IIBURU 4

1 Teeꞌkoo amorompiri pinkaꞌmariaing diiꞌkoo niiꞌning asiranooꞌke Kumponinge aaꞌpuriꞌneenga, “Diiꞌ bekoiꞌdaririning, nkanooꞌ uaaroma tuntariaukaꞌning.” Aiꞌ teie maraka-antavari niiꞌ naumurimaung bakanooꞌ uaaroma tung-koo tero urikupoong nauvuruꞌnaꞌ nariꞌ. 2 Aaꞌnoko tee tampara doorenang uaaroma tumariaing-koong tee niiꞌkoo pouꞌ teeꞌ teing-koo pouꞌnaꞌ, teka teie doorenange teinge taaravauꞌnunge teing pakuvuriaꞌ masikaꞌantavaavarura pinkaꞌaavaruioꞌ domang-koo. 3 Niiꞌ eeꞌning tee masikaꞌantavampimaing teing teꞌ uaaroma tung-koo makotumpirining, aiꞌ niiꞌ bekoiꞌmariaꞌ teing-pinaꞌ daari meekung-koo aaꞌpuruꞌning-pinaꞌ, “Iiramora marakamarama aaꞌpantuꞌ, ‘Teing nkanooꞌ uaaroma bakei tumpariaukaꞌning.’” (Kena 95:11) Enang anaarei tee teꞌ uaaroma masikaꞌ nariꞌ otomatomanaꞌ tasiꞌantamuri otong aiꞌ otoaruko-pinaꞌ teeꞌ minkuvuaꞌ, teka otoko, temuꞌketa, kansiꞌ pupuꞌura bakevuuꞌnaꞌmung-eta nariꞌ tung-antavuripeuꞌ. 4 Noruꞌampiri otong, aiꞌ teꞌmung uaanaꞌmung tutunaꞌnaꞌmung ˜keꞌmunta-taa-naꞌmung daari meekunge naumurimanaꞌmung aaꞌpuma, “Kumponing tee ˜keꞌmunta-taa-naꞌmung uaavouꞌnung ookara nkovuuꞌning-eta.” (Pupuꞌ 2:2) 5 Eeꞌnoko tenaare tutung minkuansinaare anka masikee-antavui otong daari meekung-koo aaꞌpumanooꞌke, “Teing nkanooꞌ uaaroma bakei tumpariaukaꞌning.” (Kena 95:11) 6 Teing temuꞌnavarang doorenang tampara tamung taaravauꞌning teing teꞌ uaaroma tumpariaruuꞌning masikaꞌantavaavarura. Teka teꞌ uaaroma mmeꞌ makotui otong niiꞌning tung-koo. 7 Aiꞌ damaꞌke Deevitaꞌ karantavuma˜ Kumponinge niiꞌnaꞌmung bateinaꞌmung uaanaꞌ mung miruꞌuuꞌ “eꞌmung” tampuma, Moosesi tero nauvuuꞌnaꞌ siompui. Anaare eeꞌnaare tero minkuansinaare daari meekung-koo eeꞌ otoinooꞌka, “Eꞌmung bakaang aurong taaraverira domang kapantoriaukaꞌ.” (Kena 95:7-8) 8 Teꞌ eeꞌnooꞌ uaaroma okoraꞌ masipoꞌ teie minkuvuuꞌnooꞌ teꞌ kansiꞌ Keenani-navoraꞌ deeaꞌ, Josiuaꞌke beꞌantavuruꞌnooꞌ. Teeꞌ miruꞌari dei damaꞌke pankaroompuioꞌ Kumponinge napoꞌ teeꞌ nariꞌ minkuvuarupeuꞌ “eꞌmung” tovang minkuvuma. 9 Tee tee enang siraꞌpari otong Kumponing bakaning teing makosi uaavoroaining teeꞌ Kumponing teꞌmung ˜keꞌmunta-taa-naꞌmung uaavouꞌnaꞌ. 10 Aiꞌ baa tee Kumponing bakanooꞌ uaaroma tumparapeuꞌnung tee baka bakaang nko-nko nko-koo bakearapeuꞌnung-pinaꞌ otong teeꞌ nariꞌ Kumponinge ookara kapooꞌ nkovura bakearuꞌnaꞌ. 11 Aiaꞌ, teeꞌkoo niikaang domang-eta paaramariaing teꞌ uaaroma tung-koo niiꞌkoo narunge teing urikupoong taarapiikavarikoꞌnaꞌ siompurira teeꞌ nariꞌ duaꞌaraꞌneeng. 12 Aiꞌ tee Kumponing bakaang kara tee domaang-poꞌnung, tanteari otoꞌ, aaꞌnaꞌ irintoꞌ tee bainatu ookamenta iriniiꞌ divuꞌui. Naning tupuꞌui meuꞌ keꞌmeꞌura siraꞌpupeuꞌ aaꞌning: tanuaanooꞌ, uraanooꞌ, kooꞌ beꞌnuꞌnairu eeꞌnoko maꞌmaꞌnairu. Nantoong biikaning onounanka-koo kuunge otoinaꞌ masikaꞌ tasiꞌantaevurikooꞌ maroaamanaꞌ nariꞌ. 13 Eeꞌnoko Kumponinge oo-koo kapooꞌ bakuꞌarapeuꞌnung otoaꞌ, teka ookara kapooꞌnanka nkovuruꞌning siraꞌpariri tavempari otorong bakaang duta-koo, tee-koo simpeꞌmuriko makuꞌampiaing-koo. 14 Teeꞌkoo niikaang domang danto nariꞌ pinkaꞌmariri oꞌnoriaing niikaang masikaꞌanta-koo siraꞌmarimaung-koo, aiꞌ niiꞌ teing pankaing piristiꞌ otoꞌmemuring paninanka aarempui beuꞌnung Kumponing-koo dueꞌ, tee eeꞌnara Jiisuuꞌ, tee Kumponing Bauring. 15 Tee tee napoꞌ niiꞌ niikaning aruaruꞌnanka-koo nariꞌ deeꞌomaung bakei, aiꞌ tee eeꞌnara niiꞌpinaꞌ nariꞌ ookutunairu-koo paaraniiꞌ, teka duaꞌaravaꞌ. 16 Enang tee tampara piristiꞌ pankaing otoko toꞌbiimariri kunsimarima dueꞌmariaing teꞌ Kumponing bakanooꞌ ovorimpari baꞌnaniꞌdoma, pakupaku tamung nkaroma deemparioꞌ piaamurira avusiroꞌari pakumuriainaꞌ makotumpiaruko.