Mboe 3

1 O Yooba, koŋ koi bizin na, munŋaana ma munŋaana men. Tomtom iwal kat, ta timaŋga be tizooro yo mi tikam malmal pio. 2 Wal boozomen tizzo pio ta kembei: “Kere. Anutu ko irao iuuli na som. Pa ipizil ndemeene pini kek." 3 Tamen Yooba, nu we siŋgiao pio mi poroukalkaala yo. Nu ta kam yo ma zoŋ iwe biibi. Koroŋ toro sa som. Mi nu ko pombol yo ma niŋ ise. 4 Nio aŋboobo Yooba be iuulu yo. Mi ni imbot sala abal kini potomŋana, mi ileŋ suŋŋana tio. 5 Tana nio aŋsu muriŋ na, Yooba mataana pio mi aŋkam kene tio ambai men mi aŋmaŋga mini. 6 Mi koŋ koi bizin munŋaana ka tieene ta timar tiliu yo na, aŋmoto zin som. 7 Yooba, maŋga mi swe mburom! Anutu tio, kamke yo pa zin wal sananŋan. Peeze koŋ koi bizin kwon ma zoŋon ipolpol. Pun zin ma mburan imap kat. 8 Yooba, ni ulaaŋa ŋonoono. Ni ko ikampe wal kini mi ipombol zin.