ዕብራዌ 8

1 ኑኒ ኦህዘ ዳማ ባዝታ Ꮉኖ። ሳሎ ኡባፓ ካታራ ጾዘ አራታፓ ምዛቅ ባጋራ በትደ Ꮉይ ፋና የዘ ካህኑን Ꮉላቃ ኑስ የነ። 2 ኤ አሳራ ማቅካይዝን ላራ ኤቅደ ቱሪ ዱንካንተ ጾዘ ኬ ኦቻነ። 3 ካህኑን Ꮉላቃ ኡባና እሞን ዣርሾ ዣርሾደስ ሹሙንታነ። ይኒ ግሾ ማህ፥ የ ካህንዘ ዣርሾደስ ፈትባዝ የሳደስ ኮሻነ። 4 ህገ ኪትዛንፋና ዣርሽዘ ካህኑን የዘ ግሾ ክርስቶሳ ሳአ የዘ ባዝ ማቅዛኮ ካህነ ማቆስ። 5 ኡን ካህነት ኦችዘ ዱንካንታ ሳሎ የዘስ አዝዘን ዳሾ። ሙሴ ዱንካነ ኤስዘ ዎደ ጾዚ ኤጎ፥ «ታኒ ነና ደረላ አፋ ቤዝደ አዝዘ ካሊ ኦቾ» ያጋይዳ። 6 የዝን የሱሳ እግንዘ ግዳ ማቅደ ጫቆ፥ ቲኖ ጫቆፓ አዛንፋና ኤ ኤክደ ኦችታ ኡንትስትፓ አነ። ይና ኤቅዳና አዘ ጫቆ ቃላራ። 7 ቲኖ ጫቅተ ባላ ባይዘ ባዝ ማቅዛኮ ላምእን ጫቆ ኮሾስ። 8 የዝን ላ ኡንታና ቦሪ፥ Ꮉንጋራ ያጋይዳ፦ «ታኒ እስራኤለ አሱንራን ይሁዳ አሱንራ ክለ ጫቆ ጫቂዘ ዎደ የኦዳ። 9 ይና ጫቅታ ታ ኡን አዱንና ግብጸ ሳአፓ ኩሽቶ አይክ፥ ጎች ኬስደ ዎደ ኡንታራ ጫቂደ ጫቅት ጋር ባያ። ኡን ታ ጫቅተ አማንንትካይዘ ግሾ ታኒ ኡንታና ኦሊ አሽዳ ያጋይዳ ላ። 10 የዝን ይኬፓ ሱባ እስራኤለ አሱንራ ታ ጫቆደ ጫቅታ Ꮉኖ ያጋይዳ ላ። ታኒ ታ ህግቶ ኡን ጉግተ ጋዶዳ፤ ኡን ዎዝንተ ጻፎዳ። ታኒ ኡን ጾዚ ማቃዳ፤ ኡንትን ታ አስ ማቃዳ። 11 ኡንታፓ ኦደን ፋ ዶዛ ዎይ ፋ እሻ፥ ‹ላ ኤሮ› ያጋእ ታማርሶስ። ኡን ኤራፓ ዳማ የሎደስ ኡቡን ታና ኤሮዳ። 12 ታኒ ኡን ቆህዳኖ አቶ ጋዉዳ፤ ኡን ናጋርቶ ማህ ቆፖስ» ያጋይዳ። 13 ጾዚ Ꮉይ ጫቅዛ «ክለ» ጋእ ጼግተራ ቲኖሳያ ጋልእዝዳ። ይኬ፥ ጋልእዘን ጭንግደ ብዘ ዎደ የልዳ።