حِيزْقِييَالْ 19

1 “شكْ خنِّي، سْڭعّذْ إِجّْ ن يژْرِي ن وشْضَانْ خْ ڒْحُوكَّامْ ن إِسْرَائِيل 2 ؤُشَا إِنِي: ‘مَامّشْ ثُوغَا ثزّڒْ يمَّاثْومْ أَمْ ثيْرَاذْثْ ثزّڒْ جَارْ ثيْرَاذِينْ! ثسّْيمْ إِمژْيَاننْ نّسْ جَارْ وَايْرَاذنْ إِمژْيَاننْ! 3 نتَّاثْ ثسْيمْ إِجّْ زڭْ إِمژْيَاننْ نّسْ. وَانِيثَا إِذْوڒْ ذ أَيْرَاذْ أَمژْيَانْ، إِڒْمذْ أَذْ إِشَارّڭْ ثَايْمَارْثْ نّسْ، عَاذْ إِوْذَانْ إِشَّا إِ-ثنْ. 4 ڒَْامِي سْڒِينْ ڒڭْنُوسْ مَانْ أَيَا، حبّْسنْ ث ذڭْ وحْفُورْ ن ثُورْصُوضِي نْسنْ، ؤُشَا إِوْينْ ث س ثْسنَّارِينْ ذڭْ ونْزَارْ نّسْ غَارْ ثمُّورْثْ ن مِيصْرَا.’ 5 ‘ؤُمِي ثژْرَا أَقَا ڒَايَاسْ نّسْ إِرُوحْ، إِبْضڒْ، خنِّي ثكْسِي إِجّنْ زڭْ إِمژْيَاننْ نّسْ، ؤُشَا إِڭَّا إِ-ث ذ أَيْرَاذْ أَمژْيَانْ. 6 وَانِيثَا ثُوغَا إِڭُّورْ جَارْ وَايْرَاذنْ، ؤُشَا إِذْوڒْ ذ أَيْرَاذْ ذ أَمژْيَانْ، إِڒْمذْ أَذْ إِشَارّڭْ ثَايْمَارْثْ نّسْ، عَاذْ إِوْذَانْ إِشَّا إِ-ثنْ. 7 نتَّا إِغْصبْ ثِيجَّاڒْ نْسنْ، يَاردّدْجْ ثِيندَّامْ نْسنْ، أَڒَامِي ثْسُوسمْ ثمُّورْثْ ذ مَارَّا مِينْ ذَايسْ زِي سِّيبّثْ ن ڒْحسّْ ن ؤُزهَّارْ نّسْ. 8 خنِّي سّْبدّنْ خَاسْ ڒڭْنُوسْ زِي ثمُّورَا إِ ذ أَسْ د-إِنّْضنْ ؤُشَا بزّْعنْ خَاسْ ثْرَاشَّا نْسنْ، طّْفنْ ث ذڭْ وحْفُورْ نْسنْ ن ثُورْصُوضِي. 9 نِيثْنِي بلّْعنْ خَاسْ ذڭْ إِجّْ ن ڒقْفزْ س ثْسنَّارِينْ ذڭْ ونْزَارنْ نّسْ، حِيمَا أَذْ ث أَوْينْ غَارْ ؤُجدْجِيذْ ن بَابِيلْ. نِيثْنِي إِوْينْ ث ذِي لْقلْعَاثْ، أَڒَامِي وَارْ إِتّْوَاسڒْ عَاذْ ثْمِيجَّا نّسْ خْ إِذُورَارْ ن إِسْرَائِيل.’ 10 ‘ثُوغَا يمَّاشْ أَمْ ثْزَايَارْثْ ذِي ڒْوقْثْ ن أَرَّاحثْ نّشْ، ثتّْوَاژُّو غَارْ وَامَانْ أَطَّاسْ. ثُوغَا س ڒْغِيدْجثْ ؤُ س وَاطَّاسْ ن ثْسضْوِينْ، زِي سِّيبّثْ ن وَاطَّاسْ ن وَامَانْ. 11 ثُوغَا غَارسْ ثِيسضْوِينْ إِجهْذنْ أَمْ إِزدْجَاضْ ن ڒْحُوكَّامْ. ثْرُونْكُو ن يِيجّنْ زَّايسْ إِڭعّذْ جَارْ إِسيْنُوثنْ، ؤُشَا س ڒُوعْڒَا نّسْ إِتّْوَاژَارْ نِيشَانْ، س وَاطَّاسْ ن ڒفْرُوعْ نّسْ. 12 مَاشَا ثَازَايَارْثْ ثتّْوَاقْڒعْ س إِجّْ ن ؤُذُوقّزْ ن وسْعَارْ، ثمّنْضَارْ غَارْ ثمُّورْثْ، ؤُشَا أَسمِّيضْ زِي شَّارْقْ يُوژغْ ڒْغِيدْجثْ نّسْ. أَرْژنْ ؤُشَا ؤُژْغنْ ڒفْرُوعْ نّسْ إِجهْذنْ، ثِيمسِّي ثشَّا إِ-ثنْ. 13 ڒخُّو ژُّونْ ث ذِي ڒخْڒَا، ذڭْ إِشْثْ ن ثمُّورْثْ يُوژْغنْ ذ إِفُّوذنْ. 14 ثفّغْ-د ثْمسِّي زڭْ إِشْثْ ن ثْسطَّا زِي جَارْ ثْزرْمِينْ نّسْ، ثشَّا ڒْغِيدْجثْ نّسْ، أَڒَامِي وَارْ غَارسْ ثقِّيمْ عَاذْ ثْسطَّا إِجهْذنْ ؤُڒَا ذ أَزدْجَاضْ مَاحنْذْ أَذْ إِحْكمْ.’ " وَا ذ إِجّْ ن يژْرِي ن وشْضَانْ ؤُشَا أَذْ إِذْوڒْ ذ إِجّْ ن يژْرِي ن وشْضَانْ س ثِيذتّْ.