Mikunga 82

1 Mukunga ya Asafe. Nzambi kele na kati ya lukutakanu ya Nzambi. Yandi ke na kufundisa na kati-kati ya Banzambi. 2 Tii wapi ntangu beno ke fundisa na kati ya kondwa ludedomo, mpe beno ke na kunungisa bantu ya yimbi? Kupema 3 Beno fundisa mbote muntu ya kyadi mpe mwana-nsaana, beno sadila ludedomo na mputu mpe na muntu ya mpasi. 4 Beno vuukisa muntu ya kyadi mpe mputu beno kuula bawu na maboko ya bantu ya yimbi. 5 «Bawu kele ve na luzabu mpe mayela, bawu ke na kati kitombe, ni yawu yina, balufulu yina ke na kusimba ntoto ke na kuningana. 6 Mu tubaka ti beno kele banzambi, beno nyonso kele bana ya Nzambi ya Kulutila Kuzangama. 7 Kasi, beno ke na kufwa mutindu bantu ya mpamba, beno ke na kubwa mutindu bamfumu ya mutindu na mutindu.» 8 Nzambi, telama mpe fundisa yinza, samu ti bayinsi nyonso kele mvwilu ya nge!