MELKAHKA KAN 135

1 Kapinga KAUN-O! Kumwail kapinga mware, kumwail sapwellimen KAUN-O ladu kan, 2 me kin iang papah nan tehnpas en KAUN-O, nan Tehnpas en atail Koht. 3 Kumwail kapinga KAUN-O, pwehki ih me ketin kupwur mwahu; kumwail koul kapinga mware, pwehki ih me ketin kupwur kadek. 4 E ketin pilada Seikop, oh aramas en Israel kan pwe en ketin sapwellimanikinirailla. 5 I patohwan wehwehki me atail KAUN-O me lapalap, lapalapasang koht akan koaruhsie. 6 E kin ketin wia mehkoaros me e kin kupwurki nanleng oh sampah, nansed oh nan kepin madau kan. 7 E kin ketikihdo depwek en melimel sang ni imwin sampah; e kin ketin wiahda lioal en piripir nan melimel kan, oh kin ketikihdo kisinieng sang nan dewerail kan. 8 E ketin kemehla mesenih koaros nan Isip, mesenih en aramas oh mahn akan. 9 E ketin wiahda manaman oh soahng kapwuriamwei kei wasao pwe en ketin kaloke nanmwarkio oh sapwellime lapalap akan. 10 E ketin kamwomwala wehi tohtohie oh kemehla nanmwarki kehlail kan: 11 Sihon, nanmwarkien mehn Amor kan, Ok, nanmwarkien Pasan, oh nanmwarki koaros nan Kenan. 12 E ketikihong sapwarail ko ong sapwellime aramas ako; e ketikihong mehn Israel sahpw pwukat. 13 Maing KAUN, se pahn kin wiahki komwi at Koht ahnsou koaros; dih koaros pahn kin tamataman komwi. 14 KAUN-O pahn ketin doarehla sapwellime aramas akan; e pahn ketin kupwurehla sapwellime ladu kan. 15 Koht en wehi kan kin wiawihkihda silper oh kohl; pehn aramas me kin wiairailda. 16 Mie awarail, re ahpw sohte kak lokaia, mie masarail, re ahpw sohte kak kilang wasa. 17 Mie salengarail, re ahpw sohte kak rong wasa; re pil sohte kak esingek. 18 Irail kan koaros me wiairailda oh kin likih irail, re en duwehla dikedik en eni pwukat me re wiahda! 19 Kapinga KAUN-O, kumwail aramas en Israel kan; kapinga ih, kumwail samworo en Koht kan! 20 Kapinga KAUN-O, kumwail mehn Lipai kan; kapinga ih, kumwail koaros me kin kaudokiong! 21 Kapinga KAUN-O nan Saion, nan Serusalem, sapwellime mwoahl. Kapinga KAUN-O!