MELKAHKA KAN 110

1 KAUN-O ketin mahsanihong ei kaun, nanmwarkio, “Komw ketidiong ni palimauniet I lao wiahkihda omwi imwintihti kan utupen aluweluwomwi kan." 2 KAUN-O pahn ketin katelapahla sapwellimomwi manaman en kaunda wehi pokon sang Saion. E mahsanih, “Komwi en kaunda sapwellimomwi imwintihti kan." 3 Rahnen omwi mahweniong omwi imwintihti kan, sapwellimomwi aramas akan pil pahn iang mahweno. Sapwellimomwi mwahnakapw akan pahn patohdo rehmwi nin nahna sarawi kan, rasehng pwoaiken nimensehngie. 4 KAUN-O ketin inoukidahr kehlail, oh sohte pahn ketin koluhkihla: “Komwi pahn wiahla samworo sang met kohkohlahte nin duwen koasoandien samworo Melkisedek." 5 Kaun-o kin ketiket ni palimaunomwien; e pahn ketin kalowehdi nanmwarki kan ni rahn me e pahn engiengda. 6 E pahn ketin kadeikada wehi kan oh ketin kadirehkihla wasahn mahwen kahlep en aramas akan; e pahn ketin kalowehdi nanmwarki kan en sampah pwon. 7 Nanmwarkio pahn ketin nimpil sang piletik en ni keilenial, oh ketin rosonkihda, e ahpw pahn ketin uh ni roson en powehdi.