Matiyu 27
TSC1 Nan bar tlo kǝ bi cigǝniwo, ar ni kiri ga Liɓa kǝ Yam na kiri kǝ bǝn kup mo bi kǝ dǝ wu ri Yesu eka.
2 Ar ni wu ɓal tika, kan wu ri ta ti am dǝ Bilatus, gobna kǝ Roma.
3 Nan Yahuda, muntu kan bi Yesu ka shin’e wu tloyi Yesu shirǝm kǝdǝ ri ti ekawo, ar ni tǝ pi dun mbatli, kan tǝ pal rǝnka kar kiri mǝn keri bar ju ɗiri Yam na kiri kǝ bǝni. Tǝ pali wur azurpa hauya nǝm na kutl gǝzǝni.
4 Tǝ wule, «A pi warwat pitǝnwi, nan a bi muntu pi wani pitǝn da’a dǝ ri ti eka gwa.» Ar ni wu wul ti’e, «Unun ghun mi? Muntuwo, damtǝn gi ni.»
5 Ar ni Yahuda wi wurpiyika te gip Bom kǝ Yamka, kan tǝ ɗǝl tǝ ri rat gam gǝska.
6 Ar ni kiri ga Liɓa kǝ Yam yem wurpiyi wu wule, «Ar ndari dǝ ne wurpiyi kǝba ne wurpi kǝ Bom kǝ Yam da’a, nan wurpi bǝran ni gwa.»
7 Ar ni wu mo bi kan wu wur las gon na wurpiyi. Ba la bi lasi’e las kǝ mǝn tu’i tati, kǝdǝ lasi dǝm ba kapi mǝn dǝki.
8 Ar ni kem ba la bi lasi’e, Las kǝ Bǝran har sekǝni.
9 Tǝp untuni laa’i argon tu mǝn yari shirǝm kǝ Yam Irmiya yari gwa’e, «Wu pǝn azurpa hauya nǝm na kutli, wurpi tu kan mbarǝm kǝ Isra’ila mo bi den dǝ ɓatl den ti gwa itu.
10 Kan wu wur las kǝ mǝn tu’i tat nari, kandatu Babom wulǝm ra gwa.»
11 Yesu ra dlor cina dǝ gobna kǝ Romayi ituwi, ar ni gunyi ngen momi kar ti tǝ wule, «Ki ni’e gun kǝ mǝn Yahudaya?» Yesu nǝmi ti tǝ wule, «Aan, kandatu kǝ yari gwani.»
12 Ama nan kiri ga liɓa kǝ Yam na kiri kǝ bǝn ne ti lar gamo, tǝ shirǝm da’a.
13 Ar ni Bilatus wul ti’e, «Kǝ kum ni shirǝm ju wu yari den ki gwa diya?»
14 Ama Yesu bali ti shirǝm ko nǝm da’a, kan ar ba dlǝkǝn gobnayi hoyi.
15 Wokoci nyel jǝkat bǝdlabǝno, gobnayi ba kur pǝtli wur mbarǝm nǝm gip munju kan ra na ɓali gip bom moni, muntu wu ndu gwa.
16 Wokociyiwo, bar mǝn tli bǝn mbatl gon kan mbarǝm mom ti hoyi gwa ra gip bom moni mǝn sun’e Barabas.
17 Nan womti mbarǝmi dom wuro, ar ni Bilatus ngen momi kar wur tǝ wule, «Woni kǝ ndu’e a pǝtli in we, Barabas na, ko Yesu muntu ba la ti bi’e Almasihu gwa?»
18 Domici Bilatus mom’e ghuve ni kem wur kǝ bi Yesu ka.
19 Nan Bilatus dǝm den dandi tloyi shirǝm gǝso, ar ni nagǝr gǝs kar bar na shirǝm tu dǝ wul ti’e, «Ɗǝl ka gip tǝp kǝ mbarǝm tu kan ra na wani pitǝn da gwa, domici a kum dli naar gip tlon den ti gip gasi.»
20 Ama kiri mǝn keri bar ju ɗiri Yam na kiri kǝ bǝn co mbarǝm kǝ dǝ wu wule, dǝ pǝtli wur Barabas, kan Yesuwo, dǝ ri ti eka.
21 Gobna kǝ Romayi ngen momi kar wur tǝ wule, «Gonge ni gip rop ju kǝ ndu’e a pǝtli inwe?» Ar ni wu nǝmi ti wu wule, «Barabas!»
22 Kan Bilatus ba ngen momi kar wur es tǝ wule, «Unun aa pi na Yesu muntu ba la ti bi’e, Almasihu gwawe?» Ar ni wu tli yar kup gǝzǝn wu wule, «Dǝ ɓa tika den kini!»
23 Bilatus pa ngen momi kar wur tǝ wule, «Unun kemi? Unu wani pitǝn ni tǝ piwe?» Ama womti mbarǝmi wom bar ra wu wule, «Dǝ ɓa tika den kini!»
24 Nan Bilatus shin ti’i mani pi argon da’a, mbarǝm es den ndu’i tli mbatl naar kawo, ar ni tǝ nge mal kan tǝ ho am gǝska cina da wur tǝ wule, «Pun ni am gǝn ra gip shoti bǝran kǝ mbarǝm tu. Muntuwo ge gin ni!»
25 Ar ni mbarǝmi kup nǝm wu wul ti’e, «Naa dǝ bǝran gǝs dǝm den gam gǝmi na mimir gǝmi.»
26 Kan tǝ pǝtli wur Barabas. Tǝ bi bi dǝ ɓo Yesu, kan dǝ ɓa tika den kini.
27 Ar ni mǝn bi’utu kǝ gobna te na Yesu gip bom kǝ gobna kǝ Romayi, kan wu la bi domtǝn kǝ mǝn bi’utu kup wu gandǝl tika.
28 Wu tusi ti tutul dli gǝs ka, kan wu la’i ti zili tlyari luluri.
29 Ar ni wu pi ti lish kǝ gun ka ire, wu kemi ti sur gami. Kan wu kem tǝ nǝm dlo na am gǝs kǝ shimli, wu ngus cina da ti, wu wuli ti den kaar bi’e, «Dǝ shirmi’ika ra, gun kǝ mǝn Yahuda!»
30 Wu bǝse ti mo’ǝmi kan wu nǝm dloyi wu pi ta ɓe gǝs den gami.
31 Nan wu pa’i lo’i gǝso, ar ni wu tusi ti zili tlyari luluri ka, kan wu la’i ti gwasi. Ar ni wu ndara nan ti kǝ dǝ wu ɓa tika den kini.
32 Nan wu den ritǝno, ar ni wu mo na mbarǝm kǝ Sairin gon mǝn sun Siman, wu kem ti tǝ pǝn kin kǝ ɓa’i Yesuyi.
33 Wu ri las tu ba la bi’e, Golgota gwa (Ba kula gam ituwi).
34 Kan wu bi ti mal gǝri kin inabi nan kurtli na ɗasi bar gon gwa, kǝ dǝ tǝ tla. Ama nan tǝ la lǝka denewo, ar ni tǝ nge tleka.
35 Nan wu ɓa ti den kiniwo, ar ni wu rabe lulur gǝs tǝp kǝ ba la’i guri’a.
36 Den kaar kǝ untuwo, ar ni wu dǝm lasi wu den ne ger den ti.
37 To gami da ti kawo, ar ni wu rǝsh shirǝm den ar gontu tǝpi wani gwa, MUNTU NI’E YESU, GUN KƏ MƏN YAHUDA.
38 Mur mǝn tare tǝp jen ra rop kan ɓa wur den kin nan ti gwa, gon den am shimli, gon ngapo den am yali gǝsi.
39 Mbarǝm ju ba wushe ma wu nǝmi ti pi mǝgǝn shirǝmi, wu den kungǝt gami.
40 Wu den wultǝn’e, «Ki kan kǝ wule, ki yasi bom kǝ Yamka, kan kǝ tu gip muri myakan. O ki Nya Yam ni fawo, ɗǝli gam gi, kǝ ɗǝl ka sur den kin tu kan ɓa ki gwa!»
41 Untuni es kiri mǝn keri bar ju ɗiri Yami, na mǝn kulci mbarǝm den tǝlankur Kulci kǝ Musa na kiri kǝ bǝn lo ti.
42 Wu wule, «Tǝ ɗǝli jeni, ama tǝ mbu ɗǝli gam gǝs da’a! Ti ni’e gun kǝ mǝn Isra’ila! Naa tǝ ɗǝl sur den kin tu kan ɓa ti gwa kan mǝ ngǝsh mi den ti.
43 Tǝ ne mbatl den Yami. Naa dǝ Yami ɗǝli ti kǝkǝni, tin tǝ ndu ti gwa, domici tǝ wule,