SALMOS 129

1 Nochi israelitame hueli quiijtose para hasta quema pejqui itztose israelitame, huan pejqui timochihuaj se altepetl tlen san se toeso timasehualme, tocualancaitacahua techtepotztocatinentoque. 2 Techcuesolmacatoque hasta quema tiisraelita masehualme tionpejque timoscaltíaj quen se telpocatl. Pero amo quema hueltoque techtzontlamiltíaj. 3 Tocuitlapa techtlamicocojque quema techmaquiliyayaj hasta huejcajya. 4 Pero TOTECO yaya nelía xitlahuac, quicotonqui nopa tepos cadenas catli ica techtatacatzohuayayaj nopa masehualme catli amo quitlepanitaj TOTECO. 5 Ma huetzica ipan se hueyi pinahualistli nochi catli quicualancaitaj altepetl Jerusalén. 6 Ma elica quen nopa xihuitl catli nimantzi pilini huan huaqui pampa ixhuatoc ipan tlali catli amo huejcatla. 7 Quena, ma elica quen nopa xihuitl catli amo aqui quimehua, niyon amo aqui quipixca itlajca pampa amo tleno ipati. 8 Nimitztlajtlanía para niyon se catli pano nopa fiero masehualme ma amo quintiochihuaca. Amo aqui ma quiijto: “Ma TOTECO anmechtiochihua.” Niyon ma amo quiijtoca: “Tojuanti timechtiochihuaj ica itequiticayo TOTECO."