A Damira 49

1 Yakuba ka a dencɛilu kili ko: «Ai ye na ai ladɛn n tɔrɔfɛ. N ye a fɛ ka koilu lase ai ma, mɛnilu kɛtɔ ii la sini natɔ kɔnin. 2 N dencɛilu, ai ye na ai tolo malɔ nde ai fa Yakuba la, a ye fola n ma ko Isirayɛli. 3 Rubɛn, ile le n dencɛ fɔlɔ ri. I fɔlɔ le kɛra n na cɛya ni n na fanka fɔlɔ ri. Bonya ni sebaya ye i bolo ka tamin i dɔɔcɛilu kan, 4 kɔni i ye ikomin ji ba woyetɔ, mɛn ti se a jɛrɛ mirala. I ti nala kɛla bonkun ri fewu, baa i ra i la i fa la lafen kan ka si a muso fɛ. A ka a la n na lafen kan ka a manɔɔ. 5 Simeyɔn ni Lebi miriya ye ko kelen de ri. Ii ka ii la fanmuruilu ta ka wa tiɲannin kɛ. 6 Ii wa kuma gbundu rɔ, n tɛ sɔn ka n sen bila wo rɔ. Ii wa ladɛn kɛ, n di n ban wala, baa ii mɔnɛra ka mɔɔilu faa. Ii juuyara ka nisiilu sen fasailu tɛɛ. 7 Alla ye tɔrɔya la ii kan ii la mɔnɛ wo kosɔn, baa ii la mɔnɛ ka juu, a ni ii la ɲenikɛjuuya wo kosɔn, baa ii la ɲenikɛjuuya ka ii kɛ hinabaliilu le ri. N di ii bɔnsɔn datala Yakuba bɔnsɔn na jamana rɔ. N di ii lajɛnsɛn Isirayɛlika la jamana yɔrɔ bɛɛ rɔ. 8 Yahuda, i badenmailu ri ile le tando. I ri se i juuilu la. I faludenmailu ri ii majii i kɔrɔ. 9 Yahuda ye ikomin yara kanberen de, mɛn di wa sobo faa ka wo dɔɔn, ka na i rasɔmɔn ka i la. Yon di a lawuli? 10 Faamaya gbeleke tɛ bɔ Yahuda bolo. Mansaya gbeleke ri to a bɔnsɔn bolo fo mansaya tii wa na, dunuɲa bɛɛ ri i majii mɛn kɔrɔ. 11 A ri a la fali sidi rɛsɛnju la, ka a la faliden sidi rɛsɛnju ɲuma ɲuma la. A ri a la faanin ko rɛsɛnji la, ka a la durukiba ko rɛsɛnji la, mɛn wulenni ikomin jeli. 12 A ɲailu ri lafin ikomin rɛsɛnji. A ɲinilu ri lagbɛ ikomin nɔnɔ. 13 Sabulɔn di i sii kɔɔji da la. Kulunbailu lɔ diya ri kɛ a wara ri. A la duu ri wa fɔɔ Sidɔn so fan fɛ. 14 Isakari ye ikomin fali, fanka ba ye mɛn na. A ri a la a la donin bɔrɔilu tɛma. 15 Ni a ka a yen tuma mɛn na ko jamana wo ka ɲi, ko yɔrɔ wo duman kosɛbɛ, a ri a kɔ rabɛn donin ta kanma ka kɛ jɔn di ka diyagboya baara kɛ. 16 Daan di a sii a la mɔɔilu kun na ka ii la kiti tɛɛ, a ri kɛ ikomin Isirayɛli kabila tɔilu fanan. 17 Daan ye ikomin sa, mɛn lani sila dafɛ, ikomin fɔnfɔnni, mɛn ye sila mɛsɛnilu la. A ri so cin a sen ma, ka so tii labe a kɔ kan.» 18 Yakuba ka a fɔ ko: «Ɛɛ Allabatala, n ye i makɔnɔla, i ye n kisi.» 19 A ka a fɔ ko: «Benkaninnailu ri na be Kadi kan, kɔni a ri ii gbɛn ka ii kɔsaran kojuuya. 20 Asɛri ri suman duman sɔrɔn; a ri dɔɔnninfen duman di mansailu ma. 21 Nafitali a la fɛrɛnin ikomin minanmuso, mɛn ye a jɛrɛ ma, mɛn ye den ɲumailu sɔrɔnna a jɛrɛ ma. 22 Yusufu ye ikomin jiri mɛn ye a denna kosɛbɛ, jiri mɛn lɔni tenke dafɛ, mɛn bolo ye janyana fɔɔ ka tamin dandan kun na. 23 Kalabiɲetiilu wulira a kanma kojuuya. Ii ka biɲɛilu lafili a ma ka a tɔrɔ kosɛbɛ, 24 kɔni Yusufu la biɲɛkala ma yɛrɛyɛrɛ. A boloilu ka fanka sɔrɔn Alla Sebɛɛtii bolo, mɛn ye Yakuba dɛmɛnna. Wo le ye mɔɔ latankala le ri, mɛn ye Isirayɛli lakandanna, mɛn barakani ikomin farakolo. 25 I fa Maari ye i dɛmɛnna. Alla Sebɛɛtii ye ɲumaya kɛla i yɛ. A ri fen ɲumailu di i ma ka bɔ san ma. A ri ji di i ma ka bɔ duu kɔrɔ. A ri i denilu ni i la kolofenilu siyaya. 26 Fen ɲumailu ye bɔla koyinkɛ kɔrɔilu la, nanfuluilu ye bɔla fɔlɔ tindilu la, kɔni Alla ka ɲumaya mɛnilu kɛ i fa yɛ, woilu ka bon woilu bɛɛ ri. Alla ye wo ɲɔɔn kɛ Yusufu yɛ. Alla ye a kɛ, ɲumaya woilu ye mɛn Yusufu fɛ, mɛn ɲenematɔmɔnni ka bɔ a badenmailu rɔ. 27 Bɛniyaminu fadima ikomin wara juu. Sɔɔma a ye sobo mirala ka do dɔɔn. Wura la, a ri a tɔ ratalan.» 28 Nba, Isirayɛli kabila tan ni fila le woilu ri. Ii fa duwara ii yɛ tuma mɛn na, a ka kuma woilu fɔ. A duwara ii kelen kelenna bɛɛ ye, bɛɛ ni a la duwa. 29 Nba, Yakuba ka a fɔ a dencɛilu yɛ ko: «N satɔla le ka la n benbailu kan. Ni n sara, ai ye wa n su don n benbailu dafɛ falan na, falan mɛn ye Hɛtika Efurɔn na sɛnɛ rɔ. 30 Falan wo ye Makipela, Mamere telebɔ fan fɛ Kanaan jamana rɔ. N benba Iburahima ka dinkira wo le san Hɛtika Efurɔn ma, ka a kɛ a la su don diya ri. 31 N benba Iburahima ni a muso n ma Saran su don diya ye ye le. N fa Isiyaka ni a muso n na Rebeka fanan su don diya ye ye le. N ka Leya su don ye le fanan. 32 Duu wo ni falan bɛɛ sanda Hɛtika de ma.» 33 Nba, Yakuba banni kumala, a ka a la a la lafen kan ka sa, ka la a benbailu kan.