HEBREOS 1

1 Ñaupajka Dios achqha cutita imaymanamanta profetacuna uqhunta abuelonchiscunaman parlamorkan. 2 Cunanka cay p’unchaycunapi Churin uqhunta parlamuwanchis. Payninta cay pachata ruwarkan, paymantaj Dios tucuy imacunata kon herenciata jina. 3 Payka Diospaj sumaj glorioso c’anchaynin, Dios quiquinpaj caynin. Payka atiyniyoj palabranwan tucuy imata sumajta purichin. Juchanchiscunamanta limpiochay pasayta, janaj pachapi tiyaycun Diospaj paña ladonpi. 4 Diospaj Churenka astawan curaj, angelcunamanta nejtenka. Herenciata jina astawan sinchi importante sutita jap’ekan angelcunamanta nejtenka. 5 Dioska jayc’ajpas ni mayken angelta ninchu: “Kanka Churiy canqui; cunan noka Tatayqui cani” nispaka. Mayken angelmantapas nillantajchu: “Noka paypaj Tatan casaj, paytaj nokapaj Churiy canka” nispa. 6 Uj chhicapeka ch’ulla Churinta tucuy cajcunaman ricuchispa, nerkan: “Diospaj tucuy angelnincuna payta adorachuncu." 7 Angelcunamantaka Dios nin: “Dioska angelnincunata wayrata jina ruwan, sirvejnincunatataj nina laurayta jina." 8 Churimantataj nin: “Oh Dios, gobiernoyqueka wiñaypaj, gobernanquitaj cabal justiciawan. 9 Sumajcajta munacunqui; mana allincajta chejninqui. Chayraycu Dios, Diosniyqui, ajllasunqui. Cusicuywan junt’achisunqui astawanraj ujcunamanta nejtenka." 10 Nillantaj: “Oh Señor, kan kallariymantapacha cay pachata ruwarkanqui; kan quiquiyqui janaj pachata ruwarkanqui. 11 Tucuy cay pachaka tucuconka, kancajtaj wiñaypaj canqui. Tucuy cay pachaka p’acha jina mauc’aconka. 12 ¡P’achata jina suc’anqui, p’acha mudacoj jina cambianqui! Kancajtaj caskallanpuni canqui; causayniyqueka mana tucuchaconkachu ni jayc’ajpas." 13 Dios jayc’ajpas ninchu mayken angelnincunatapas: “Paña ladoypi tiyacuy, enemigoyquicunata atipaspa chaquiyquiman churanaycama” nispaka. 14 Tucuy angelcunaka espíritu cancu, Diosta sirvejcuna; salvación herenciata jap’ekajcunata yanapanancupaj cachaska cancu.