SALMOS 138

1 Ica nochi noyolo nimitztlascamatis, TOTECO, huan nihuicas para ta iniixpa nopa motequihuajcahua. 2 Nimotlancuaquetza iixmelac motiopa catli tlatzejtzeloltic, huan nimitztlascamatis pampa nelía titetlasojtla huan titemachtli. Nochi catli techtlajtolcahuilijtoc para tijchihuas, tijtlamichihuas pampa mocamanal nelía temachtli quen ta titemachtli. 3 Quema nimitztzajtzilía, ta technanquilía huan techfuerzajmaca. 4 TOTECO, nochi tlanahuatiani catli itztoque ipan ni tlaltipactli mitztlascamatise, pampa nochi inijuanti quicaquise catli tijtlajtolcajtoc. 5 Quena, huicase por nochi nopa huejhueyi tlamantli catli quichijtoc TOTECO, pampa ihueyitilis nelhueyi. 6 Masque TOTECO tlahuel hueyi, yaya quintlacaquilía catli moechcapanohuaj. Pero catli mohueyimatij, monequi moquetzase huejca tlen Toteco, pampa yaya amo quinequi quinitas. 7 Sintla niitztoc ipan tlaijiyohuilistli, ta TOTECO, techmanahuía huan techmaquixtía. Huan quema nechhuilanaj nocualancaitacahua, ta tijxitlahua momax huan techmaquixtía ica mohueyi chicahualis. 8 TOTECO, ta tijchihuas nochi catli timoilhuijtoc para tijchihuas ipan na nonemilis. Pampa nopa tlaicnelijcayotl catli tijpiya ica na, TOTECO, amo quema tlami. Amo techtlahuelcahua pampa ta techchijchijqui.