Kap 61

1 Bepaŋ, kutikutine du’walaŋkade ulak u nadiweŋ. Magike baigoŋ kametnadiŋa yonadine nadiweŋ. 2 Nu yotne-kwetne bikabuŋa wooŋ kweetniŋ hali welemulap kisaŋ hinek nadilat. Unduŋ doktiŋa du nehitubu-lodaweŋ yoŋa kutiganilat. Du nanagila kwet niŋ hebihat titiŋdokneŋ weŋ, kaŋ memik hekidi tuwot mu nehitubu-kadakaneŋ. 3 Du dagoŋ momooŋ hinek nabu-ulidokolaŋ, tiŋa undugoŋ du dagoŋ yahehewene fafaŋeniŋ. Unduŋ doktiŋa memik hekidi tuwot mu nehitubukadakaneŋ. 4 Nadinambune du yokeneŋ uŋgoŋ hatiŋa wooŋ hatibaat. Tiŋa undugoŋ pupup mihiniŋdi miŋ papaliŋiŋ gineŋ fooŋ hebihatak undugoŋ, du gehitubu-dulaaŋ hebeke gineŋ kulemaŋgoŋ hatidok nadilat. 5 Bepaŋ, nemenemek hogohogokdok yofolok tiŋa ganiŋgut u da-ku agaŋ nadiguŋ. Du metam wohoge ganintiloiŋdok yemulaŋ undugoŋ nemenemek nutok u agaŋ namguŋ. 6 Du mapme’walaŋ hatihatiŋiŋ tomboyoulune gulet fee hatiŋa wooŋ hatibaak. 7 Bepaŋ, du nadimimbune namandake foloŋ mapme dapmandapmaŋnit mokit hatiluwaak. Du kanadigalika tiŋa helemahelemaŋ momooŋ hinek kadokoluwaaŋ. 8 Du unduŋ tubune nu helemahelemaŋ yofolok koom dukut tugut u yehikeleluwaat, unduŋ tiŋa helemahelemaŋ wohoge ganintilooŋ kap toluwaat.