SALAMO 144

1 Iehova, egu nadi-gini, na hanamoamu; ia ese imagu e hadibadiamu, tuari ai, bona imagu kwakiwakidia danu heatu ai. 2 Ia na egu nadi-gini bona egu kohoro, igimagu bona ihamaurigu, egu kesi bona egu roho-mauri gabuna. Ia ese bese idau-idau na ia aena henudiai e atodiamu. 3 Iehova e, taunimanima be dahaka oi ese o haḡereamu? Taunimanima natuna be daika, oi ese o laloamu? 4 Taunimanima na hahodi tamona na heto, ena mauri dinadia na ikerukeru e hanaimu na heto. 5 Iehova e, emu guba ba haevaia, ba diho. Ororo ba daudia toho, bena bae ara; 6 kevaru ba hakevarua isi, ba hakarohodia rohoroho; emu diba ba kinodia, ba hadareredia. 7 Imamu na atai amo ba toia dobi, ranu momo lalodia amo ba rauagu bona ba hamaurigu, bona idau bese taudia imadia amo danu. 8 Idia ududia ese koikoi herevadia e gwauraimu, idia imadia idibadia na idiba koikoidia. 9 Dirava e, ane matamatana baina abia emu, varo-gwauta gitarana baina hataia, oi ihanamomu. 10 Oi ese pavapava na kwalimu o henidiamu, oi ese emu hesiai tauna David o hamauriamu. 11 Dare mai hisina amo ba hamaurigu, bona idau bese taudia imadia amo ba harohogu mauri; idia ududia ese koikoi herevadia e gwauraimu, bona imadia idibadia na idiba koikoidia. 12 Natuda mamaruanedia na maraḡidia amo bae bada oho bada oho, au babada na heheto; bona natuda hahinedia daiguni dudia na heheto, vada e utu, pavapava ena ruma ḡaudia. 13 Eda roge na bae honu honu dae, aniani ḡaudia idau-idau amo; eda mamoe na natudia daha daha bae havaradia, eda rei gabudia ai bae gerebu gerebu. 14 Eda boromakau na bae rogorogo, bona ta basine mara dika; eda hanua ariaradia ai na lalo-hisihisi taitaidia basie vara. 15 Hahenamo unuhetomadia e abimu besena na e moalemu; ena Dirava be Iehova besena na e moalemu.