1 कुरिन्थियो 9

1 का मी छुट्टा मानूस नही सेऊ? का मी पेरीत नही सेऊ? का मीना पिरभू यीसु ला नही चोविसेऊ? का तुमी लोक मोरो मेहनत को फर नोहोव? 2 मोला दुसरो लोकगीन पेरीत नही माना सेत, तो का भयो, मी तो तुमरो काजी पेरीत सेऊ। काहेका तुमी लोकगीन, पिरभू मा मोरो पेरीत होवन को चिन्ह सेव। 3 जोन लोकगीन बिना जाँच को मोरो पर लान-छान लगावासेत, उनला आपरो बारेमा मोला यो सांगनो सेत। 4 का हमला खावन-पीवन को हक नाहती? 5 का अखीन पेरीत गीन पिरभु को भाऊ गीन, अना कैफा को जसो, हमला आपरी मसीही बहिन ला बायको बनाके आपरो सँग लेजान को हक नाहती? 6 का मि अना बरनबास, आपरो जिन्दगी चलान को लाई काम करन को हक सेत। 7 का यो कबच आयकनो मा आयो, की कोनी आपरो खरचा लक सेना मा सेवा करासे? कोनी अंगूर को बारी लगायके, ओको फर नही खावासे? कोनी पालतु जनावर पालके ना करप को देख-रेख करके, ओना जनावर को दुध नही पिवा से? 8 यो मि सादो जीवन को उदाहरन लक नही कव्ह रही सेव। पर मोसे को नियम पवीतर गिरंथ भी योच कव्हासे। 9 काहेकि मोसे को नियम मा लिखयो से, तुमी गाहानी करतो बेरा बईल को पर मोहरका नोको लगाने। का परमेस्वर ला बईल गीनको चिंता से? 10 या उ हमरो लाई यो जरुरी कव्हासे? यो पक्को हमरो लाई लिखी से; काहेकि यो बेस से की, उपज को हिस्सा मिलन की आस लक जोतन वालो नांगर चलाहे। अना दावन वालो दावनी करेत। 11 अदी अमीना आतमिक बीज बोया सेजन, तो का हमी दुनिया को देहिक फर खावन-पिवन को चीजको आस नही राखबीन? 12 अदी दुजो लोकगीन ला तुमी पर यो हक से, तो का बराबरी मा हमरो लगत हक नही? मंग हमीना यो हक ला नही बवजसेजन, काहेका हमी मसीह को साजरो बारता मा कोनी बाधा डाकनो नही चाव्हा सेजन। एको लाई हमी, हर तौर लक दुख उठासेजन। 13 का तुमी लोकगीन नही जानोह, की मंदिर मा धरम सेवा करनवारा ला, मंदिर लक जेवन मिला से। अना वेदी की सेवा करन वारा, वेदी की चघावा को हिस्सेदार सेत। 14 असोच पिरभू ना हुकूम देइसेस, का साजरा बारता आयकावान वारा, साजरा बारता आयकवा के, आपरो जिंदगी को रूजूक भाकर चला सका सेत। 15 पर मिना ऐना हक को बवजनो कोनी मतलब को लाय नही कियो। अना यो मि एकोलाय नही लिख रही सेव, की अबा मोरो लाई असोच कियो जाहे। मि भलाई मर जाहुँ, बल्की मि आपरो आपच ला ऐना महिमा लक छुटयो नही सेऊ। 16 मि यो गोस्टी पर गरब नही करुसु, की मि साजरो बारता को साँगन वालो सेऊ। मि तो यो काम करन को लाई मजबुर सेव। हाय! से मोला, अदी मि साजरो बारता ला नही सांगु। 17 अदी मि आपरी मनसा लक यो कव्हसू, तो मोला ईनाम को हक से, पर मि आपरी मरजी लक यो नही करुसु। मोला जोन काम भरोसा लक सौपियो गई से मि ओला पूरो करुसेऊ। 18 तो ईनाम पर मोरो कोन तो हक से? अना मि साजरो बारता को बारे मा आपरो हक ला काम मा नही आनु सेऊ। उ यो से का मी फोकट मा, साजरो बारता ला सांगा सेऊ। 19 सबच लोकगीन लक सूटकारा होवनो को लाई मिना आपरो आपच ला सबच को दास बनाय लेईसेऊ। जेनको लक मि लगत लोकगीन को सूटकारा दिलाय सकु। 20 मी यहूदीहुन लाय यहूदी जसो बन गयो, का मी यहूदीगीन ला मसीह मा आन सुक, जोन लोक मोसे को नियम को बस मा सेत, उनला पावन लाई मि कानुन को कब्जा मा जसो बन गयो। अता मि वाकई मा कानुन को कब्जा मा नही सेव। 21 जोन लोक मोसे को नियम नही माननवारा सेत, उनला पावन को लाई मि उनको जसो गैर यहुदी मोसे को नियम नही माननवारा बन गयो, अता मसीह को नियम को लक होवनो को कारन मि वाकई मा परमेस्वर की कानुन लक छुटयो नही सेव। 22 मि कमजोर को साठी कमजोर जसो बनयो, जेनको लक मि उनला पाय सकु। मि सबच को साठी सब काही बन गयो। जेनको लक कोनी ना कोनी तरह लक लोकगीन को सूटकारा कर सकु। 23 मि यो सब साजरो बारता को लाई कर रही सेव, जेनको लक मी दुसरो को संग यीसु को दया को हिस्सादार बन जाऊ। 24 का तुमला नही मालूम सेत, का धावन को मैदान मा सबच धावासे, पर कोनी एक ला ईनाम मीलासेत। मजे तुमी असो धावो का ईनाम तूमी ला भेटे। 25 सबा धावन वारा धिरज यो काजी राखासेत, का वोला जीत को मुकुट मिलनो सेत। पर आमी तो कदी नास नही होवन वारा अमर मुकुट काजी मेहनत करसेजन। 26 एकोलाय मी एक “निसान साधके तीर चलावसू” मी अन्दाज लक तीर नही छोड़से 27 मी आपरो देह ला तकलीप देवासू, अना वोला आपरो बस मा राखासू। कही असो ना भई जाय का दुसरो ला परचार को मघा, मी खुद वोको पर चलनवारा नही बनू कही लोक असो ना कव्हे का “दियो खाल्या अँधार सेत।"