SALMOS 124

1 Nochi israelitame ma quiijtoca tlaque tijchijtosquíaj sintla TOTECO amo itztosquía tohuaya huan amo techpalehuijtosquía. 2 Sintla TOTECO amo itztosquía tohuaya quema nopa tlacame motlananque para techhuilanase, 3 techtolojtosquíaj tiyoltoque huan techtzontlamiltijtosquíaj ica ininhueyi cualancayo. 4 Inijuanti techhuahuatatztosquíaj quen atl tlatilana, huan huajca eltosquía quen hueyatl panotosquía ipan tojuanti. 5 Quena, eltosquía quen panotosquía miyac atl catli tetetztic, catli tehuahuatatztosquía huan titzontlantosquíaj. 6 Ma tijtlascamatica TOTECO pampa amo quincahuili ma techcococa. 7 Quen se tototl cholohua tlen se tlaquetztli, quej nopa nojquiya Toteco techchololti ininmaco tocualancaitacahua, catli quinequiyayaj techmasiltise. Nopa lazo cotonqui huan tojuanti timocajque timajcajtoque. 8 Tojuanti totlapalehuil huala tlen TOTECO, catli quichijchijqui ilhuicactli huan tlaltipactli.