LINGE 84

1 Ivei vaho tua tea na utona na valemu, na vale tabu, Ighoe Lord, puku ni maana. 2 Inau tu liona ngangata ge ku ghahau igaa: mu ku linge togotogo vania God haia nia na volagu udolu tua. 3 Na pia tara niku igaa, ma na kukapi tara kisu valedira [na bona ge ke logho gari] i lilighina nimua bela sukaghi Lord, nigua vunaghi haba, ma nigua God. 4 Holoutora gaira tara ghahara tana valemu: gaira tara holohabagho haia tua. 5 Holoutora gaira to lagalagara ighoe: tara ghanaghana ge kara sakutua sara i Jerusalem. 6 Gaira tara va liu haghe tana boboko mamaha, ge vuravura dato mai ga na beti: te horuvia na uha ge vonu igaa na lei kolomiso. 7 Me tona haliu so na lagadira, tara sakutua tona; tara va righi matana didira na God, na lei god ni Jerusalem. 8 Lord, God, puku ni maana, ko rongovia nigua na kokoeliulivuti; God ni Israel, ko rongoviu mai. 9 God, ko vautoa mai na vunaghimami eni: na vunaghi haba to vilia vanighai tua. 10 E uto vaa na kabu sakai na bongi lokana na valemu na valetabu: vulea na togha ni bongi tana bona keha. E uto vaa ku righitaonia na peo ni valena God, vulea na kabu uto tana valena na tinoni dika. 11 A Lord God dida marara, ma na pilupilu: te heghita na sonihalavu mana rongoragha. E taho siki totobo uto ke poloa a Lord, vanira ra hei tara gonia na hava te uto. 12 Lord, God, puku ni maana, holoutora gaira tara ghanaghana kodo itamua.