मरकुस 15

1 पहट होतो मुखिया याजक, सयाना अना मोसे को नियम को गुरू ना अना सप्पा यहुदी गीन को मोठो सभा ना न्याय करके यीसु ला बंधवायो, अना ओला धरके ना पीलातुस को हात मा दे देइन। 2 पीलातुस ना ओको लक पुसिस, “का तु यहूदी गीन को राजा आस?” ओना ओला जवाब देइस “असो तु खुदच कव्हासेस।" 3 मुखिया याजक गीन ओको पर गजब लान-छान लगावत होतीन। 4 पीलातुस ना ओला कहीस “का तु काही जवाब नही देस? चोव यो तोरो पर केतरी गोस्टी लक लानछान लगावसेत?" 5 यीसु ना मंग जवाब नही देइस, यहान तकन की पीलातुस ला मोठो अचंभा भयो। 6 पीलातुस वोनो तिहार मा कोनी एक बन्दी ला जेनला वय लोकगीन चाहवत होत्यो उनको लाई छोड़ देवत होतो। 7 बरब्बा नाव को एक मानूस होतो, उ जेल मा होत्यो उ सासन को खिलाफ खुनी लडाई मा लोक गीन को संगी होतो उ रकत कियो होतो। अना बन्दी होतो। 8 अना भीड़ वरता जायके वोको लक पिराथना करन लगीन, का जसो तुमी रिती-रिवाज को लक करता आइसेस, वसोच करो। 9 पीलातुस न उनला जवाब देईस, “का तुमी चाव्हासेव का मी तुमरो लाई यहूदी गीन को राजा ला छोड़ देऊ?" 10 काहेकि पीलातुस जानत होतो की मुखिया याजक गीन ना ओला जरनोठी लक धराय होतीन। 11 पर मुखिया याजक गीन ना लोक गीन ला उकसाईन का पिलातुस लक यीसु को जघा बरब्बा ला उनको लाई छोड़न को माग करे। 12 यो आयक के पीलातुस ना उनलक मंग पुसिस, “ता जेनला तुमी यहूदी गीन को राजा कसो, ओको सँग मि का करू? तुमी काजक चाव्हसो?" 13 वय मंग चिल्लाइन, “ओला कूरूस मा चघाव!" 14 पीलातुस ना उनलक कहीस, “काहे येने काजक जुरुम करीसेस?” पर वय अखीन जोर लक चिल्लाईन, “ओला कूरूस मा चघा!" 15 तबा पीलातुस ना भीड़ ला खुस करन की मनसा लक, बरब्बा ला उनको लाई छोड़ देइस। अना यीसु ला कोड़ा लगवाय के सुपरुत कर देइस की कूरूस मा चघायो जाहे। 16 सिपाही ओला सरकारी मोठो किला को भीतरी आँगन मा ले गईन, अना सप्पा पलटन ला हाकल लेइन। 17 तबा उनना ओला बैजनी रँग को कपरा घालिन अना काँटा को डगाली को मुकुट बनायके ओको डोस्का पर राखिन। 18 यो कहके ओला नमस्ते करन लगीन, “हे यहूदी गीन को राजा, अमर रव्ह!” अना वोको मजाक उडावन लगीन 19 वय ओको डोस्का मा घागरा काड़ी मारके ओको पर थुकिन अना टोंगरा टिकाय के ओला नमस्कार करतो रहीन। 20 जबा वय ओको मजाक कर लेइन, ता ओला ओकोच बैजनी रँग को कपरा उतारके ओनाच पर डाकिन; तबा ओला कूरूस मा चघान को लाई बाहेर ले गईन। 21 जब यीसु ला कूरूस पर लटकान लेय जावत होतिन त रस्ता मा एक मानूस लक भेंटीन, जोनको नाव सिमोन होतो। (वा सिकन्दर अना रुफुस को बाबूजी होतो) उ कुरेनी मानूस गाँव लक आय रहयो होतो; उनना ओला बेगार मा धर लेईन की यीसु को कूरूस ला उचल चलेह। 22 वय यीसु ला गुलगुता नाव की जघा मजे कवटी नाव की जघा मा आनीन। 23 वहान ओला दरद नासक दवा मिलयो अंगूर को रस देवन लगीन पर ओना नही लेइस। 24 तबा उनना ओला कूरूस मा चघा इन अना कपरा पर चिठ्ठी डाकिन की कोन ला काजक मिलेह, ओला बाट लेईन। 25 अना सक्कारी नौ बजे को बेरा होतो। जबा उनना ओला कूरूस मा चघा इन होतीन। 26 अना ओको दोस पतर पर यो लिख देईन की “यहूदिगीन को राजा।" 27 उनना ओको सँग दुई डाकु ला भी कूरूस मा चघाव गयो, एक उज्जो कन अना एक डाखियो कन। दुही ला कूरूस मा चघाइन 28 तबा पवीतर गिरंथ को उ गोस्टी की उ दोसीगीन को संग गिनो जाहे, पूरो भयो। 29 अना रास्ता लक कटन वारा डोस्का हला-हलाय के असो कव्हके ओकी निन्दा करत होतीन, “वाह! मंदिर को नास करनवालो अना तीन दिवस मा बनावन वालो! 30 कूरूस पर लक उतर के आपरो आपच ला बचाव लेव।" 31 येने रिती लक मुखिया याजक मोसे को नियम को गुरू सकट, आपस मा मजाक लक कव्हत होतीन, येने अउर लोकगीन ला सूटकारा देइस पर आपरो आप ला नही बचाय सकयो। 32 इसरायल को राजा, मसीह अता कूरूस मा लक उतर, आव अखीन, “आमी चोवबिन अना भरोसा करबिन।” अखीन जोन ओको सँग कूरूस मा चघायो गईन होतीन, वय भी ओकी निन्दा करत होतीन। 33 दुफारी होवनो पर सप्पा देस मा अँधारो छाय गयो। अना महातनी बेरा तीन बजे तकन रहयो। 34 महातनी बेरा यीसु ना मोठो आवाज लक चिल्लाय के कहीस, “इलोई-इलोई लमा सबक्तनी?” जेनको मजे, “हे मोरो परमेस्वर, हे मोरो परमेस्वर, तु ना मोला कायलाई छोड़ दियोस?" 35 जो जवर उभा होतीन, उनमा लक काही ना आयक के कहिन, “आयको, उ एलिय्याह ला हाकलासे।" 36 एक सिपाही ना धावके स्पंज ला सिरका मा डुबाइस अना घागरा काड़ी मा राखके ओला चखाइस अना कहीस, “रुको, देखबिन, एलिय्याह ओला सूलि लक उतारन लाई आवासे का नही।" 37 तबा यीसु ना लगत जोर लक चिल्लाय के जियान छोड़ देइस। 38 अना मंदिर को पड़दा वरता लक खाल्या तकन फटके दुई भई गयो। 39 जोन दरोगा (वोको हात को खालया 100 सिपाई होतिन) कूरूस को पुढा उभा होतो, जबा ओला येने रिती लक चिलावत अना जियान छोड़ता चोवीस, ता ओना कहीस, “खरो से यो मानूस परमेस्वर को टूरा होतो!" 40 लगतसी बायको भी दुहुर लक चोय रही होतीन। उनमा मरियम मगदलीनी, नहानो याकूब अना योसेस की माय मरियम, अना सलोमी होतिन। 41 वा बायकागिन, जबा यीसु गलील मा होतो, वोकी सेवा करत होतिन। अना लगतसा बायका ओको मंघा येरुसलेम आई होतीन। 42 जबा झुलाखाली भय गई ता सब्त को एक दिवस पुढ़ा को दिवस होतो अना तैय्यारी को दिवस होतो। 43 अरिमितिया को रव्हनवालो यूसुफ आयो, जो मोठीसभा को मेम्बर हो तो अना खुदच परमेस्वर को राज की रास्ता चोवत होतो। उ हिम्मत करके पीलातुस जवर गयो अना यीसु को लास ला माँगिस। 44 यो आयक के पीलातुस ला अचंभा भयो की उ एतरो जल्दी मर गयो। अना 100 सिपाही को अधिकारी ला हाकलके पुसिस, “का ओला मरन ला देर भई?" 45 वोना अधिकारी को जवाब आयक के पीलातुस ना लास ला यूसुफ ला दे देइस। 46 तबा ओना मलमल को एक कपरा खरिद लेइस, अना लास ला उतारके ओला चादर मा लपटिस, अना एक मरघटी मा जो चट्टान मा खोदी गई होती राखिस। अना मरघट्टी मा धसन को जघा पर एक गोटा अड़ा देइस। 47 मरियम मगदलीनी अना योसेस की माय मरियम चोवत होतीन की ओको लास कहाँन राखयो गयो से?