل ثُوغَا تّْسبَّابنْ أَكِيذمْ. نِيثْنِي وْشِينْ أَمْ يِيمنْذِي زِي مِينِّيثْ ؤُڒَا ذ حَالَاوِيثْ، ثَامّنْثْ، زّشْثْ ذ بَالْسَامْ ذِي طّْوعْ ن سّڒْعثْ نّمْ. 18 ذِيمَاشْقْ ثُوغَا إِتّْسبَّابْ أَكِيذمْ ذڭْ وَاطَّاسْ ن ڒقْشُوعْ إِ ثْصنّْعذْ، خْ مَارَّا إِڭڒْوَانْ نّمْ، س بِينُو ن خِيلْبُونْ ذ ثْضُوفْثْ ثَاشمْڒَاڒْثْ. 19 ذِي طّْوعْ ن سّڒْعثْ نِّي ذ أَسنْ ثزّنْزذْ، وْشِينْ أَمْ وَاذَانْ ذ يَاوَانْ ؤُزَّاڒْ ن ومْزِيڒْ ذ قَاسِّييَا ذ ؤُغَانِيمْ أَحمُّومْ إِتّْفُوحنْ زِي ؤُزَالْ. 20 ذَاذَانْ ثُوغَا إِتّْسبَّابْ أَكِيذمْ س ورُّوضْ ن ثْبَارْذِيوِينْ إِ ؤُندَّاهْ. 21 إِعْرَابنْ ذِي ڒْوَاطَاثْ ذ مَارَّا ڒْحُوكَّامْ ن قِيذَارْ ثُوغَا تّْسبَّابنْ أَكِيذمْ. ذڭْ إِزمْرَاونْ ذ إِشَارِّييّنْ ذ إِغَايْضنْ ثُوغَا تّْسبَّابنْ أَكِيذمْ. 22 إِسبَّابنْ ن شَابَا ذ يِينِّي ن رَاعْمَا ثُوغَا أَثنْ ذ إِسبَّابنْ نّمْ. نِيثْنِي وْشِينْ ڒمْخيّرْ ن ڒعْطُورْ ذ عْڒَامْ كُوڒْ إِژْرَا إِغْڒَانْ ذ وُورغْ ذِي طّْوعْ ن سّڒْعَاثْ نِّي ذ أَسنْ ثْقدّْمذْ. 23 حَارَانْ ذ كِينَّا ذ عَاذَانْ، إِسبَّابنْ ن شَابَا، أَشُّورْ ذ كِيلْمَاذْ، ثُوغَا تّْسبَّابنْ أَكِيذمْ. 24 نِيثْنِي ثُوغَا تّْسبَّابنْ أَكِيذمْ ذڭْ ڒعْبَايَاثْ إِشنّْعنْ ذ إِسڒْهَامنْ إِذحْمِييّنْ ذ لْبُورْضَاثْ ثِيقَارْقَاشِينْ ؤُ ذِي ڒْكتَّانْ إِغْڒَانْ س إِفِيڒَانْ ن ثِينْثَاثْ إِفَارْزنْ نِّي إِدْجَانْ جَارْ سّڒْعثْ نّمْ س ثسْغُونِينْ إِجهْذنْ إِتّْوَامُوذنْ. 25 إِغَارُّوبَا ن ثَارْشِيشْ ثُوغَا أَثنْ ذ إِكَارَابَاننْ نّمْ ذ سّڒْعثْ نّمْ. ثُوغَا شمْ ذِينِّي، ثشُّورذْ ؤُ ثْذقْڒذْ أَطَّاسْ ذڭْ وُوڒْ نْ ڒبْحُورْ. 26 إِقدَّافنْ نّمْ إِوْينْ شمْ غَارْ وَامَانْ يُوعْڒَانْ، أَسمِّيضْ زِي شَّارْقْ يَارْژَا شمْ ذڭْ وُوڒْ نْ ڒبْحُورْ. 27 إِڭڒْوَانْ نّمْ ذ سّڒْعثْ نِّي ثزّنْزذْ ذ ثْسبَّابْثْ نّمْ، إِبحْرِييّنْ نّمْ ذ إِندَّاهنْ نّمْ ذ يِينِّي إِعدّْڒنْ ثِيرژَّا نّمْ، ذ إِسبَّابنْ نِّي إِتّْسبَّابنْ أَكِيذمْ، ذ مَارَّا إِعسْكَارِييّنْ إِنِّي أَكِيذمْ ؤُ أَكْ-ذ مَارَّا أَڭْرَاوْ ذِي ڒْوسْطْ نّمْ، أَذْ وْضَانْ مَارَّا ذڭْ وُوڒْ ن ڒبْحُورْ ذڭْ وَاسّْ ن ؤُوطُّو نّمْ. 28 زِي ڒْحسّْ ن ثْغُويِّيثْ ن إِندَّاهنْ نّمْ أَذْ أَرْجِيجنْ ذْشُورَاثْ نّمْ. 29 أَذْ هْوَانْ زِي ثْغَارُّوبَا مَارَّا إِنِّي إِطّْفنْ ثِيمقْذَافِينْ، مَارَّا إِبحْرِييّنْ ذ مَارَّا إِندَّاهنْ نّمْ. نِيثْنِي أَذْ بدّنْ خْ ثمُّورْثْ، 30 ؤُشَا أَذْ سّْڭعّْذنْ ثْمِيجَّا نْسنْ، أَذْ سْغُوينْ س إِمطَّاونْ إِمَارْزَاڭنْ، أَذْ نْضَارنْ أَشَاڒْ خْ إِزدْجِيفنْ نْسنْ، أَذْ زُوزَّارنْ إِغّضْ خْ يِيخفْ نْسنْ، 31 ؤُشَا أَذْ حفّنْ إِخفْ نْسنْ زِي سِّيبّثْ نّمْ. نِيثْنِي أَذْ بيْسنْ س ثْخُونْشَايْ ن وشْضَانْ ؤُشَا أَذْ خَامْ رُونْ س ڒعْمَارْ إِشُّورْ س ثَارْزُوڭِي ؤُ أَذْ سّْڭعّْذنْ إِشْثْ ن ثْغُويِّيثْ ثَامرْزَاڭْثْ. 32 أَمْ تّْوحْوِيحنْ أَذْ خَامْ سّْڭعّْذنْ إِجّْ ن إِزْڒِي ن وشْضَانْ، ؤُشَا أَذْ خَامْ وْثنْ أَڭجْذُورْ، أَذْ إِنِينْ: مَانْ ونْ إِدْجَانْ أَمْ صُورْ، أَمْ ثنْذِينْثْ إِتّْوَاهذْمنْ ذِي ڒْوسْطْ ن ڒبْحَارْ؟ 33 ڒَْامِي د-إِوْينْ سّڒْعثْ نّمْ زڭْ ؤُجمَّاضْ ن ڒبْحُورْ، ثُوغَا ثسّْجِيوْنذْ أَطَّاسْ ن ڒڭْنُوسْ. س وَاطَّاسْ ن إِڭڒْوَانْ نّمْ ذ ثْسبَّابْثْ نّمْ ثَارِّيذْ إِجدْجِيذنْ ن ثمُّورْثْ ذ تّْوَاجَارنْ. 34 ذِي ثْسَاعّثْ نِّي ذِي ثتّْوَارْژذْ س ڒبْحُورْ، ذِي ڒْمهْمُوذْ ن وَامَانْ، ثُوغَا ثوْضَا ثْسبَّابْثْ نّمْ مَارَّا ؤُ مَارَّا أَڭْرَاوْ إِ غَارمْ ذِي ڒبْحَارْ. 35 مَارَّا إِمزْذَاغْ ن ثڭْزِيرِينْ تّْبهْثنْ ؤُ إِجدْجِيذنْ نْسنْ تَّارْجِيفنْ، تّْنخْڒَاعنْ ؤُذْمَاونْ نْسنْ. 36 إِسبَّابنْ جَارْ ڒڭْنُوسْ أَذْ خَامْ صفَّارنْ، أَقَا ثْذوْڒذْ ذ إِجّْ ن ؤُمذْيَا إِ وَارْجفْ، ؤُشَا وَارْ ثتِّيڒِيذْ عَاذْ إِ ڒبْذَا.’ “