SAN MARKOS 8
TBL1 Chaymanta suknin diya kashkan aypa runakuna tantanakurkansapa Jesus yachachikuptin uyarinankunapa. Paykunapa mana nima mikunankuna tiyaptin Jesuska disipulunkunata kayashpankuna willarkansapa: 2 âSukaman kay runakunata llakichinisapa. Ãami kimsa diyatana ñukawan kashpankuna tukuy mikunankunata tukuchashkasapa. 3 Sukkuna sukaman karu llaktakunamanta shamushkasapa. Chayrayku mana willanayanisapachu wasinkunaman kutinankunapa mana nimata karashpayni. Ichará mana mikushpa rishpankuna ñanpi shaykunmansapa. 4 Chayta willaptinkuna disipulunkunaka Jesusta willarkansapa: âKaypika manami niman suk runa kawsanchu. ¿Imashnatà kay chunllapi kay aypa runakunata karanchimansapa? 5 Chaypina Jesuska tapurkansapa: â¿Mashna pannikichità tiyan? Paykunaka aynirkansapa: âKanchislla tiyawansapa. 6 Chaypina Jesuska tukuy chay runakunata willarkansapa allpapi tiyarinankunapa. Tiyariptinkuna chay kanchis pankunata apishpa Tata Diosta agradesirkan. Chaymanta chay pankunata paki paki rurashpa disipulunkunata kurkansapa runakunata charichinankunapa. 7 Chaymanta paykunapa tiyapurkansapa challwillunkuna. Jesus chaytapish apishpa Tata Diosta agradesirkan. Chaypina disipulunkunata willarkansapa chaytapish karanankunapa. 8 Tukuy chay runakuna mikurkansapa saksanankunakaman. Chaymanta mikushkankuna puchushkata kanchis sestu untata tantachirkansapa. 9 Chay mikuk ullkukuna yaka chusku waranka karkansapa. Chaymanta mikushkankunawasha Jesuska willarkansapa wasinkunaman kutinankunapa. 10 Rishkankunawasha Jesuska disipulunkunawan suk kanowapi Dalmanuta partiman rirkan. 11 Chaymanta fariseo runakuna Jesusta laduncharkansapa. Paykunaka Jesusta llullachinayashpa kallarirkansapa sukaman tapuyta. Roygarkansapa suk almirana milagruta rurananpa yachanankunapa Tata Diosmanta shamudu runa kananta. 12 Chaypina Jesuska llakishpa sinchita samaykushpa willarkansapa: â¿Imapatà roygawankichi suk almirana milagruta ruranaynipa? Kankuna roygawaptikichipish mana nimata rurashachu. 13 Chaymanta Jesuska paykunata sakirkansapa. Shamushkan kanowapi yaykushpa chay kochata chimbarkan. 14 Manara chay kanowapi chimbashpankuna disipulunkuna kunkarkansapa mirkapankunata apayta. Kanowapika suk pansillulla tiyapurkansapa. 15 Chashna riykashpankuna Jesuska willarkansapa: âMash allita uyariwaychi. Ama munaychichu fariseokunapa nima Herodespa levadurawan ruradu pankunata. 16 Chashna Jesus willaptinkuna mana entiendishpankuna willanakurkansapa: âPankunata mana apamushkanchikunaraykumi chaytaka willawanchisapa. 17 Chay rimashkankunata yachashpa Jesuska willarkansapa: â¿Imapatà rimankichi mana nima pan tiyashunaykichita? Mana pannikichi illashkanraykuchu chayta willashkaykichi. ¿Ariya manarachu entiendinkichira? ¿Manarachu allitara riksiwankichi? ¿Imapatà sukaman sinchi shunku kankichi? 18 Ãawiyuk kashpaykichi ¿manachu rurashkaynita kawashkankichi? Rinriyuk kashpaykichi ¿manachu yachachikushkaynita uyarishkankichi? ¿Manachu yuyankichi? 19 Pichka pankunawan pichka waranka runakunata karaptini ¿mashna sestutatà mikuna puchuduta tantachirkankichi? Chaypina paykuna aynirkansapa: âChunka ishkay sestuta. 20 Chaypina Jesuska kashkan tapurkansapa: âChaymanta chusku waranka runakunata kanchis panta mirachishpa karaptini ¿mashna sestu untatatà puchudu pankunata tantachirkankichi? Chashna tapuptinkuna disipulunkunaka aynirkansapa: âKanchis sestuta. 21 Chaypina Jesuska willarkansapa: â¿Manarachu allitara entiendiwankichi? 22 Chaymanta Betsaida llaktapi Jesuska disipulunkunawan chayarkansapa. Chaypina Jesusman suk mana kawakuk runata pushamurkansapa. Roygarkansapa llankashpa alliyachinanpa. 23 Jesuska chay mana kawakuk runata makinmanta apishpa pusharkan llakta washaman. Chaypina tukayninwan ñawinkunata ñuyuchishpa umanpi makinta churashpa tapurkan: â¿Atipankichu kawakuyta? 24 Chay mana kawakuk runaka suk tipisituta kawakushpana willarkan: âKawani runakunata kaspikuna puriktashina. 25 Jesuska kashkan ñawinta llankapuptin chay runaka alliyashpana tukuy layata sukaman allitana kawarkan. 26 Chaypina Jesuska willarkan: âKuskalla wasikiman rillay. Amana llaktaman kutiynachu. 27 Chaymanta Sesarea Filipo partipi llaktakunaman Jesuska disipulunkunawan rirkansapa. Ãanta riykashpankuna Jesuska tapurkansapa: âRunakuna parlashpankuna ¿pi kanaynitatà rimaykansapa? 28 Chaypina paykunaka aynirkansapa: âSukkuna rimansapa Juan Bawtista kanaykita. Sukkuna rimansapa ñawpa yachachikuk Eliyas kanaykita. Sukkuna rimansapa Tata Diospa rimananta yachachikuk runa kanaykita. 29 Chaypina Jesuska tapurkansapa: âKankunaka ¿pi kanaynitatà yuyankichi? Chashna tapuptinkuna Pedruka aynirkan: âKanka Tata Diosmanta shamudu salvakuk runami kanki. 30 Chaypina Jesuska willarkansapa amara ni pita willanankunapa Tata Diosmanta shamudu salvakuk runa kananta. 31 Chaymanta Jesus allita entiendichishpankuna willarkansapa sielumanta shamudu runa kashpa sukaman padesinanta. Willarkansapa ansianukunawan saserdotekunapa kamachikukninkunawan Moisespa killkadunta yachachikuk runakuna sukaman chiknishpankuna padesichinankunata. Willarkansapa paykuna chiknishpankuna wañuchinankunatapish. Chaymanta willarkansapa wañuchiptinkuna kimsa diyapi kawsamunanta. 32 Tukuy chayta kuskata yachachirkansapa. Chaypina Pedruka suk chikanman Jesusta pushashpa willarkan: âSeñor, ama chaytaka yuyaychu. 33 Chashna willaptin Jesuska disipulunkunata chapashpa Pedruta piñayashpa willarkan: âÃukamanta anchuy, Satanas. Runakunapa munananllata yuyashpa willawaykanki ama wañunaynipa. Manami Tata Diospa munanantachu willawaykanki. 34 Chaymanta Jesuska tukuy disipulunkunata chaypi tiyak runakunatapish kayashpankuna willarkansapa: âKankuna disipuluynikuna kanayashpaykichika amana kikikichipa munanaykichita rurashpanachu kawsaychi. Chiknishuk runakuna ñukarayku wañuchishunayaptikichipish ñukallata kreyiwashpa katiwaychi. 35 Kankuna wañuymanta kishpinayashpa sakiwashpaykichika mana tukuyniyuk ninamanta mana kishpinkichichu. Chaymanta kreyiwashkaykichirayku runakuna wañuchishuptikichipish sieluman rinkichi Tata Dioswan mana tukuyniyukta kawsak. 36 Suk runa rikchak laya tiyapuptin mana sielupi yaykushpaka yankamanta kay allpapi tukuy layayuk kashka. 37 Tukuy tiyapukninkuna mana nimapi yanapankachu ninamanta kishpinanpa. 38 Suk runakuna mana alli rurak mana kreyiwak runakunapa ñawpakninkunapi ñukata pinkakuwansapa. Rimanaynitapish mana munansapachu. Chashna pinkakuwaptinkuna kay allpaman kashkan shamuptini ñukapish chay pinkakuwak runakunata willashasapa mana ñukapa kanankunata. Chay diyaka Tatayni Diospa llipyayninpi yanapawak angelkunawan tantalla kashkan shamusha.