MELKAHKA KAN 112

1 Kapinga KAUN-O! Meid pai aramas me kin wauneki KAUN-O, me kin alehki eh peren sang ni eh kin kapwaiada sapwellime kosonned akan. 2 Nein aramas mwahu seri kan pahn ahneki manaman nan sahpwo; kadaudoke kan pahn ale kupwuramwahu. 3 Eh peneinei pahn paiamwahu oh kepwehpwe, oh e pahn paiamwahu kohkohlahte. 4 Marain kin dakerada rotorot ong aramas mwahu kan, ong irail kan me kalahngan, kadek, oh pwung. 5 Meid pai aramas me kin kadek ni eh kin kihwei lohn, me kin wia eh doadoahk en netinet ni mehlel. 6 Aramas mwahu sohte pahn sapwungala; e sohte pahn manokonokla kohkohlahte. 7 E sohte kin masak rong rohng suwed akan; eh pwoson me kehlail, oh e kin likih KAUN-O. 8 E sohte kin pwunod de masepwehk; e koapworpworki me e pahn kilang eh imwintihti kan ar pahn lohdi. 9 E kin sapan ong me paisuwed akan, oh eh kadek kin duweduwehte; e pahn ahneki manaman oh wahun. 10 Aramas suwed kan re kilang met oh lingeringerkihda; re kangkakilkin irail ar kailok oh irail kohkohla; arail koapworopwor sohralahr kohkohlahte.