SALMOS 123

1 Na nijtananas noxayac para nimitztachilis ta, TOTECO, cati timosehuijtoc ipan ilhuicac. 2 Tojuanti timitztachilíaj ta, TOTECO toDios, para ma techtasojta san se quej se tequipanojquet quitachilía iteco, o quej se sihua tequipanojquet quitachilía iteco isihua para ma quichihuili cati cuali. 3 TOTECO, techtasojta. Quena, xijpiya hueyi moyolo ica tojuanti. 4 Ya tisiyajtoque ica nopa masehualme cati techitaj quej amo teno topati. Inijuanti cati mohueyimatij huan cati tominpiyani tahuel techpinajtíaj, hasta ya techyolajsic.